യുഎസിൽ പ്രവർത്തനം അവസാനിപ്പിച്ച് ടിക് ടോക്

വാഷിങ്ടൺ : യുഎസിൽ പ്രവർത്തനം അവസാനിപ്പിച്ച് സാമൂഹ്യ മാധ്യമ പ്ലാറ്റ്ഫോമായ ടിക് ടോക്. ശനിയാഴ്ച രാത്രിയോടെയാണ് ആപ്പിന്റെ പ്രവർത്തനം അവസാനിപ്പിച്ചത്. ടിക് ടോകിനെ രാജ്യത്ത് നിരോധിക്കാൻ തീരുമാനിച്ചിരുന്നു. നിരോധനം പ്രാബല്യത്തിൽ വരുന്നതിന് മണിക്കൂറുകൾക്ക് മുമ്പാണ് ടിക് ടോക് സേവനം അവസാനിപ്പിച്ചത്.

ക്ഷമിക്കണം, ടിക് ടോക് ഇപ്പോൾ ലഭ്യമല്ല എന്നാണ് ആപ്പ് തുറക്കുമ്പോൾ കാണിക്കുന്നത്. പ്ലേ സ്റ്റോറിൽ നിന്നും ആപ് സ്റ്റോറിൽ നിന്നും ആപ് അപ്രത്യക്ഷമായിട്ടുമുണ്ട്. 170 ദശലക്ഷം ഉപയോക്താക്കളാണ് യുഎസിൽ ടിക് ടോക്കിനുള്ളത്. ദേശസുരക്ഷ മുൻനിർത്തി ടിക് ടോക് നിരോധിക്കുകയാണെന്നാണ് ബൈഡനും സുപ്രീംകോടതിയും വ്യക്തമാക്കിയത്. ടിക് ടോക്കിന്റെ മാതൃകമ്പനിയായ ബൈറ്റ്ഡാൻസിന്റെ മറ്റ് ആപ്പുകളും യുഎസിൽ ലഭ്യമാകുന്നില്ല.

നിരോധനം ഉടൻ അവസാനിക്കുമെന്നാണ് പ്രതീക്ഷിക്കുന്നതെന്നും ഡൊണാൾഡ് ട്രംപ് പ്രസിഡന്റാകുന്നതോടെ വീണ്ടും തിരിച്ചെത്താൻ കഴിയുമെന്നും ടിക് ടോക് അധികൃതർ പറഞ്ഞു.