എസ്​എഫ്​ഐ മാർച്ചിൽ ആയിരങ്ങൾ

പാലക്കാട്​

അവകാശ പത്രിക അംഗീകരിക്കണമെന്നാവശ്യപ്പെട്ട്​ എസ്​എഫ്​ഐ ജില്ലാ കമ്മിറ്റി നേതൃത്വത്തിൽ നടത്തിയ കലക്ടറേറ്റ്​ മാർച്ചിൽ ആയിരകണക്കിന്​ വിദ്യാർഥികൾ അണിനിരന്നു. 21ന്​ എസ്​എഫ്​ഐ സംസ്ഥാന കമ്മിറ്റി 60 ആവശ്യങ്ങൾ അടങ്ങുന്ന അവകാശ പത്രിക മുഖ്യമന്ത്രിക്ക്​​ സമർപ്പിച്ചിരുന്നു. സർവകലാശാലകളെ കാവിവൽക്കരിക്കുന്ന കേരള ഗവർണറെ ചാൻസലർ സ്ഥാനത്തുനിന്ന്​ മാറ്റുക, മുഴുവൻ സർവകലാശാലകളിലും വൈസ്​ ചാൻസലർമാരെ നിയമിക്കുക, എല്ലാ വിദ്യാഭ്യാസ സ്ഥാപനങ്ങളിലും വിദ്യാർഥി സംഘടന പ്രവർത്തനം ഉറപ്പുവരുത്തുക, സ്വാശ്രയ–സ്വകാര്യ കോളേജുകളിലെ ഫീസ്​ നിയന്ത്രിക്കാൻ വിദ്യാർഥി പ്രതിനിധികളെ ഉൾപ്പെടുത്തി സമിതി രൂപീകരിക്കുക, എല്ലാ സർവകലാശാലകളിലെയും അക്കാദമിക്​ കലണ്ടർ ഏകീകരിച്ച്​ പരീക്ഷ സമയബന്ധിതമായി നടപ്പാക്കി, ഫലം പ്രഖ്യാപിച്ച്​ സർട്ടിഫിക്കറ്റുകൾ വിതരണം ചെയ്യുക, മുടങ്ങിക്കിടക്കുന്ന ഇ ഗ്രാന്റ്​, ഫെലോഷിപ്​​, സ്​കോളർഷിപ്​​ എന്നിവ വിതരണം ചെയ്യുക തുടങ്ങി 60 ഇന ആവശ്യങ്ങളാണ്​ അവകാശ പത്രികയിലുള്ളത്​. വിക്ടോറിയ കോളേജ്​ പരിസരത്തുനിന്നാരംഭിച്ച മാർച്ച്​ സിവിൽ സ്​റ്റേഷന്​ മുന്നിൽ പൊലീസ്​ തടഞ്ഞു. തുടർന്ന്​ നടന്ന ധർണ എസ്​എഫ്ഐ സംസ്ഥാന ജോയിന്റ്​ സെക്രട്ടറി സെയ്​ദ്​ മുഹമ്മദ്​ സാദിഖ്​ ഉദ്​ഘാടനം ചെയ്​തു. ജില്ലാ പ്രസിഡന്റ്​ വി വി അഭിഷേക്​ അധ്യക്ഷനായി. ജില്ലാ ജോയിന്റ്​ സെക്രട്ടറി അഭിൻ കൃഷ്​ണ സംസാരിച്ചു. ജില്ലാ സെക്രട്ടറി എസ്​ വിപിൻ സ്വാഗതവും സംസ്ഥാന കമ്മിറ്റി അംഗം മുഹമ്മദ്​ ശാദുലി നന്ദിയും പറഞ്ഞു.