തദ്ദേശ തെരഞ്ഞെടുപ്പ് ; 20 പഞ്ചായത്തുകളിൽകൂടി 
സംവരണ വാർഡുകളായി

കൊച്ചി

തദ്ദേശ തെരഞ്ഞെടുപ്പിന് മുന്നോടിയായി വാഴക്കുളം, കൂവപ്പടി, പാമ്പാക്കുട, പള്ളുരുത്തി ബ്ലോക്കുകളിലെ 20 പഞ്ചായത്തുകളിലെ സംവരണ വാർഡുകളിലേക്കുള്ള നറുക്കെടുപ്പ് നടന്നു. കലക്ടർ ജി പ്രിയങ്കയുടെയും ഇലക്‌ഷൻ ഡെപ്യൂട്ടി കലക്ടർ സുനിൽ മാത്യുവിന്റെയും നേതൃത്വത്തിൽ കലക്ടറേറ്റ് കോൺഫറൻസ് ഹാളിലായിരുന്നു നറുക്കെടുപ്പ്.

ബുധനാഴ്‌ച വടവുകോട്, മുളന്തുരുത്തി, കോതമംഗലം ബ്ലോക്കുകളിലെ പഞ്ചായത്തുകളിലേക്കും 16ന് -മൂവാറ്റുപുഴ, പാറക്കടവ്, ഇടപ്പള്ളി ബ്ലോക്കുകളിലെ പഞ്ചായത്തുകളിലേക്കും തൃപ്പൂണിത്തുറ, മൂവാറ്റുപുഴ, കോതമംഗലം, പെരുമ്പാവൂർ, ആലുവ, കളമശേരി, നോർത്ത് പറവൂർ, അങ്കമാലി, ഏലൂർ, തൃക്കാക്കര, മരട്,പിറവം, കൂത്താട്ടുകുളം നഗരസഭകളിലേക്കും സംവരണ വാർഡുകൾ നിശ്ചയിക്കും. ബ്ലോക്ക് പഞ്ചായത്തിലെ സംവരണ വാർഡുകൾ നിർണയിക്കാനുള്ള നറുക്കെടുപ്പും കൊച്ചി കോർപറേഷൻ വാർഡുകളുടെ നറുക്കെടുപ്പും 18ന്‌ നടക്കും. ജില്ലാപഞ്ചായത്ത് സംവരണ വാർഡ് നറുക്കെടുപ്പ് 21നും നടക്കും. ഗ്രാമ, ബ്ലോക്ക്, ജില്ലാ പഞ്ചായത്തുകളുടെ സംവരണം ജില്ലാ തെരഞ്ഞെടുപ്പ് ഉദ്യോഗസ്ഥനായ കലക്ടർ നിശ്ചയിക്കും. മുനിസിപ്പൽ കൗൺസിലുകളുടേത് തദ്ദേശവകുപ്പ് ജില്ലാ ജോയിന്റ്‌ ഡയറക്ടറും കോർപറേഷനുകളിലേത് തദ്ദേശവകുപ്പ് അർബൻ ഡയറക്ടറുമാകും നിശ്ചയിക്കുക. തിങ്കളാഴ്‌ച 22 പഞ്ചായത്തുകളിലെ സംവരണ വാർഡുകളിലേക്ക്‌ തെരഞ്ഞെടുപ്പ്‌ നടന്നു.