കൊട്ടാരവും ബ്രിട്ടീഷുകാരുടെ ഗോസിപ്പ്‌ രേഖകളും

‘‘കൊച്ചു കോയിതമ്പുരാൻ കവടിയാർ കൊട്ടാരം വിട്ടിട്ട്‌ ഒരാഴ്‌ചയായി. ബ്രാഹ്മണനായ സംഗീതാധ്യാപകനെ പിരിച്ചുവിടണമെന്ന നിർദേശം ഭാര്യ ജൂനിയർ മഹാറാണി (സേതു പാർവതിഭായി) അംഗീകരിച്ചിട്ടില്ല. അവർ തമ്മിൽ ‘അമിതമായ അടുപ്പം’ ഉണ്ടെന്നാണ്‌ തമ്പുരാന്റെ ആരോപണം.’’‐ഏതെങ്കിലും മഞ്ഞപ്പത്രത്തിൽ നിന്നല്ല ഈ ഉദ്ധരണി; 1926 ജനുവരി ആദ്യപകുതിയിൽ തിരുവിതാംകൂറിലെ രാഷ്‌ട്രീയ സ്ഥിതിയെപ്പറ്റി മദ്രാസ്‌ സർക്കാരിൽ ഗവർണർ ജനറലിന്റെ പ്രതിനിധിയായ സി ഡബ്ല്യു ഇ കോട്ടന്റെ റിപ്പോർട്ടിൽ നിന്നാണ്‌. ഇന്ത്യാ ഗവൺമെന്റിന്റെ വിദേശ രാഷ്‌ട്രീയകാര്യ വകുപ്പുകളുടെ സെക്രട്ടറിയായ ജെ പി തോംസണ്‌ അയച്ചതാണ്‌ റിപ്പോർട്ട്‌.

സേതു പാർവതിഭായിയും ഭർത്താവ്‌ രവിവർമയും കടപ്പാട്‌ ഐവറി ത്രോൺ, മനു എസ്‌ പിള്ള

നാട്ടുരാജ്യങ്ങളെ കുടക്കീഴിൽ നിർത്തി രാജ്യം ഭരിച്ചിരുന്ന ബ്രിട്ടന്‌ ആ രാജ്യങ്ങളിലെ ഓരോ ചലനവും പ്രധാനമായിരുന്നു‐ അത്‌ തെരുവിലായാലും കൊട്ടാരത്തിലായാലും. അടക്കംപറച്ചിലുകൾക്കെല്ലാം അവർ ചെവി കൊടുത്തു. തലയിടാനുള്ള പഴുതുകൾ തിരഞ്ഞുകൊണ്ടേയിരുന്നു. പൊടിപ്പും മസാലയും ചേർന്ന കഥകളായി ഈ കുടുംബപ്രശ്‌നം പുറത്തും പടർന്നു.

തിരുവിതാംകൂർ കൊട്ടാരത്തിൽ പിന്മുറക്കാരായി ആൺസന്തതികൾ ഇല്ലാത്ത കാലമായിരുന്നു അത്‌. കുട്ടികൾ ഉണ്ടാകാനായി രണ്ട്‌ പെൺകുട്ടികളെ ദത്തെടുത്തു. രണ്ടുപേരും വിഖ്യാത ചിത്രകാരൻ രാജാരവിവർമയുടെ പേരക്കുട്ടികൾ. മൂത്തയാൾ സേതു ലക്ഷ്‌മിഭായി, ഇളയ ആൾ സേതു പാർവതിഭായി. ഇവർക്കുണ്ടാകുന്ന ആൺകുട്ടിക്കാവും രാജഭരണം എന്നാണ്‌ വ്യവസ്ഥ. ഹരിപ്പാട്‌ കൊട്ടാരത്തിലെ രാമവർമ (വലിയ കോയിതമ്പുരാൻ) യായിരുന്നു മുതിർന്ന റാണിയുടെ ഭർത്താവ്‌. കിളിമാനൂർ കൊട്ടാരത്തിലെ രവിവർമ (കൊച്ചു കോയിതമ്പുരാൻ)യെയാണ് ഇളയറാണി സേതു പാർവതിഭായി വിവാഹം ചെയ്‌തത്. ഇളയ റാണിയുടെ ഭർത്താവ്‌ കൊട്ടാരം വിട്ടതിനെപ്പറ്റിയാണ്‌ ബ്രിട്ടീഷ്‌ പ്രതിനിധിയുടെ റിപ്പോർട്ട്‌.

