വാട്ടർ മെട്രോ എറണാകുളം 
ടെർമിനൽ ഒരു വർഷത്തിനകം

കൊച്ചി

എറണാകുളം ബോട്ട് ജെട്ടിക്ക് സമീപത്തെ വാട്ടർ മെട്രോ ടെർമിനലിന്റെ നിർമാണം ഒരു വർഷത്തിനകം പൂർത്തിയാകുമെന്ന്‌ കെഎംആർഎൽ. പൈലിങ്‌ പുരോഗമിക്കുന്നു. 32 കോടി രൂപയാണ്‌ ചെലവ്‌. പരമ്പരാഗത കേരളീയ വാസ്തുശിൽപ്പ രീതിയിലാണ്‌ രൂപകൽപ്പന.

​രണ്ടു നിലകളിലായി 18,000 ചതുരശ്ര അടിയാണ് വിസ്തീർണം. ഒന്നാംനില പൂർണമായും വാണിജ്യ ആവശ്യങ്ങൾക്കാണ്‌. കിറ്റ്കോയാണ് ഡിസൈൻ കൺസൾട്ടന്റ്‌. ടെർമിനൽ പ്രവർത്തനസജ്ജമാകുമ്പോൾ മട്ടാഞ്ചേരി, ഫോർട്ട് കൊച്ചി, കുമ്പളം, ഇടക്കൊച്ചി എന്നിവിടങ്ങളിലേക്ക് നേരിട്ട് സർവീസ് നടത്താൻ കഴിയും. ​രണ്ടു ഫ്ലോട്ടിങ്‌ ജെട്ടികൾ, ചാർജിങ്‌ പോയിന്റുകൾ, ഇന്ധന സ്റ്റേഷൻ എന്നിവയും ഇവിടെയുണ്ടാകും. ഇടക്കൊച്ചി, വരാപ്പുഴ ടെർമിനലുകളുടെ ടെൻഡർ നടപടികളും പൂർത്തിയായിവരുന്നു. ഇടക്കൊച്ചിക്ക് 20 കോടി രൂപയും വരാപ്പുഴയ്ക്ക് 16 കോടി രൂപയും ചെലവ് പ്രതീക്ഷിക്കുന്നു.