തമിഴ്നാട്ടിലെ തഞ്ചാവൂരിനടുത്തുള്ള കുംഭകോണത്ത് ജനിച്ച്, കുട്ടനാട്ടിലെ മങ്കൊമ്പിൽ വളർന്ന് വിശ്വത്തോളം ഉയർന്ന വിസ്മയജീവിതത്തിന് ഇന്ന് നൂറ്റാണ്ട് തികയുന്നു. ഭിക്ഷാപാത്രം നീട്ടിയ കൈകളിൽ ഭക്ഷണം എത്തിച്ച, ഇന്ത്യയെ നിവർന്നു നിൽക്കാൻ പ്രേരിപ്പിച്ച നൂറ്റാണ്ടിന്റെ മഹാപ്രതിഭ. ഇന്ത്യൻ ഹരിതവിപ്ലവത്തിന്റെ പ്രയോക്താവ് ഡോ. എം എസ് സ്വാമിനാഥൻ എന്ന മങ്കൊമ്പ് സാംബശിവൻ സ്വാമിനാഥന്റെ ജന്മശതാബ്ദിയാണ് വ്യാഴാഴ്‌ച. ഇന്ത്യയുടെ പട്ടിണി മാറ്റാൻ യത്നിച്ച ധിഷണാശാലിയായ സ്വാമിനാഥന്റെ സംഭാവനകളുടെ കനം രാജ്യത്തിന്റെ നിലനിൽപ്പ് തന്നെയാണ്. 1925 ആഗസ്ത് 7 ന് തമിഴ്നാട്ടിലെ കുംഭകോണത്ത് മലയാളി വേരുകളുള്ള കുടുംബത്തിൽ ജനിച്ച് 2023 സെപ്തംബർ 28ന് അന്തരിച്ച ആ മഹാപ്രതിഭയുടെ ജീവിതത്തിന്റെ സിംഹഭാഗവും ചെലവഴിച്ചത് കോടാനുകോടി മനുഷ്യരുടെ പട്ടിണി മാറ്റാനുള്ള പരിഹാരം തേടുന്നതിനായിരുന്നു.

ഔദ്യോഗികമായും അല്ലാതെയും നിരവധി പദവികൾ സ്വാമിനാഥൻ വഹിച്ചിട്ടുണ്ട്. ഇന്ത്യൻ കാർഷിക ഗവേഷണ കൗൺസിൽ മേധാവി, അന്തർദേശീയ നെല്ലുഗവേഷണ കേന്ദ്രം മേധാവി, അന്തർദേശീയ പരിസ്ഥിതി സംരക്ഷണ യൂണിയൻ മേധാവി, ആസൂത്രണ കമീഷൻ അംഗം, കൃഷി വകുപ്പ് പ്രിൻസിപ്പൽ സെക്രട്ടറി തുടങ്ങി അനേകം പദവികളുണ്ട്. പക്ഷേ, അദ്ദേഹത്തെ കേവലം ഉദ്യോഗസ്ഥവൃന്ദത്തിന്റെ അതിരുകൾക്കുള്ളിൽ തളച്ചിടാനാകില്ല. ആധുനിക ശാസ്ത്രത്തിന്റെ മുന്നേറ്റപടവുകളിൽ ആഴത്തിൽ അടയാളപ്പെടുത്തിയ പേരുകളിലൊന്നാണത്. മനുഷ്യപുരോഗതിയുടെ സമാനതകളില്ലാത്ത ഗതിവേഗത്തിന് ഒട്ടും ചെറുതല്ലാത്ത സംഭാവനയാണ് അദ്ദേഹം നൽകിയത്. വികസിത രാജ്യങ്ങളിലും വികസ്വര രാജ്യങ്ങളിലും ഒരുപോലെ മാറ്റം കൊണ്ടുവന്ന ഒട്ടനേകം ഗവേഷണങ്ങൾ. അത്യുൽപ്പാദനശേഷിയുള്ള വിത്തിനങ്ങൾ. ജീൻ ബാങ്ക് പോലുള്ള നൂതനസംരംഭങ്ങൾ; അങ്ങനെ എണ്ണിയാലൊടുങ്ങാത്ത സംഭാവനകൾ. പക്ഷേ, ശാസ്ത്രഗവേഷണത്തിന്റെ ഉന്നത മണ്ഡലങ്ങളിൽ മാത്രം ഒതുങ്ങാനാകുന്ന പേരാണോ സ്വാമിനാഥൻ. പരിസ്ഥിതി സംരക്ഷണത്തിൽ ഒരുപക്ഷേ, ഇനിയും തിരിച്ചറിഞ്ഞിട്ടില്ലാത്ത സംഭാവനകൾ. കുട്ടനാടിന്റെ പാരിസ്ഥിതിക സന്തുലിതാവസ്ഥയ്‌ക്ക് നിർണായകമായ ഇടപെടൽ. പക്ഷേ, ഒരു കേവല പരിസ്ഥിതിവാദിയുമല്ല സ്വാമിനാഥൻ. ചുരുക്കിപ്പറഞ്ഞാൽ കൃത്യമായി നിർവചിക്കാൻ സാധ്യമല്ലാത്ത പ്രതിഭ.

