ഡിവൈഎഫ്‌ഐ മാർച്ചിൽ പ്രതിഷേധം ഇരമ്പി

പറവൂർ

പറവൂർ താലൂക്ക് ഗവ. ആശുപത്രിയിലെ ചികിത്സാപ്പിഴവുമൂലം കുന്നുകര വയൽക്കര ആറ്റുവേപ്പിൽ അബ്ദുൽ ജബ്ബാറിന് (56) കാൽമുട്ടിന് താഴെ മുറിച്ചുമാറ്റേണ്ടിവന്ന സംഭവത്തിൽ നാടെങ്ങും പ്രതിഷേധം ഉയരുന്നു. സംഭവത്തിൽ കുറ്റക്കാരായവർക്കെതിരെ അന്വേഷണം നടത്തി നടപടി സ്വീകരിക്കണമെന്നാവശ്യപ്പെട്ട് ഡിവൈഎഫ്ഐ പറവൂർ ബ്ലോക്ക് കമ്മിറ്റിയുടെ നേതൃത്വത്തിൽ താലൂക്ക് ഗവ. ആശുപത്രിയിലേക്ക് പ്രതിഷേധമാർച്ച് നടത്തി. മാർച്ച് തടയാനെത്തിയ പൊലീസും സമരക്കാരും തമ്മിൽ ഉന്തും തള്ളും ബലപ്രയോഗവുമുണ്ടായി.

മുഖ്യമന്ത്രി വി ഡി സതീശന്റെ മണ്ഡലത്തിലെ താലൂക്കാശുപത്രി കശാപ്പുശാലയായി മാറിയെന്ന് സമരം ഉദ്ഘാടനം ചെയ്ത സംസ്ഥാന സെക്രട്ടറിയറ്റ്‌ അംഗം മീനു സുകുമാരൻ പറഞ്ഞു. ബ്ലോക്ക് പ്രസിഡന്റ്‌ പി ആർ സജേഷ്‌കുമാർ അധ്യക്ഷനായി. സിപിഐ എം ഏരിയ സെക്രട്ടറി ടി വി നിധിൻ, ഡിവൈഎഫ്ഐ ജില്ലാ സെക്രട്ടറിയറ്റ്‌ അംഗം എൻ ശ്രേഷ, ജില്ലാ കമ്മിറ്റി അംഗം സേതുപാർവതി സുരേഷ്, ബ്ലോക്ക് ട്രഷറർ അഖിൽ ബാവച്ചൻ, നഗരസഭ പ്രതിപക്ഷനേതാവ് സി എ രാജീവ്, നിവേദ് മധു, എം എസ് അരുൺജി എന്നിവർ സംസാരിച്ചു.

പരാതി ഒതുക്കാൻ സമ്മർദം

പറവൂർ

പറവൂർ താലൂക്ക് ആശുപത്രിയിലെ ഗുരുതര ചികിത്സാപ്പിഴവിനെത്തുടർന്ന്‌ തന്റെ കാൽ മുറിച്ചുമാറ്റേണ്ടിവന്നതായി കുന്നുകര വയൽക്കര ആറ്റുവേപ്പിൽ അബ്ദുൽ ജബ്ബാർ വാർത്താസമ്മേളനത്തിൽ പറഞ്ഞു. ജൂലൈ 26ന് കഠിനമായ കാലുവേദനയുമായി രാത്രി 11നും പുലർച്ചെ മൂന്നിനും ചികിത്സതേടി ആശുപത്രിയിലെത്തിയെങ്കിലും കാര്യമായ പരിചരണം ലഭിച്ചില്ല. പിറ്റേന്നാണ്‌ സർജൻ കോട്ടയം മെഡിക്കൽ കോളേജിലേക്ക് റഫർചെയ്തത്‌ .

