അങ്ങാടിക്കടവ്‌ പാലം: തൂണിന്റെ സിമന്റ്‌ അടർന്ന്‌ അപകടസ്ഥിതിയിലായി

അങ്കമാലി ​

അങ്കമാലി അങ്ങാടിക്കടവ് പാലത്തിന്റെ തുണുകളിലൊന്നിന്റെ സിമന്റ്‌ അടർന്നുവീണ്‌ അപകടസ്ഥിതിയിലായി. സിമന്റ്‌ അടർന്ന് തുരുമ്പെടുത്ത കമ്പികൾ പുറത്ത്‌ കാണാം.

കമ്പികൾക്കിടയിലുടെ കാട്ടുവള്ളികളും വേരുകളും ഇറങ്ങി. ഭാരവാഹനങ്ങൾ കടന്നുപോകുമ്പോൾ പാലത്തിന്‌ വിറയിലുണ്ടാകുന്നുണ്ട്‌. പീച്ചാനിക്കാട്, വട്ടപ്പറമ്പ്, എളവൂർ പുവത്തുശേരി തുടങ്ങിയിടങ്ങളിലേക്കുള്ള ബസുകൾ കടന്നുപോകുന്നത് ഈ പാലത്തിലൂടെയാണ്.

അരനൂറ്റാണ്ട്‌ പഴക്കമുള്ള പാലത്തിൽ നിർമാണത്തിനുശേഷം ഇതുവരെ ഒരു അറ്റകുറ്റപ്പണികളും നടത്തിയിട്ടില്ല. വീതിയില്ലാത്തതിനാൽ പാലത്തിലൂടെ ഒരേസമയം ഇരുവശത്തേക്കും വാഹനങ്ങൾ കടന്നുപോകാൻ പ്രയാസമുണ്ട്‌. കാലപ്പഴക്കവും ശോച്യാവസ്ഥയും കണക്കിലെടുത്ത് പാലത്തിന്റെ സുരക്ഷസംബന്ധിച്ച് വിദഗ്ധ പരിശോധന നടത്തണമെന്നും അറ്റകുറ്റപ്പണി നടത്തണമെന്നും നാട്ടുകാർ ആവശ്യപ്പെട്ടു.