ഹൃദയങ്ങളിൽ 
‘നക്ഷത്ര’ ത്തിളക്കം

'Nakshatra' shines in hearts
avatar
സ്വന്തം ലേഖിക

Published on Dec 01, 2025, 12:00 AM | 1 min read

പാലക്കാട്‌

രാവിലെത്തൊട്ട്‌ കാത്തിരിക്കുകയായിരുന്നു കുഞ്ഞിക്കാളി. വണ്ടിയിറങ്ങി, എൽഡിഎഫ്‌ ശ്രീകൃഷ്ണപുരം ജില്ലാ പഞ്ചായത്ത്‌ ഡിവിഷൻ സ്ഥാനാർഥി എ കെ ഷീലാദേവി നേരെയെത്തിയത്‌ കുഞ്ഞിക്കാളിക്ക്‌ അരികിൽ. ‘പെൻഷനൊക്കെ കിട്ടീല്ലേ അമ്മേ’– ഷീലാദേവിയുടെ ചോദ്യം. ‘‘കിട്ടി മോളെ പെൻഷനും കിട്ടി, ഞങ്ങടെ റോഡ്‌ നോക്ക്‌. അതും ശരിയായി’’– പറയുമ്പോൾ കുഞ്ഞിക്കാളിയുടെ കണ്ണിൽ നക്ഷത്രത്തിളക്കം. നവീകരിച്ച ശ്രീകൃഷ്ണപുരം–-പാറ റോഡ്‌ കുറച്ചുമാസങ്ങൾക്കുമുമ്പാണ്‌ കെ പ്രേംകുമാർ എംഎൽഎ ഉദ്‌ഘാടനം ചെയ്തത്‌. വെള്ളിനേഴി, പൂക്കോട്ടുകാവ്, ശ്രീകൃഷ്ണപുരം, കരിമ്പുഴ, പഞ്ചായത്തുകൾ ഉൾപ്പെടുന്നതാണ്‌ ശ്രീകൃഷ്ണപുരം ഡിവിഷൻ. കഴിഞ്ഞ തെരഞ്ഞെടുപ്പിൽ കെ പ്രേംകുമാറാണ്‌ വിജയിച്ചത്‌. അദ്ദേഹം എംഎൽഎയായതോടെ നടന്ന ഉപതെരഞ്ഞെടുപ്പിൽ എൽഡിഎഫിലെ കെ ശ്രീധരൻ 9,270 വോട്ടിന്‌ ജയിച്ചു. 13 കോടി രൂപയുടെ വികസനമാണ്‌ കഴിഞ്ഞ അഞ്ചുവർഷക്കാലയളവിൽ ഡിവിഷനിൽ നടപ്പാക്കിയത്‌. റോഡ്‌ നവീകരണം (2.35 കോടി ), കെട്ടിടങ്ങൾ (85 ലക്ഷം), കാഞ്ഞിരായിക്കടവ് ജലബന്ധാര (3.7 കോടി ), വെള്ളിനേഴി ജിഎച്ച്എസ്‌എസ്‌ നീന്തൽക്കുളം (62 ലക്ഷം ), കുടിവെള്ള പദ്ധതി (25 ലക്ഷം) തുടങ്ങി നിരവധി പ്രധാന പദ്ധതികൾ പൂർത്തിയാക്കി. ചുനങ്ങാട് എംഎസ്‌വിഎം യുപി സ്കൂൾ അധ്യാപികയാണ്‌ ഷീലാദേവി. സിപിഐ എം ശ്രീകൃഷ്ണപുരം ഏരിയ കമ്മിറ്റിയംഗമാണ്‌. പൂക്കോട്ടുകാവ് പഞ്ചായത്തംഗം, ശ്രീകൃഷ്ണപുരം ബ്ലോക്ക് പഞ്ചായത്തംഗം, പൂക്കോട്ടുകാവ് പഞ്ചായത്ത്‌ പ്രസിഡന്റ് എന്നീ ചുമതലകൾ വഹിച്ചിട്ടുണ്ട്‌. നിലവിൽ , മഹിളാ അസോസിയേഷൻ ജില്ലാ നിർവാഹക സമിതി അംഗവും തൊഴിലുറപ്പ് യൂണിയൻ ജില്ലാ കമ്മിറ്റിയംഗവുമാണ്‌.



deshabhimani section

Related News

View More
0 comments
Sort by

Deshabhimani

Subscribe to our newsletter

Quick Links


Home