രണ്ടാംവട്ടം എത്തിയപ്പോൾ മറ്റൊരു ആശുപത്രിയിലേക്ക് റഫർചെയ്തുവെന്ന നഗരസഭാ അധ്യക്ഷന്റെയും ആശുപത്രി സൂപ്രണ്ടിന്റെയും വാദം തെറ്റാണ്. ശസ്‌ത്രക്രിയയ്ക്കുശേഷം രണ്ടുമാസം പൂർണവിശ്രമത്തിലായതിനാലാണ് പരാതി നൽകാൻ വൈകിയത്. മുഖ്യമന്ത്രിയുടെ മണ്ഡലമായതിനാൽ വിവാദമാകുമെന്നും പരാതി നൽകരുതെന്നും താലൂക്കാശുപത്രി സൂപ്രണ്ട് പറഞ്ഞു. കൃത്രിമക്കാൽ വച്ചുതരാമെന്നും ഫിസിയോതെറാപ്പി ഉൾപ്പെടെയുള്ള ചികിത്സാസഹായങ്ങളും സാമ്പത്തിക ആനുകൂല്യങ്ങളും നൽകാമെന്നും വാഗ്ദാനം ചെയ്തു. രണ്ടാഴ്ചമുമ്പ് ചെയർമാനെ കാണാൻ നഗരസഭാ ഓഫീസിൽ പോയിരുന്നു.

മുകളിലേക്ക് കയറാനുള്ള ബുദ്ധിമുട്ടുകൊണ്ട് ഫോണിൽ സംസാരിച്ചു. തിരക്കാണെന്നായിരുന്നു മറുപടി. അബ്ദുൽ ജബ്ബാറിന്റെ പോരാട്ടങ്ങൾക്ക്‌ പിന്തുണ നൽകുമെന്ന്‌ വാർത്താസമ്മേളനത്തിൽ പങ്കെടുത്ത സിപിഐ എം പറവൂർ ഏരിയ സെക്രട്ടറി ടി വി നിഥിൻ പറഞ്ഞു. പറവൂർ താലൂക്കാശുപത്രിക്കെതിരെ അടിസ്ഥാനരഹിതമായ ആരോപണങ്ങളും കുപ്രചാരണങ്ങളും നടത്തുന്നതിന്റെ ഭാഗമാണ് ഇപ്പോഴത്തെ വിവാദങ്ങളെന്ന്‌ നഗരസഭാ ചെയർമാൻ രമേഷ് ഡി കുറുപ്പ് വാർത്താസമ്മേളനത്തിൽ പറഞ്ഞു.

ആരോഗ്യ 
വിജിലൻസ് പരിശോധന 
നടത്തി

പറവൂർ

പറവൂർ താലൂക്ക് ഗവ. ആശുപത്രിയിൽ ചികിത്സാപ്പിഴവുമൂലം രോഗിയുടെ കാൽ മുറിച്ചുമാറ്റേണ്ടിവന്ന സംഭവത്തിൽ വിശദ അന്വേഷണത്തിന് ആരോഗ്യവകുപ്പിന്റെ റീജണൽ വിജിലൻസ് ടീം ആശുപത്രിയിലെത്തി. റീജണൽ വിജിലൻസ് അംഗങ്ങളായ ഡോ. റോഷ്‌ണി, സബ്‌ജക്ട്‌ എക്സ്പെർട്ട് ഡോ. ശ്യാം എന്നിവരുടെ നേതൃത്വത്തിലുള്ള സംഘമാണ് ചൊവ്വ ഉച്ചയോടെ പരിശോധനയ്‌ക്കെത്തിയത്.

സംഭവത്തിൽ വലതുകാൽ മുട്ടിനുതാഴെ മുറിച്ചുമാറ്റേണ്ടിവന്ന കുന്നുകര വയൽക്കര ആറ്റുവേപ്പിൽ അബ്ദുൽ ജബ്ബാർ (56) അന്വേഷണം ആവശ്യപ്പെട്ട് ഡിഎംഒക്ക് പരാതി നൽകിയിരുന്നു. സൂപ്രണ്ട് ആഷ കെ ജോൺ, മറ്റു ജീവനക്കാർ എന്നിവരിൽനിന്ന് വിജിലൻസ് സംഘം വിവരങ്ങൾ ചോദിച്ചതായാണ് സൂചന. ആശുപത്രി രേഖകളും പരിശോധിച്ചശേഷമാണ് മടങ്ങിയത്. അടുത്തദിവസം അബ്‌ദുൽ ജബ്ബാറിനെയും സന്ദർശിച്ച് മൊഴിയെടുക്കും.