മക്കളോട്‌ വലിയ സ്‌നേഹമുള്ളയാളായതിനാൽ അധികം വൈകാതെ കൊച്ചു കോയിതമ്പുരാൻ തിരികെ വരും എന്ന പ്രതീക്ഷ സി ഡബ്ല്യു ഇ കോട്ടന്റെ കത്തിലുണ്ട്‌. ഭർത്താവിന്റെ ആരോഗ്യനിലയെയും മനോനിലയെയും പറ്റി വിവരങ്ങൾ ശേഖരിക്കാൻ ഒരു മനോരോഗ ചികിത്സകനായ ഡോക്ടറെ റാണി കൊട്ടാരത്തിൽ നിയോഗിച്ചിട്ടുണ്ടെന്ന വിവരവുമുണ്ട്‌.

ഈ കാലം തിരുവിതാംകൂറിൽ റീജന്റ്‌ ഭരണം ആയിരുന്നു. ഭരണത്തിലിരുന്ന മൂലം നാളുകാരനായ രാജാവ്‌ 1924‐ൽ മരിച്ചു. പിൻഗാമിയാകാൻ ആണായി ഉണ്ടായിരുന്നത്‌ ദത്തെടുത്തവരിൽ ഇളയ ആളായ സേതു പാർവതിഭായിയുടെ മകൻ ചിത്തിരതിരുനാൾ ബാലരാമവർമയായിരുന്നു. സീനിയർ റാണിക്ക്‌ അന്ന്‌ മക്കളുണ്ടായിരുന്നില്ല. എന്നാൽ ചിത്തിര തിരുനാളിന് 12 വയസ്സേ ഉണ്ടായിരുന്നുള്ളൂ. രാജാവാകാൻ പ്രായപൂർത്തിയാകണം. അതുവരെ റീജൻസി വേണ്ടിവന്നു. നിയുക്ത രാജാവിന്റെ അമ്മയെ അല്ല കുടുംബനാഥയും മൂത്തയാളുമായ സേതു ലക്ഷ്മിഭായിയെയാണ്‌ ബ്രിട്ടീഷുകാർ റീജന്റാക്കിയത്‌. ഇതോടെ കൊട്ടാരത്തിൽ ഉൾപ്പോര്‌ തുടങ്ങി. അധികാരകേന്ദ്രങ്ങൾ രണ്ടായി. സംഘർഷം പതിവായി. ഭർത്താക്കന്മാർക്ക്‌ ഭരണത്തിൽ ഔദ്യോഗികമായ പങ്കൊന്നുമില്ല. പക്ഷേ അവരും വിവാദങ്ങളിൽ പെട്ടു. അഴിമതി ആരോപണമാണ്‌ വലിയ കോയിതമ്പുരാനെതിരെ ഉയർന്നതെങ്കിൽ ചെറിയ കോയിതമ്പുരാനും റാണിയുമായുള്ള തർക്കങ്ങളാണ്‌ വാർത്തയായത്‌.

കോയിത്തമ്പുരാൻ കൊട്ടാരം വിട്ടതിനെപ്പറ്റി സി ഡബ്ലിയു ഇ കോട്ടൻ അയച്ച റിപ്പോർട്ട്‌

ബ്രിട്ടീഷ്‌ ചാരക്കണ്ണുകൾ ‘പൈങ്കിളിക്കഥകൾ’ റിപ്പോർട്ടാക്കിക്കൊണ്ടിരുന്നു. റാണിമാരുടെ ജീവിതത്തിലെ സ്വകാര്യത പോലും അവർ ചർച്ചചെയ്‌തു. ഇതിനിടെ നിയുക്ത രാജാവിന്റെ രക്ഷാകർതൃപദവിയിൽ നിന്നു തന്നെ നീക്കം ചെയ്യാൻ പ്രശ്‌നം ഇടയാക്കിയേക്കും എന്ന്‌ സേതു പാർവതിഭായി ഭയന്നു. അതുകൊണ്ട്‌ അവർ ഒത്തുതീർപ്പിന്‌ തയ്യാറായതായി സി ഡബ്ല്യു ഇ കോട്ടൻ എഴുതുന്നുണ്ട്‌. ഫെബ്രുവരി 18‐ന്റെ ഡി ഒ ലെറ്റർ നമ്പർ 3 എഫ്‌ ആർ‐26ൽ ഇതു കാണാം.

