ഒരുമിച്ചാണ്, കലയിലും ജീവിതത്തിലും

കോഴിക്കോട്

കലയിലും ജീവിതത്തിലും കൈകോർത്ത് ഒരേ പാതയിൽ നടക്കുകയാണ് ഡോ. ടി എം രഘുറാമും ഭാര്യ നവനീതം രഘുറാമും. ഒരേ അഭിരുചിയുള്ളവർ ജീവിതത്തിലും ഒന്നായപ്പോൾ വർണങ്ങളുടെ വലിയ ലോകം കൂടി പിറന്നു. ലളിതകലാ അക്കാദമി ആർട്ട് ​ഗ്യാലറിയിൽ ടു​ഗതർ ഇൻ ആർട്‌ എന്ന പേരിലാണ് ദമ്പതികളുടെ ചിത്രപ്രദർശനം. എഴുപതിനടുത്ത് പ്രായമുള്ള ദമ്പതികൾ ഒഴിവുസമയങ്ങളിൽ വരച്ച 65 ചിത്രങ്ങളാണ് പ്രദർശിപ്പിച്ചത്. പ്രകൃതിയും സ്ത്രീയുമെല്ലാം തീമായ പേസ്റ്റൽ പെൻസിൽ ചിത്രങ്ങളാണ് രഘുറാമിന്റേത്. ​ഗോണ്ട് ട്രൈബൽ ആർട്ടിലും സെന്റാ​ഗിൾ വരയിലുമുള്ള 35 ചിത്രങ്ങളാണ് നവനീതം വരച്ചിട്ടുള്ളത്. ഇരുവരും ഒരുമിച്ച് ആദ്യമായാണ് പ്രദർശനം നടത്തുന്നത്‌. കല തന്നെ തെറാപ്പിയാണെന്നും ക്ലിനിക്കിൽ വരുന്നവർക്കും വരയും സം​ഗീതവുമെല്ലാം നിർദേശിക്കാറുണ്ടെന്നും ഡോ. ടി എം രഘുറാം പറഞ്ഞു. മലയാളത്തിലും ഇം​ഗ്ലീഷിലും തമിഴിലുമായി 18 പുസ്തകങ്ങൾ രഘുറാമിന്റേതായി പ്രസിദ്ധീകരിച്ചിട്ടുണ്ട്. വർണങ്ങളുടെ ലോകത്ത് കൂടുതൽ വിസ്മയങ്ങൾ തീർക്കാനുള്ള തയ്യാറെടുപ്പിലാണ് തലശേരി സ്വദേശിയും റിട്ട. സൈക്യാട്രിക് പ്രൊഫസറുമായ രഘുറാമും തഞ്ചാവൂർ സ്വദേശി നവനീതവും. പ്രദർശനം ആർട്ടിസ്റ്റ് മദനൻ ഉദ്ഘാടനം ചെയ്തു. ഒമ്പതിന് അവസാനിക്കും.