സിവിൽ സ്റ്റേഷനിലേക്ക് 
കെജിഎൻഎ മാര്‍ച്ച്

കോഴിക്കോട് കേരള ഗവ. നഴ്സസ് അസോസിയേഷൻ (കെജിഎൻഎ) ജില്ലാ കമ്മിറ്റി കോഴിക്കോട് സിവിൽ സ്റ്റേഷനിലേക്ക് മാർച്ച് സംഘടിപ്പിച്ചു. കേന്ദ്ര– സംസ്ഥാന സർക്കാരുകളുടെ ജനവിരുദ്ധ നയങ്ങൾ തിരുത്തുക, സർക്കാർ ജീവനക്കാരുടെ ശമ്പള പരിഷ്കരണം നടപ്പാക്കുക, മാനദണ്ഡവിരുദ്ധ സ്ഥലംമാറ്റങ്ങൾ അവസാനിപ്പിക്കുക, തസ്തിക പുനഃക്രമീകരണം നടത്തി റേഷ്യോ പ്രൊമോഷൻ നടപ്പാക്കുക തുടങ്ങിയ ആവശ്യങ്ങൾ ഉയർത്തിയായിരുന്നു മാര്‍ച്ച്. സിഐടിയു ജില്ലാ സെക്രട്ടറി പി കെ പ്രേംനാഥ് മാര്‍ച്ച് ഉദ്ഘാടനം ചെയ്തു. കെജിഎൻഎ ജില്ലാ വൈസ് പ്രസിഡന്റ് എ ടി മഹിജ അധ്യക്ഷയായി. സംസ്ഥാന വൈസ് പ്രസിഡന്റ് കെ പി ഷീന, സംസ്ഥാന സെക്രട്ടറിയറ്റ് അംഗം എ ബിന്ദു എന്നിവർ സംസാരിച്ചു. ജില്ലാ സെക്രട്ടറി പി പ്രജിത്ത് സ്വാഗതവും ട്രഷറർ കെ കെ സജിത നന്ദിയും പറഞ്ഞു. മാര്‍ച്ചിൽ നൂറുകണക്കിന് നഴ്സുമാർ അണിനിരന്നു.