ജിഎസ്‌ടി പരിഷ്‌കരണത്തിൽ കേരളത്തിന്റെ നഷ്ടം പരിഹരിക്കണം: കെഎസ്‌എഫ്‌ഇഒയു സംസ്ഥാന സമ്മേളനം സമാപിച്ചു

കോട്ടയം : ജിഎസ്‌ടി പരിഷ്‌കരണത്തിലൂടെ കേരളത്തിന്‌ നഷ്ടമാകുന്ന നികുതി വരുമാനത്തിലെ കുറവ്‌ പരിഹരിക്കണമെന്ന്‌ കെഎസ്‌എഫ്‌ഇ ഓഫീസേഴ്സ്‌ യൂണിയൻ 18 –ാം സംസ്ഥാന സമ്മേളനം ആവശ്യപ്പെട്ടു. സർക്കാർ സ്ഥാപനങ്ങളും കന്പനികളും സർക്കാരിന്റെ ഉറപ്പിലെടുക്കുന്ന വായ്‌പകളെ സംസ്ഥാനത്തിന്റെ കടമെടുപ്പ്‌ പരിധിയിൽ ഉൾപ്പെടുത്തുന്ന കേന്ദ്ര സർക്കാർ നിലപാട്‌ തിരുത്തണം. അമേരിക്കൻ സാമ്രാജ്യത്വത്തിന്റെ നിരുപാധിക പിന്തുണയോടെ ഗാസയിൽ നടക്കുന്ന സയണിസ്‌റ്റ്‌ ഭീകരതയ്‌ക്കെതിരെ ലോകത്താകെ നടക്കുന്ന പ്രതിഷേധങ്ങളോട്‌ ഐക്യദാർഢ്യം പ്രഖ്യാപിച്ചു.

ജീവനക്കാരുടെ പെൻഷൻ പ്രായം 60 വയസായി ഉയർത്തുക, സ്ഥാപനം ഒരുലക്ഷം കോടി ടേൺ ഓവർ നേട്ടത്തിൽ നിൽക്കുന്പോൾ ജീവനക്കാരുടെ പേരിൽ അനാവശ്യമായി അച്ചടക്ക നടപടിയെടുക്കുന്നതും ശാഖകൾക്ക്‌ അമിതമായി ബിസിനസ്‌ ടാർജറ്റ്‌ അടിച്ചേൽപ്പിച്ച്‌ അത്‌ നേടിയെടുക്കാനായി ജീവനക്കാരിൽ അമിത സമ്മർദം ചെലുത്തുന്നതുമായ മാനേജ്‌മെന്റ്‌ നയങ്ങൾ തിരുത്തുക, 2014ന്‌ ശേഷം വന്ന ജീവനക്കാർക്ക്‌ പെൻഷൻ പദ്ധതി നടപ്പാക്കുക, പകുതിയിലധികം ജീവനക്കാർ സ്‌ത്രീകളായതിനാൽ അവരുടെ ക്ഷേമത്തിന്‌ പദ്ധതികൾ നടപ്പാക്കുക തുടങ്ങിയ ആവശ്യങ്ങളും വിവിധ പ്രമേയങ്ങളിൽ ഉന്നയിച്ചു. ഞായറാഴ്‌ച പൊതുചർച്ച നടന്നു. ജനറൽ സെക്രട്ടറി എസ്‌ അരുൺദാസ്‌ മറുപടി പറഞ്ഞു. എം വി സുധീർ ക്രഡൻഷ്യൽ റിപ്പോർട്ട്‌ അവതരിച്ചു. പുതിയ ജനറൽ സെക്രട്ടറി കെ ബി സൽ ജബീൽ നന്ദി പറഞ്ഞു.