"എനിക്ക് പറ്റൂല വാവേ, എന്നെ മറക്കരുത്" ഷാരോൺ അവസാന വാക്കിലും അവളെ വിശ്വസിച്ചു

ആശുപത്രിയിലാണ്. തീരെ സുഖമില്ല. എനിക്ക് പറ്റൂല വാവേ....എന്നെ മറക്കരുത് എന്നാണ് ഷാരോൺ രാജ് ഗ്രീഷ്മയ്ക്ക് അവസാനമായി അയച്ച സന്ദേശം. അതിന് നൽകിയ മറുപടി സമർത്ഥമായാണ്. ഒരു സ്നേഹ ചിഹ്നവും. കൂടെ "ഞാനും അങ്ങിനെ തന്നെ പറയട്ടെ" എന്ന വാക്കുകളും മാത്രം.

ഷാരോണിന്റെ ഇഞ്ച് ഇഞ്ചായുള്ള മരണത്തിന് തൊട്ടു മുൻപുള്ള ദിവസങ്ങളിലും ഗ്രീഷ്മ നിഷ്കളങ്കത അഭിനയിക്കയായിരുന്നു. പ്രിയപ്പെട്ടവൾ നൽകിയ ജൂസിലും കഷായത്തിലും അവൻ ചതി മണത്തില്ല. അതേ കുറിച്ച് ചോദിക്കുമ്പോൾ കടയിൽ നിന്നും വല്ല വിഷവും കലർന്നോ എന്ന അർത്ഥത്തിൽ മാത്രമാണ് ഷാരോൺ അന്വേഷിച്ചത്.

ഇരുവരുമായുള്ള ചാറ്റിൽ, സോറി ഇച്ചായാ ഇത്രേം പ്രതീക്ഷിച്ചില്ല, ഞാനും കഷായം കുടിച്ചു. എനിക്കും ഛർദ്ദിയുണ്ടായി എന്നാണ് പറയുന്നത്.

അമ്മ കല്യാണത്തിന് പോകുമെന്നും പിറ്റേന്ന് രാവിലെ 10.30 ന് വീട്ടിൽ എത്തണമെന്നും പറഞ്ഞ് 2022 ഒക്ടോബർ 13 നാണ് ഗ്രീഷ്മ ഷാരോണിനെ വീട്ടിലേക്ക് വിളിപ്പിച്ചത്.

14 ന് രാവിലെ ചങ്ങാതിക്കൊപ്പം ഷാരോൺ എത്തി. അന്നാണ് വിഷം കലർത്തിയ കഷായം നൽകുന്നത്. നരകയാതനകൾക്കൊടുവിൽ ഒക്ടോബർ 25 ന് ഷാരോൺ മരിച്ചു.

ഗ്രീഷ്മ കേസിൽ അറസ്റ്റിലാവുമ്പോൾ എം എ ഇംഗ്ലീഷിൽ മികച്ച റാങ്ക് നേടിയ ഗ്രാമത്തിലെ പെൺകുട്ടിയെ അഭിനന്ദിച്ച് നാട്ടുകാർ സ്ഥാപിച്ച ബോർഡുകൾ രാമവർമ്മൻ ചിറ പ്രദേശത്ത് തൂങ്ങുന്നുണ്ടായിരുന്നു. അന്ന് നെയ്യൂർ ക്രിസ്ത്യൻ കോളേജിലെ വിദ്യാർഥിയായിരുന്നു ഷാരോൺ.

കോളേജിൽ വെച്ച് ജൂസ് ചാലഞ്ച് എന്ന പേരിൽ വേദനസംഹാരി കലക്കി നൽകി സാവധാനം കൊലപ്പെടുത്താനായിരുന്നു ആദ്യത്തെ ശ്രമം. കയ്പ് കാരണം തുപ്പിക്കളഞ്ഞതാണ് അന്ന് ഷാരോണിന്റെ ജീവൻ നീട്ടിക്കിട്ടുന്നത്. അപ്പോഴും അവൻ പ്രിയപ്പെട്ടവളെ അവിശ്വസിച്ചില്ല.

യാത്രയ്ക്കിടയിലാണ് അവർ പരിചയപ്പെടുന്നത്. പിന്നീട് ഇരുവരുടെയും യാത്ര ബൈക്കിലായി. മികച്ച കല്യാണ ആലോചനകൾ വന്നു തുടങ്ങിയതോടെ ഗ്രീഷ്മ ചുവട് മാറി.

ഷാരോൺ ഇരുവരും തമ്മിലുണ്ടായ ബന്ധവും ആ സമയത്തെ ചിത്രങ്ങളും മറ്റും ഉപയോഗിച്ച് ബ്ലാക് മെയിൽ ചെയ്യുകയായിരുന്നു എന്നായിരുന്നു പ്രതിഭാഗത്തിന്റെ കോടതിയിലെ വാദം.

തീരെ അവശനായപ്പോൾ, അവസാന ചാറ്റിൽ ഷാരോൺ പറയുന്നുണ്ട്. എനിക്ക് ചാറ്റ് ചെയ്യാൻ പറ്റൂല വാവേ....

അതിലും ഗ്രീഷ്മ സമർത്ഥമായി ഒഴിഞ്ഞ് യാത്രമാൊഴിയും നൽകുന്നു.

ഇച്ചായൻ ആൾ അടുത്തുണ്ടെന്ന് പറഞ്ഞോണ്ടാ ഞാൻ മെസേജ് ചെയ്യാത്തത്. ശരി ശരി

ഇച്ചായാ റെസ്റ്റ് എടുക്ക്......... എന്നിങ്ങനെയാണ് വാക്കുകൾ