ദേശീയപാതയിൽ മണ്ണിടിഞ്ഞു

വടക്കഞ്ചേരി

വടക്കഞ്ചേരി – മണ്ണുത്തി ദേശീയപാതയിൽ ശങ്കരൻകണ്ണൻതോടിന് സമീപം മണ്ണിടിഞ്ഞു. തിങ്കളാഴ്ച പുലർച്ചെയായിരുന്നു സംഭവം. ദേശീയപാതയോരത്തെ കുന്നിൽനിന്ന്‌ മണ്ണും പാറക്കല്ലും ഇടിഞ്ഞുവീഴുകയായിരുന്നു. പാറക്കല്ല് തൃശൂർ ദിശയിലേക്കുള്ള ആറുവരി പാതയുടെ മധ്യഭാഗത്ത്‌ എത്തി. വാഹനഗതാഗതം ഭാഗികമായി സ്തംഭിച്ചു. ഈ സമയം റോഡിൽ വാഹനങ്ങൾ ഇല്ലാത്തതിനാൽ വൻദുരന്തം ഒഴിവായി. പിന്നീട് ദേശീയപാത അതോറിറ്റിയുടെ നേതൃത്വത്തിൽ നീക്കി. മഴ കനക്കുന്നതോടെ ദേശീയപാതയിൽ പന്നിയങ്കര, തേനിടുക്ക്, ശങ്കരൻകണ്ണൻതോട് തുടങ്ങിയ ഒമ്പതോളം സ്ഥലങ്ങളിൽ മണ്ണിടിയാൻ സാധ്യതയുണ്ട്. ഇവിടങ്ങളിൽ സംരക്ഷണഭിത്തി കെട്ടണമെന്നാണ് നാട്ടുകാരുടെ ആവശ്യം.