തൊഴിൽസമ്മർദങ്ങളെ മറികടക്കാൻ ‘മൈൻഡ് ടോക്ക് ’

കാക്കനാട്

ലോക മാനസികാരോഗ്യ ദിനത്തോടനുബന്ധിച്ച് തൊഴിലിടങ്ങളിലെ സമ്മർദങ്ങളും മാനസികാരോഗ്യ വെല്ലുവിളികളും ചർച്ചചെയ്ത് ഡിവൈഎഫ്ഐ എറണാകുളം പ്രൊഫഷണൽ സബ്‌കമ്മിറ്റിയുടെ നേതൃത്വത്തിൽ സംഘടിപ്പിച്ച ‘മൈൻഡ് ടോക്ക് – വർക്ക് സ്ട്രെസ് ആൻഡ് മെന്റൽ ഹെൽത്ത്’ പരിപാടി ശ്രദ്ധേയമായി. ‘കേൾക്കാം, പറയാം, ചേർന്നുനിൽക്കാം’ എന്ന സന്ദേശവുമായി കാക്കനാട് പെൻഷൻഭവനിൽ നടന്ന പരിപാടി ഡിവൈഎഫ്ഐ സംസ്ഥാന സെക്രട്ടറിയറ്റ് അംഗം മീനു സുകുമാരൻ ഉദ്ഘാടനം ചെയ്തു. കൃഷ്ണ വിനോദ് അധ്യക്ഷനായി.

​‘തൊഴിൽസമ്മർദവും മാനസികാരോഗ്യവും’ വിഷയത്തിൽ നടന്ന പാനൽചർച്ചയിൽ സൈക്കോളജിസ്റ്റ് ഡോ. എൻ എൻ ഹേന, കേരള ഹൈക്കോടതി അഭിഭാഷക അണിമ മുയരത്ത്, ഐടി പ്രൊഫഷണലും ഇൻമൈടെക് ഗ്ലോബൽ പ്രൈവറ്റ് ലിമിറ്റഡ് സഹസ്ഥാപകയുമായ വർഷ നാരായണൻ എന്നിവർ പങ്കെടുത്തു.

​ഡിവൈഎഫ്ഐ പ്രൊഫഷണൽ സബ്‌കമ്മിറ്റി കൺവീനർ എ വി വിനീത്‌കുമാറും സംസ്ഥാന കൺവീനർ ദീപക് പച്ചയും സംസാരിച്ചു. തിയറ്റർ ആർട്ടിസ്റ്റ് ചിഞ്ചു ബി കൃഷ്ണയുടെ നേതൃത്വത്തിൽ ‘ഫീൽ എക്സ്പ്രസ് ഹീൽ’ എന്ന പേരിൽ തിയറ്റർ വർക്ക്‌ഷോപ്പും സംഘടിപ്പിച്ചു. കലയിലൂടെയും അഭിനയത്തിലൂടെയും വികാരങ്ങൾ പ്രകടിപ്പിക്കാനും സ്വയം തിരിച്ചറിയാനും പങ്കെടുത്തവർക്ക് അവസരമൊരുക്കി.