യുദ്ധവും 
ഉരുളക്കിഴങ്ങും

ഒരുപക്ഷേ, വിരോധാഭാസമെങ്കിലും രണ്ടാം ലോകയുദ്ധമാണ് സ്വാമിനാഥനിലെ പ്രതിഭയ്ക്ക് വഴി തുറന്നതെന്നത് അവിശ്വസനീയമാണ്. 1940 ൽ തിരുവനന്തപുരത്തെ മഹാരാജാസ് കോളേജിലെ (ഇന്നത്തെ യൂണിവേഴ്സിറ്റി കോളേജ്) ബിരുദപഠനത്തിനും കോയമ്പത്തൂർ കാർഷിക കോളേജിലെ ഉപരിപഠനത്തിനുംശേഷം സിവിൽ സർവീസ് നേടി. ബാല്യത്തിൽ തഞ്ചാവൂരിലെയും കുട്ടനാട്ടിലെയും എണ്ണമറ്റ വയലേലകളിൽ പൊന്നുവിളയിക്കുന്നവരുടെ കൈകളിൽ വിശപ്പ് മാത്രമാണ് സമ്പാദ്യമെന്ന് തിരിച്ചറിഞ്ഞ അദ്ദേഹത്തിന് തന്റെ വഴി സിവിൽ സർവീസല്ലെന്ന ബോധ്യമുണ്ടായിരുന്നു.

അങ്ങനെ 1947-ൽ ഇന്ത്യൻ കാർഷിക ഗവേഷണ കേന്ദ്രത്തിൽ (Indian Agricultural Research Institute) ചേർന്നു. പിന്നീട് യുനെസ്കോ ഫെലോഷിപ്പോടുകൂടി ഗവേഷണത്തിനായി നെതർലൻഡ്‌സിൽ എത്തി. അവിടെ ഇൻസ്റ്റിറ്റ്യൂട്ട് ഓഫ് ജനിറ്റിക്‌സിലെ വാഗെനിംഗൻ അഗ്രികൾച്ചറൽ യൂണിവേഴ്‌സിറ്റിയിൽ ഗവേഷണം. രണ്ടാം ലോകയുദ്ധസമയത്ത് ഉരുളക്കിഴങ്ങിന്റെ ആവശ്യം വല്ലാതെ വർധിച്ചു. എന്നാൽ അതിനനുസരിച്ച് ഉൽപ്പാദിപ്പിക്കാനുള്ള കെൽപ്പ് പാരമ്പര്യ കൃഷിരീതിക്കില്ലായിരുന്നു. അങ്ങനെയാണ് ശീതകാലാവസ്ഥയ്ക്ക് പറ്റിയ വിത്തുകൾ സ്വാമിനാഥൻ വികസിപ്പിക്കുന്നത്. 1950-ൽ കേംബ്രിഡ്ജ് യൂണിവേഴ്സിറ്റിയിൽ സ്കൂൾ ഓഫ് അഗ്രികൾച്ചറിൽ ഗവേഷണ പഠനം ആരംഭിച്ചു. 1952-ൽ പിഎച്ച്ഡി നേടി. നൊബേൽ ജേതാവായ ജോഷ്വാ ലദർബെർക്ക് ഫാക്കൽറ്റി സ്ഥാനം വാഗ്ദാനം ചെയ്തെങ്കിലും സ്വാമിനാഥൻ നിരസിച്ചു. 1954ൽ ഇന്ത്യയിലെത്തിയ അദ്ദേഹം ഒഡിഷയിലെ ഘട്ടക്കിലെ കേന്ദ്ര നെല്ലുഗവേഷണ കേന്ദ്രത്തിൽ അസിസ്റ്റന്റ് ബോട്ടണിസ്റ്റായി. അതേ വർഷം തന്നെ ഡൽഹിയിലെ ഇന്ത്യൻ കാർഷിക ഗവേഷണ കേന്ദ്രത്തിലും ജോലിക്ക് ചേർന്നു. സ്വാതന്ത്ര്യാനന്തരം പട്ടിണിയും ദാരിദ്ര്യവും വരൾച്ചയും ഇന്ത്യയെ വീർപ്പുമുട്ടിച്ചു. രാജ്യത്തെ എഴുപത് ശതമാനംപേരും കൃഷി ചെയ്യുമ്പോഴും പട്ടിണി തുടരുന്നതും ഭക്ഷ്യധാന്യങ്ങൾ ഇറക്കുമതി ചെയ്യേണ്ടിവരുന്നതും സ്വാമിനാഥനെ വിഷമിപ്പിച്ചു. തുടർന്ന് അമേരിക്കൻ ശാസ്ത്രജ്ഞനായ നോർമൻ ബോർലേഗുമായി സഹകരിച്ച് ഈ പ്രശ്നത്തിന് പരിഹാരം കാണാനുള്ള ഗവേഷണം ആരംഭിച്ചു. അങ്ങനെയാണ് മെക്സിക്കൻ കുള്ളൻ ഗോതമ്പുവിത്തിൽനിന്ന് പുതിയ വിത്തുണ്ടാക്കുന്നത്. ഇത് ഉയർന്ന വിളയും രോഗപ്രതിരോധശേഷിയുമുള്ളതായിരുന്നു. ക്രമേണ ഇത് ഏഷ്യയിലേക്കുമെത്തി. 1960കളോടെ ഇന്ത്യയിലും ഹരിതവിപ്ലവം യാഥാർഥ്യമായി. നല്ല വിത്തുണ്ടായിട്ട് മാത്രം കാര്യമില്ല; അത് കൃഷിചെയ്യാനുള്ള ഭൗതികസാഹചര്യവും വേണമെന്ന ബോധ്യം അദ്ദേഹത്തിനുണ്ടായിരുന്നു.

