print edition സെവൂത്തയിൽ
തൽക്കാലം ആശ്വാസം

മാഡ്രിഡ്: ആഫ്രിക്കൻ വൻകരയിലെ സ്പാനിഷ് പ്രദേശമായ സെവൂത്തയിലേക്ക് അഭയാർഥികൾ ഇരച്ചുകയറിയതിനെ തുടർന്നുള്ള പ്രതിസന്ധിക്ക്‌ താൽക്കാലിക ശമനം. മൊറോക്കോയിൽനിന്ന്‌ അനധികൃതമായി കടന്നുകയറിയവരിൽ ഏറെക്കുറെ എല്ലാവരെയും തിരിച്ചയച്ചാതായി സ്പാനിഷ് വിദേശമന്ത്രി ഹൊസെ മാനുവൽ അൽബാരസ് പറഞ്ഞു.

അതിർത്തി തുറന്നിട്ടിരിക്കുകയാണെന്നും സ്‌പെയിൻ നിയന്ത്രണം ലഘൂകരിച്ചെന്നുമുള്ള സമൂഹമാധ്യമ സന്ദേശങ്ങളെ തുടർന്ന്‌ 24 മണിക്കൂറിനിടെ അറുപതിനായിരത്തോളം അഭയാർത്ഥികളാണ് ഇരച്ചെത്തിയത്‌. കടലിൽ മുങ്ങിയും അതിർത്തിവേലി കയറാനുള്ള ശ്രമത്തിലും മരിച്ചവരുടെ എണ്ണം 67 ആയി. സ്ഥിതിഗതി നിയന്ത്രിക്കാൻ മൊറോക്കൻ പൊലീസ് കണ്ണീർവാതകവും ജലപീരങ്കിയും പ്രയോഗിച്ചു. സ്പാനിഷ് സൈന്യം, നാഷണൽ പൊലീസ്, സിവിൽ ഗാർഡ് എന്നിവർ സെവൂത്തയിലെ തെരുവുകളിൽ നിലയുറപ്പിച്ചു. കടലിൽ കാണാതായവർക്കായി നാവികസേന പട്രോളിങ്‌ ശക്തമാക്കി.

അതേസമയം, അഭയാർഥിപ്രവാഹം യൂറോപ്യൻ യൂണിയനിൽ രാഷ്ട്രീയപ്പോരിന് വഴിവച്ചു. 29 രാജ്യങ്ങളിൽ അതിർത്തിനിയന്ത്രണമില്ലാത്ത യാത്രാസ്വാതന്ത്ര്യം ഉറപ്പുനൽകുന്ന ‘ഷെങ്കൻ കരാർ' താൽക്കാലികമായി റദ്ദാക്കുമെന്ന ഭീഷണിയുമായി ഇറ്റലിയിലെ തീവ്രവലതുപക്ഷ പ്രധാനമന്ത്രി ജോർജിയ മെലോണി രംഗത്തെത്തി. സ്പെയിനിൽനിന്നുള്ള യാത്രക്കാർക്ക് കർശന നിയന്ത്രണം ഏർപ്പെടുത്തുമെന്ന പ്രഖ്യാപനത്തെ തുടർന്ന്‌ ഇറ്റാലിയൻ സ്ഥാനപതിയെ വിളിച്ചുവരുത്തി സ്പെയിൻ ശക്തമായ പ്രതിഷേധം അറിയിച്ചു. സ്പെയിനുമായുള്ള അതിർത്തിയിൽ നിയന്ത്രണം കർശനമാക്കുമെന്ന് ഫ്രഞ്ച് ആഭ്യന്തരമന്ത്രി ലോറന്റ് നൂനെസ്‌ പ്രഖ്യാപിച്ചു.