ജയശ്രീ കളത്തിൽ, മിനി ചന്ദ്രൻ എന്നിവര്‍ക്ക് വിവര്‍ത്തനത്തിനുള്ള ന്യൂ ഇന്ത്യ ഫൗണ്ടേഷൻ ഫെലോഷിപ്പ്

ന്യൂ ഇന്ത്യ ഫൗണ്ടേഷന്റെ 2026-ലെ ട്രാൻസ്‌ലേഷൻ ഫെലോഷിപ്പുകൾ പ്രഖ്യാപിച്ചു. ജയശ്രീ കളത്തിൽ, മിനി ചന്ദ്രൻ, മുരളി രംഗനാഥൻ, ഷെഫാലി ഝാ എന്നിവരാണ് ഈ വർഷത്തെ ഫെലോഷിപ്പിന് അർഹരായത്. മലയാളം, ഹിന്ദി, ഉർദു ഭാഷകളിലെ ശ്രദ്ധേയമായ സാഹിത്യേതര കൃതികൾ ഇംഗ്ലീഷിലേക്ക് വിവർത്തനം ചെയ്യുന്നതിനാണ് ഇവര്‍ ഫെലോഷിപ്പിന് അര്‍ഹരായത്.

ആറ് മാസത്തെ കാലാവധിയുള്ള ഫെലോഷിപ്പിൽ ഓരോ ജേതാവിനും 6 ലക്ഷം രൂപ വീതമാണ് ഗ്രാന്റായി ലഭിക്കുക. അസമീസ്, ബംഗ്ലാ, ഗുജറാത്തി, ഹിന്ദി, കന്നഡ, മറാഠി, മലയാളം, ഒഡിയ, തമിഴ്, ഉർദു എന്നീ 10 ഇന്ത്യൻ ഭാഷകളിലെ ഇതര സാഹിത്യ കൃതികളുടെ വിവർത്തനമാണ് ഈ ഫെലോഷിപ്പിനായി പരിഗണിക്കുന്നത്.

ജയശ്രീ കളത്തിൽ- കൃതി- ആദിമമക്കൾ (അടിമകളുടെ മക്കൾ)

• യഥാർത്ഥ രചയിതാവ്: സി.കെ. ജാനു
  
  ആദിവാസി ഭൂസമര നേതാവ് സി കെ ജാനുവിന്റെ ആത്മകഥയാണിത്. കേരളത്തിന്റെ ഏറെ പ്രശംസിക്കപ്പെട്ട വികസന മാതൃകകളിൽ നിന്നും ചരിത്രരേഖകളിൽ നിന്നും വിട്ടുപോയ ആദിവാസി ജനതയുടെ രാഷ്ട്രീയ പോരാട്ടങ്ങളുടെ ചരിത്രമാണ് ഈ കൃതിയിലൂടെ അവർ വെളിച്ചത്തുകൊണ്ടുവരുന്നത്.
  

മിനി ചന്ദ്രൻ- കൃതി: ഒളിവിലെ ഓർമ്മകൾ

• യഥാർത്ഥ രചയിതാവ്: തോപ്പിൽ ഭാസി
  
  നിങ്ങളെന്നെ കമ്മ്യൂണിസ്റ്റാക്കി എന്ന നാടകത്തിലൂടെ പ്രശസ്തനായ മലയാള നാടകകൃത്ത് തോപ്പിൽ ഭാസിയുടെ വിഖ്യാത സ്മരണകളാണിത്. 1948 മുതൽ 1953 വരെയുള്ള കേവലം അഞ്ച് വർഷത്തെ കാലയളവാണ് ഈ പുസ്തകം പ്രതിപാദിക്കുന്നതെങ്കിലും, മലയാളത്തിലെ ഏറ്റവും ജനപ്രിയമായ ആത്മകഥകളിലൊന്നാണിത്.
  

മുരളി രംഗനാഥൻ

കൃതി- തിബത് മേം സവ്വാ വർഷ (Tibet Mein Savva Varsh - ഹിന്ദി)

• യഥാർത്ഥ രചയിതാവ്: രാഹുൽ സാംകൃത്യായൻ
  
  1934-ൽ ആദ്യമായി പ്രസിദ്ധീകരിച്ച ഈ പുസ്തകം രാഹുൽ സാംകൃത്യായൻ 1928 ഡിസംബർ മുതൽ 1930 ജൂൺ വരെ ബുദ്ധനെ തേടി നടത്തിയ യാത്രകളുടെ വിവരണമാണ്. കൊളംബോയിൽ ആരംഭിച്ച് അവിടെത്തന്നെ അവസാനിച്ച ഈ യാത്രയിൽ, വിദേശികൾക്ക് വിലക്കുണ്ടായിരുന്ന സമയത്ത് ഇന്ത്യ, നേപ്പാൾ, തിബറ്റ് എന്നിവടങ്ങളിലൂടെ അദ്ദേഹം രഹസ്യമായി സഞ്ചരിച്ചു. നേപ്പാൾ-തിബറ്റ്, തിബറ്റ്-ചൈന തർക്കങ്ങളെക്കുറിച്ചും അക്കാലത്തെ കൊളോണിയൽ ഭരണകൂടത്തിന്റെ നിലപാടുകളെക്കുറിച്ചും കൃത്യമായ കാഴ്ചപ്പാട് ഈ കൃതി പങ്കുവെക്കുന്നു.
  

ഷെഫാലി ഝാ- കൃതി: ദോ മുൽക്, ഏക് കഹാനി (Do Mulk, Ek Kahani - ഉർദു)

• യഥാർത്ഥ രചയിതാവ്: ഇബ്രാഹിം ഹുസൈൻ ജാലിസ്
  
  കൊളോണിയൽ ഭരണത്തിന് ശേഷമുള്ള ദക്ഷിണേഷ്യൻ രാഷ്ട്രീയ പശ്ചാത്തലത്തെക്കുറിച്ചുള്ള ഒരു ജേണലിസ്റ്റിക് വിവരണമാണിത്. ഹൈദരാബാദ് സംസ്ഥാനത്തിന്റെ അവസാന വർഷത്തെ (1947-48) അത്യപൂർവ്വമായ ചരിത്രമാണ് പുരോഗമന എഴുത്തുകാരനായ ജാലിസ് (1923-1977) ഇതിൽ വിവരിക്കുന്നത്. ഇത്തേഹാദുൽ മുസ്ലിമീൻ (Ittehad-ul-Muslimin) പ്രസ്ഥാനത്തിലെ തന്റെ ഹ്രസ്വവും തീവ്രവുമായ പങ്കാളിത്തത്തെക്കുറിച്ചും ഹൈദരാബാദ് സംസ്ഥാനത്തിന്റെ തകർച്ചയെക്കുറിച്ചും ഒരു യുവ ഉർദു എഴുത്തുകാരന്റെയും പത്രപ്രവർത്തകന്റെയും വീക്ഷണകോണിൽ നിന്ന് അദ്ദേഹം ഇതിൽ സംസാരിക്കുന്നു.