ആർമിയും വാങ്ങി ഇവരുടെ സോഫ്‌റ്റ്‌വെയർ

കാസർകോട്‌

പഠിക്കാൻ മാത്രമല്ല, പട്ടാളത്തിനായി സോഫ്റ്റ് വെയർ രൂപകൽപ്പന ചെയ്യാനും പോന്നവരാണ് ശ്രാവണും ശ്രീനന്ദും. ഇന്ത്യൻ ആർമി ഇ‍ൗസ്‌റ്റേൺ കമാൻഡിലെ ആന്ധ്രപ്രദേശ്‌ യൂണിറ്റിന്‌ എഐ അധിഷ്ഠിത വാഹന പരിശോധനാ സോഫ്റ്റ്‌വെയർ ഉണ്ടാക്കിയാണ് പയ്യാവൂർ സേക്രട്ട്‌ ഹാർട്‌ ഹയർസെക്കൻഡറിയിലെ പ്ലസ്‌ടു കംപ്യൂട്ടർ സയൻസ്‌ വിദ്യാർഥി ശ്രാവൺ നാരായണും ഇരിയണ്ണി ജിഎച്ച്‌എസ്‌എസ്സിലെ പ്ലസ്‌ടു കംപ്യൂട്ടർ സയൻസ്‌ വിദ്യാർഥി കെ ശ്രീനന്ദും പുതിയ ‘പാഠ'ങ്ങൾ ചരിത്രത്തിലേക്കെഴുതി ചേർക്കുന്നത്. മിലിട്ടറി വാഹന തകരാർ മുൻകൂട്ടി കണ്ടുപിടിക്കുന്ന സംവിധാനമാണ് സ്വന്തം സ്‌റ്റാർട്ടപ് സംരംഭമായ ‘കോഡ്‌ കേവി’ലൂടെ രൂപപ്പെടുത്തിയത്‌. ലണ്ടനിലും യുഎസ്സിലും ദുബായിലും ഓൺലൈനായി കംപ്യൂട്ടർ കോഡിങ് ക്ലാസെടുക്കുന്ന മിടുക്കരുടെ കഥയറിഞ്ഞ ഇ‍ൗസ്‌റ്റേൺ കമാൻഡന്റിലെ ഓഫീസർമാർ പുതിയ സോഫ്റ്റ്‌വെയറിനായി ഇവരെ സമീപിക്കുകയായിരുന്നു. ഈ പ്ലസ്‌ടുക്കാരുടെ കോഡ്‌ കേവ്‌ കന്പനിക്കുകീഴിൽ 22 പേർ ജോലിചെയ്യുന്നുണ്ട്. ലണ്ടൻ, യുഎഇ, ഖത്തർ, സ‍ൗദി രാജ്യങ്ങളിലെ വിവിധ കമ്പനികളുടെ സോഫ്‌റ്റ്‌വെയറുകളും തയ്യാറാക്കുന്നു. നിലവിൽ 500 പ്രൊജക്ടുകൾ ചെയ്‌തുനൽകി. കോഡ്‌കേവ്‌, കോഡ്‌കേവ്‌ റോബോട്ടിക്‌സ്‌, കോഡ്‌ കേവ്‌ മീഡിയ വിഭാഗങ്ങളായാണ്‌ കമ്പനിയുടെ പ്രവർത്തനം. റോബോട്ടിക്‌സിൽ സർക്യൂട്ട്‌ നിർമാണം, സെൻസറുകളുടെയും കംപ്യൂട്ടർ പ്രോഗ്രാമിങ് വഴി ഇലക്‌ട്രോണിക് ഉപകരണങ്ങളെയും നിയന്ത്രിക്കൽ തുടങ്ങിയ സേവനങ്ങളും നൽകും. വീഡിയോ എഡിറ്റിങ്, ഗ്രാഫിക്‌സ്‌, സമൂഹ മാധ്യമ സേവനം എന്നിവയുമുണ്ട്. ശ്രീനന്ദ്‌ റോബോട്ടിക്‌സ്‌ ഡവലപ്പറും പരിശീലകനുമാണ്‌. ശ്രാവൺ ‘ന‍ൗ ഓവർ നെവർ’ എന്ന പുസ്‌തകമെഴുതി ഇന്ത്യ ബുക്സ്‌ ഓഫ്‌ റെക്കോർഡ്‌സിലും ഇടംനേടി. ഇരുവരും നിരവധി എൻജിനിയറിങ് കോളേജുകളിൽ ക്ലാസെടുക്കാനും പോകുന്നു. അതത് പ്രദേശത്തെ സംഭവങ്ങളും പൊതുവിവരങ്ങളും സേവനങ്ങളും ഉടനടി എല്ലാവരിലേക്കുമെത്തിക്കുന്ന ‘മൈ വാർഡ്‌’ സ്‌റ്റാർട്ടപ്പാണ്‌ ഏറ്റവും പുതിയത്. അഞ്ചിൽ പഠിക്കുന്പോൾ ഓൺലൈൻ വഴിയാണ്‌ ഇരുവരും പരിചയപ്പെട്ടത്‌. ശ്രാവൺ സ്‌കൈപ്‌ പ്ലാറ്റ്‌ ഫോം വഴി വെബ്‌സൈറ്റ്‌ നിർമാണവും ശ്രീനന്ദ്‌ കൈറ്റ്‌സിലൂടെ ലഭിച്ച റോബോട്ടിക്‌സ്‌ പരിശീലനവും നേടി. എസ്‌എസ്‌എൽസിക്ക്‌ പഠിക്കുന്പോഴാണ്‌ കോഡ്‌ കേവ്‌ മീഡിയ കന്പനി തുടങ്ങിയത്

മിടുക്കർ പാഠപുസ്‌തകത്തിലും

കോഡ് കേവ് മീഡിയ സ്‌റ്റാർട്ടപ്പ് സംരംഭകരായ ഇരുവരും എസ്‌എസ്‌എൽസി പാഠപുസ്‌തകത്തിലും ഇടം നേടി. ഐടി രണ്ടാംഘട്ട വർക്ക്‌ബുക്കിലാണ്‌ ഇവരെക്കുറിച്ച്‌ പഠിക്കാനുള്ളത്‌. പൊതുവിദ്യാലയത്തിൽ പഠിക്കുന്നവരും സ്‌മാർട്ടാണെന്ന് തെളിയിക്കുന്ന ഇവരുടെ വിജയത്തെക്കുറിച്ചുള്ള 2023 ആഗസ്‌ത്‌ 23ലെ ദേശാഭിമാനി വാർത്ത ഉൾപ്പെടുത്തിയ പാഠഭാഗമാണ്‌ പുസ്‌തകത്തിലുള്ളത്‌. ജാവ, സി ++, പൈത്തൺ പോലുള്ള പ്രോഗ്രാമിങ് ഭാഷകളുപയോഗിച്ച് ബൈനറി കോഡുകളാക്കി മാറ്റുന്ന കോഡിങ് സ്വയം പഠിച്ചെടുത്ത്‌ ഇവർ സംരംഭം തുടങ്ങിയതിനെക്കുറിച്ചൊക്കെ പാഠത്തിലുണ്ട്‌. ചെങ്ങളായിയിലെ ബിസിനസുകാരനായ പി പി നാരായണന്റെയും സ്‌മിതയുടെയും മകനാണ് ശ്രാവൺ. ഖത്തറിൽ ജോലിചെയ്യുന്ന കുറ്റിക്കോലിലെ എം ഗോപാലകൃഷ്‌ണന്റെയും കെ വത്സലയുടെയും മകനാണ് ശ്രീനന്ദ്.