സ്റ്റാർട്ടപ്‌ മിഷൻ ജീവനക്കാർ 
സഞ്ചരിച്ച കാറിന് തീപിടിച്ചു

കളമശേരി

എറണാകുളം ഗവ. മെഡിക്കൽ കോളേജിനുസമീപം സ്റ്റാർട്ടപ്‌ മിഷനിലെ ജീവനക്കാർ സഞ്ചരിച്ച കാറിന് തീപിടിച്ചു. വാഹനം പൂർണമായും കത്തിനശിച്ചു. വെള്ളി രാത്രി 7.30ഓടെയാണ് സംഭവം. ​

സ്റ്റാർട്ടപ്‌ മിഷനിലേക്ക് വരുന്നതിനിടെ എച്ച്എംടി കോളനി–മറ്റക്കാട് റോഡിൽവച്ചാണ് കാറിൽനിന്ന് തീ ഉയരുന്നത് യാത്രക്കാർ ശ്രദ്ധിച്ചത്. ഉടൻ വാഹനം റോഡരികിൽ ഒതുക്കിനിർത്തി ഇരുവരും പുറത്തിറങ്ങിയതോടെ തീ ആളിപ്പടരുകയായിരുന്നു. ​നാട്ടുകാർ വിവരമറിയിച്ചതനുസരിച്ച് തൃക്കാക്കരയിൽനിന്നെത്തിയ അഗ്നിരക്ഷാസേനയാണ് തീയണച്ചത്. തീപിടിത്തത്തിന്റെ കാരണം വ്യക്തമല്ല.