മോര് ഗ്രിഗോറിയോസ് ഗബ്രിയേല് മെത്രാപോലീത്ത അഭിഷിക്തനായി
ബസേലിയോസ് ജോസഫ് പ്രഥമൻ കാതോലിക്കാ ബാവായുടെ മുഖ്യകാർമികത്വത്തിൽ മോര് ഗ്രിഗോറിയോസ് ഗബ്രിയേലിനെ മെത്രാപോലീത്തയായി വാഴിക്കുന്നു
കോലഞ്ചേരി
മലങ്കര യാക്കോബായ സഭ മൂവാറ്റുപുഴ മേഖല സഹായ മെത്രാപ്പോലീത്തയായി മോര് ഗ്രിഗോറിയോസ് ഗബ്രിയേലിനെ വാഴിച്ചു. പുത്തന്കുരിശ് പാത്രിയര്ക്ക സെന്ററിലെ സെന്റ് അത്തനേഷ്യസ് കത്തീഡ്രലില് ബസേലിയോസ് ജോസഫ് കാതോലിക്കാ ബാവായുടെ മുഖ്യ കാർമികത്വത്തിലായിരുന്നു വാഴിക്കൽ.
നിയുക്ത മെത്രാപ്പോലീത്തയെ അംഗീകരിച്ചുള്ള ഇഗ്നാത്തിയോസ് അഫ്രേം ദ്വിതീയന് പാത്രിയര്ക്കീസ് ബാവായുടെ കൽപ്പന ഗീവര്ഗീസ് മോര് അത്താനാസിയോസ് മെത്രാപ്പോലീത്ത വായിച്ചതോടെയാണ് ചടങ്ങുകള് ആരംഭിച്ചത്. ചടങ്ങുകൾക്കിടെ കാതോലിക്കാ ബാവാ, ഗബ്രിയേല് റമ്പാനെ മോര് ഗ്രിഗോറിയോസ് ഗബ്രിയേല് എന്ന് നാമകരണം ചെയ്തു. കാതോലിക്കാ ബാവായില് നിന്ന് സ്വീകരിച്ച അംശവസ്ത്രം സഹകാര്മികരായ മെത്രാപ്പോലീത്തമാര് നവാഭിഷിക്തനെ ധരിപ്പിച്ചു. തുടർന്ന് സിംഹാസനങ്ങളിലിരുത്തി വൈദികര് മൂന്നുപ്രാവശ്യം ഉയര്ത്തി. അഭിഷേക ചടങ്ങുകൾ നാലരമണിക്കൂര് നീണ്ടു.
സുന്നഹദോസ് സെക്രട്ടറി തോമസ് മോര് തീമോത്തിയോസ്, സഭയിലെ മെത്രാപ്പോലീത്തമാർ, ഭാരവാഹികൾ, വൈദികർ, കന്യാസ്ത്രീകൾ, വിശ്വാസികൾ തുടങ്ങിയവർ പങ്കെടുത്തു. അനുമോദനസമ്മേളനം സിറോ മലബാര് സഭ കോതമംഗലം രൂപത ബിഷപ് മാര് ജോര്ജ്ജ് മഠത്തിക്കണ്ടത്തിൽ ഉദ്ഘാടനം ചെയ്തു. കാതോലിക്കാ ബാവാ അധ്യക്ഷനായി.
നവാഭിക്ഷിക്തനായ മെത്രാപ്പോലീത്തയെ സഭാ വൈദിക ട്രസ്റ്റി ഫാ. റോയി ജോര്ജ് കട്ടച്ചിറ, ട്രസ്റ്റി തമ്പു ജോര്ജ് തുകലന്, സെക്രട്ടറി ജേക്കബ് സി മാത്യു എന്നിവര് ചേര്ന്ന് സ്വീകരിച്ചു.
കാലം ചെയ്ത ബസേലിയോസ് തോമസ് പ്രഥമന് ബാവയുടെ സ്മരണാര്ത്ഥം 19 പള്ളികള്ക്ക് ഒരുലക്ഷം രൂപ വീതം സാമ്പത്തികസഹായം കൈമാറി. സ്വിറ്റ്സര്ലന്ഡ്- ഓസ്ട്രിയ ആര്ച്ച് ബിഷപ് മോര് ദിവന്നാസിയോസ് ഇസ ഗുര്ബൂസ് മെത്രാപ്പോലീത്ത, മലങ്കര സുറിയാനി കത്തോലിക്ക സഭ മൂവാറ്റുപുഴ രൂപത ബിഷപ് ഡോ. യൂഹാനോന് മാര് തിയോഡോഷ്യോസ് മെത്രാപ്പോലീത്ത, വരാപ്പുഴ അതിരൂപത സഹായമെത്രാന് ഡോ. മാര് ആന്റണി വാലുങ്കല് തുടങ്ങിയവർ സംസാരിച്ചു.
0 comments