ഹരിതവിപ്ലവ കാലത്ത് ഇടതുപക്ഷം ഉയർത്തിയ ക്രിയാത്മകമായ വിമർശമായിരുന്നു രാജ്യത്തെ ഭൂപരിഷ്കരണം ഇല്ലാതെ ഹരിതവിപ്ലവംകൊണ്ട് ഫലമില്ല എന്നത്. വിത്തുണ്ടായാലും ഭൗതിക സാഹചര്യമുണ്ടായാലും ഭൂമിക്കുമേൽ അവകാശമില്ലാതെ കർഷകർക്കും കർഷക തൊഴിലാളികൾക്കും പുരോഗതിയുണ്ടാകില്ല. ലാഭവും സമ്പത്തും ജന്മി- മുതലാളിത്ത മേധാവിത്വത്തിൽ ചെറുകിട കർഷകർക്കും തൊഴിലാളികൾക്കും സ്വപ്നം കാണാനാകില്ലല്ലോ. ഈ വസ്തുനിഷ്ഠമായ വിമർശത്തോട് പൂർണമായ യോജിപ്പുള്ള ആളായിരുന്ന സ്വാമിനാഥൻ. 2006 ൽ സ്വാമിനാഥൻ കമീഷൻ രൂപീകരിച്ചപ്പോഴും അദ്ദേഹം ഇത്‌ ഉള്ളിൽ കരുതി. അത് പ്രായോഗികമാക്കാതെ ഹരിതവിപ്ലവം പൂർണമാകില്ല എന്ന് റിപ്പോർട്ടിൽ അദ്ദേഹം വ്യക്തമാക്കി.

