മലങ്കര സുറിയാനി ക്രിസ്ത്യാനി
അസോസിയേഷൻ യോ​ഗം 27ന്

മുളന്തുരുത്തി

മലങ്കരസഭയുടെ പാർലമെന്റായ മലങ്കര സുറിയാനി ക്രിസ്ത്യാനി അസോസിയേഷൻ യോഗം 27ന് മുളന്തുരുത്തി വെട്ടിക്കൽ ദ​യറായിലെ സെന്റ് ​ഗ്രീ​ഗോറിയോസ് ന​ഗറിൽ സമ്മേളിക്കും.

മലങ്കരസഭയ്ക്ക് പുതുതായി നാല്‌ മെത്രാപ്പോലീത്തമാരെ തെരഞ്ഞെടുക്കുന്നതിനാണ്‌ മലങ്കര നസ്രാണി പള്ളിയോ​ഗം ചേരുന്നത്. നാലായിരത്തിലേറെ പ്രതിനിധികൾ പങ്കെടുക്കും. വിദേശ ഭദ്രാസനങ്ങളിലെ അം​ഗങ്ങൾ ഓൺലൈനായും മറ്റുള്ളവർ ബാലറ്റിലൂടെയും വോട്ട് ചെയ്യും. 27ന് രാവിലെ സഭാ മാനേജിങ്‌ കമ്മിറ്റി യോ​ഗം.11.30ന് പള്ളിയിൽനിന്ന് സമ്മേളന​ഗരിയിലേക്ക് വാദ്യമേളങ്ങളുടെ അകമ്പടിയോടെ വാ​ഹന ഘോഷയാത്ര. 12.15ന് സെന്റ് ​ഗ്രീ​ഗോറിയോസ് ന​ഗറിൽ മലങ്കര മെത്രാപോലീത്തയെയും മറ്റു മെത്രാപോലീത്തമാരെയും സ്വീകരിക്കും. രാത്രി ഏഴിന്‌ ഫലം പ്രഖ്യാപിക്കും.

യോഗത്തിന്‌ വിളംബരംകുറിച്ചുള്ള പതാക ഘോഷയാത്ര ചൊവ്വ രാവിലെ 8.30ന് കൊരട്ടി സിയോൻ സെമിനാരിയിൽനിന്ന് ആരംഭിക്കും. കൊച്ചി ഭദ്രാസനാധിപൻ ഡോ. യാക്കോബ് മാർ ഐറേനിയോസ് മെത്രാപോലീത്താ ഫ്ലാ​ഗ് ഓഫ് ചെയ്യും. യാത്രയ്‌ക്ക്‌ ആലുവ തൃക്കുന്നത്ത് സെമിനാരി, മൂവാറ്റുപുഴ അരമന, കോലഞ്ചേരി പള്ളി എന്നിവിടങ്ങളിൽ സ്വീകരണം നൽകും. വൈകിട്ട് അഞ്ചിന് ഘോഷയാത്ര മുളന്തുരുത്തി പള്ളിത്താഴം ജങ്‌ഷനിലെത്തിച്ചേരും. തുടർന്ന് അസോസിയേഷൻ ചേരുന്ന സെന്റ് ​ഗ്രീ​ഗോറിയോസ് ന​ഗറിൽ കാതോലിക്കാ ബാവാ പതാക ഉയർത്തും.