പാർവതിഭായിയുടെ നിർദേശപ്രകാരം ദിവാൻ എം ഇ വാട്‌സ്‌ ഒത്തുതീർപ്പിനായി കൊച്ചു കോയിതമ്പുരാനെ കണ്ടു. എന്നാൽ ഭാര്യയുടെ രഹസ്യകാമുകന്മാരായി അദ്ദേഹം കരുതുന്നവരുടെ പട്ടികയുമായാണ്‌ തമ്പുരാൻ പ്രതികരിച്ചത്‌. പേരുകാരിൽ മൈസൂരിലെ യുവരാജാവും കൊല്ലങ്കോട്‌ രാജയും ഉണ്ടായിരുന്നതായി കോട്ടൻ എഴുതുന്നു. ഏതായാലും തൽക്കാലം ഒത്തുതീർപ്പായി. സംഗീതാധ്യാപകൻ ഇനി വരില്ല. ഭർത്താവിന്റെ ‘ഭ്രാന്ത്‌’ നിർണയിക്കാൻ കൊണ്ടുവന്ന ഡോക്‌ടറെ ഭ്രാന്താശുപത്രിയിലേക്ക്‌‌ മാറ്റി. റാണിയുടെ വീട്ടുകാർ കൊട്ടാരത്തിൽനിന്ന്‌ നാട്ടിലേക്ക്‌ പോകും‐ ഇതൊക്കെയായിരുന്നു വ്യവസ്ഥകൾ. കൊച്ചുകോയി തമ്പുരാൻ തിരികെയെത്തി.

സേതു പാർവതിഭായിയും ഭർത്താവുമായി തർക്കങ്ങൾ തീർന്നതായി പറയുന്ന കത്ത്‌

ഈ കൊട്ടാരത്തർക്കങ്ങളുടെ ഭിന്നവശങ്ങൾ മനു എസ്‌ പിള്ള ‘ഐവറി ത്രോൺ’ എന്ന കൃതിയിൽ വിശദമാക്കുന്നുണ്ട്‌. സ്വതന്ത്ര ചിന്താഗതിക്കാരിയും വിദ്യാസമ്പന്നയുമായ ജൂനിയർ മഹാറാണി വളരെ ബുദ്ധിമതിയും ഊർജസ്വലയും ഏറെ മോഹങ്ങൾ ഉള്ളയാളും ആയിരുന്നുവെന്ന്‌ അദ്ദേഹം എഴുതുന്നുണ്ട്‌.

ബ്രിട്ടീഷുകാർ ജൂനിയർ റാണിയെ പിന്തുടർന്നുള്ള ഒളിഞ്ഞുനോട്ടം ഒരിക്കലും അവസാനിപ്പിച്ചിരുന്നില്ല. 1932‐ൽ റാണി നടത്തിയ യൂറോപ്യൻ പര്യടനത്തെപ്പറ്റിയുള്ള ഒരു രഹസ്യറിപ്പോർട്ടിൽ (File No. 484-‐P) അവരുടെ വ്യക്തിജീവിതത്തെപ്പറ്റി പരാമർശങ്ങൾ കാണാം. റാണിക്കൊപ്പം പോയിരുന്ന കേണൽ അമീർ അഹമ്മദിന്റെ റിപ്പോർട്ടാണ്‌ ഫയലിൽ. റാണി ഒരു ജർമൻ യുവാവുമായി ‘അമിത’മായി ബന്ധം സ്ഥാപിക്കുകയും ചുറ്റിക്കറങ്ങുകയും അദ്ദേഹത്തിന്റെ താമസസ്ഥലത്തു പോകുകയും ചെയ്‌തതായി കത്തിൽ പറയുന്നു. സദാചാര പൊലീസിങ് സ്വഭാവത്തിലുള്ള ഇത്തരം പരാമർശങ്ങൾ പിന്നെയും കാണാം.

ഒരുവശത്ത്‌ ജനങ്ങളോട്‌ മറുപടി പറയേണ്ടാത്ത രാജഭരണത്തിന്റെ അമിതാധികാര പ്രയോഗവും മറുവശത്ത്‌ രാജകുടുംബവഴക്കുകൾ പോലും മുതലെടുത്ത്‌ ബ്രിട്ടീഷുകാർ നടത്തിയ രഹസ്യനീക്കങ്ങളും വെളിപ്പെടുത്തുന്നതാണ്‌ ഈ കാലത്തെ രേഖകൾ പലതും.