ഇടതുപക്ഷവും സ്വാമിനാഥൻ കമീഷനും

ഇടതുപക്ഷ പിന്തുണയുള്ള ഒന്നാം യുപിഎ സർക്കാരിന്റെ കാലത്താണ് ഡോ. എം എസ് സ്വാമിനാഥൻ അധ്യക്ഷനായ ദേശീയ കാർഷിക കമീഷൻ രൂപം കൊള്ളുന്നത്. ഇന്ത്യയുടെ കാർഷിക സുസ്ഥിരതയും തൊഴിലാളികളുടെ ക്ഷേമവും ഭൂപരിഷ്‌കരണ നടപടികളും ലക്ഷ്യം വച്ചുള്ള ഇടതുപക്ഷത്തിന്റെ നിർദേശത്തിന്റെ ഭാഗമായാണ് കമീഷൻ രൂപീകരിച്ചത്. ഒട്ടനവധി ഗുണപരമായ നിർദേശങ്ങളാണ് സ്വാമിനാഥൻ കമീഷൻ സർക്കാരിന് നൽകിയത്. ന്യായമായ താങ്ങുവില എന്ന ആശയം കർഷകർ അനുഭവിക്കുന്ന വലിയ ദുരിതങ്ങളിൽ കൈത്താങ്ങായിരുന്നു. പിന്നീടു വന്ന നരേന്ദ്രമോദി സർക്കാർ കമീഷൻ റിപ്പോർട്ട് നടപ്പാക്കും എന്ന വാഗ്ദാനം നൽകിയെങ്കിലും കർഷക മാരണ നിയമങ്ങൾ ഉൾപ്പെടെ നടപ്പിലാക്കി ഇന്ത്യൻ കാർഷിക മേഖലയെ കുത്തകകൾക്ക് തീറെഴുതി കൊടുക്കാനും കർഷകരെ കൊല്ലാക്കൊല ചെയ്യാനുമാണ് ശ്രമിച്ചത്.

കുട്ടനാടിന്റെ മങ്കൊമ്പുകാരൻ

ലോകത്തിന് ഇന്ത്യ നൽകിയ വലിയ സംഭാവനകളിലൊന്നാണ് ഡോ.എം എസ് സ്വാമിനാഥൻ. അതിൽ കേരളത്തിനും ഉയർന്ന അഭിമാനമുണ്ട്. വിശ്വപൗരനായിരിക്കുമ്പോഴും കുട്ടനാട്ടിലെ ചേറിൽ കാലുറപ്പിച്ച മങ്കൊമ്പുകാരനായിരുന്നു സ്വാമിനാഥൻ. എല്ലാക്കാലവും എല്ലാ അർഥത്തിലും അദ്ദേഹം കുട്ടനാട്ടുകാരനായിരുന്നു. അതിനാലാണ് കുട്ടനാട് പാക്കേജിന് രൂപം നൽകാൻ അദ്ദേഹം തന്നെ എത്തിയത്. 2006 ലെ വി എസ് അച്യുതാനന്ദൻ സർക്കാരിന്റെ കാലത്ത് കുട്ടനാട് പാക്കേജ് നടപ്പിലാക്കിയെങ്കിലും കേന്ദ്ര സർക്കാരുകളുടെയും തുടർന്ന് വന്ന ഉമ്മൻചാണ്ടി സർക്കാരിന്റെയും മെല്ലപ്പോക്ക്‌ പാക്കേജിനെ തളർത്തി. പിന്നീട് പിണറായി വിജയൻ സർക്കാർ അധികാരമേറ്റശേഷമാണ് കുട്ടനാട് പാക്കേജിന് ജീവൻ വച്ചത്.

ഭക്ഷ്യധാന്യ ഇറക്കുമതി ഇന്ത്യക്ക് വൻ വെല്ലുവിളിയായിരുന്നു. അതിനാൽ തന്നെ മറ്റു രാജ്യങ്ങൾക്ക് ഇന്ത്യയെ വരുതിയിലാക്കാനുള്ള എളുപ്പമാർഗവും ഭക്ഷ്യവസ്തുക്കളുടെ മേലുള്ള വിലപേശലായിരുന്നു. ഈ കൊടിയ വെല്ലുവിളിയെ ആണ് ഹരിതവിപ്ലവത്തിലൂടെ ഇന്ത്യ മറികടന്നത്. എന്നാൽ പിന്നീട് ആഗോളവൽക്കരണ, ഉദാരവാദനയങ്ങളുടെ ഭാഗമായി ഈ രാഷ്ട്രീയാസ്തിത്വം പണയപ്പെടുത്തേണ്ടി വന്നു. സ്വാമിനാഥന്റെ ഓർമ പുതുക്കുന്ന വേളയിൽപ്പോലും യുഎസ്‌ പ്രസിഡന്റ്‌ ട്രംപിന്റെ ഇറക്കുമതി ചുങ്കത്തിന്റെ മുന്നിൽ കേന്ദ്രസർക്കാർ മുട്ടുമടക്കുന്ന കാഴ്ചയാണ്. ഇതിനെയും മറികടക്കാൻ സ്വാമിനാഥന്റെ ആശയങ്ങൾ നമുക്ക് പിൻബലമാകണം.