കാബൂൾ ആശുപത്രിയ്ക്ക് നേരെ വ്യോമാക്രമണം: 400 മരണം, പിന്നിൽ പാകിസ്ഥാനെന്ന് താലിബാൻ

കാബൂൾ: അഫ്​ഗാനിസ്ഥാനിലെ ആശുപത്രിക്കുനേരെ കടുത്ത വ്യോമാക്രമണം. കാബൂളിലെ ഒരു ആശുപത്രിക്ക് നേരെ പാകിസ്ഥാൻ നടത്തിയ ആക്രമണത്തിൽ 400 പേർ കൊല്ലപ്പെടുകയും 250 ഓളം പേർക്ക് പരിക്കേൽക്കുകയും ചെയ്തതായി താലിബാൻ വക്താവ് അറിയിച്ചു. പാകിസ്ഥാൻ്റെ വ്യോമാക്രമണത്തിൽ ആശുപത്രിയുടെ വലിയൊരു ഭാഗം തകർന്നിട്ടുണ്ടെന്നും മരണസംഖ്യ ഇനിയും ഉയർന്നേക്കാമെന്നും അഫ്​ഗാനിലെ താലിബാൻ സർക്കാർ വ്യക്തമാക്കി.

അതേസമയം, അഫ്ഗാൻ്റെ ആരോപണങ്ങൾ അടിസ്ഥാനരഹിതമാണെന്ന് പാകിസ്ഥാൻ പ്രതികരിച്ചു. കാബൂളിൽ ഒരു ആശുപത്രിയും ലക്ഷ്യം വെച്ചിട്ടില്ലെന്നും പാകിസ്ഥാൻ അറിയിച്ചു.

അയൽരാജ്യങ്ങൾ തമ്മിലുള്ള ഏറ്റുമുട്ടൽ മൂന്നാം ആഴ്ചയിലേക്ക് കടക്കുമ്പോൾ, അതിർത്തിയിൽ ഇരുപക്ഷവും വെടിവെപ്പ് നടത്തുകയും അഫ്ഗാനിസ്ഥാനിൽ നാല് പേർ കൊല്ലപ്പെടുകയും ചെയ്തതിന് മണിക്കൂറുകൾക്ക് ശേഷമാണ് ഈ ആക്രമണം നടന്നതായി പറയപ്പെടുന്നത്.

"പാകിസ്ഥാൻ സൈന്യം വീണ്ടും അഫ്ഗാനിസ്ഥാൻ്റെ വ്യോമാതിർത്തി ലംഘിക്കുകയും കാബൂളിലെ ഒരു ലഹരിവിമുക്ത ആശുപത്രി ലക്ഷ്യം വെക്കുകയും ചെയ്തു. ഇത് ചികിത്സയിലായിരുന്ന നിരവധി അന്തേവാസികളുടെ മരണത്തിനും പരിക്കിനും കാരണമായി," താലിബാൻ വക്താവ് സബീഹുള്ള മുജാഹിദ് പറഞ്ഞു.

റിപ്പോർട്ടുകൾ പ്രകാരം, കാബൂളിലെ ഒൻപതാം പൊലീസ് ഡിസ്ട്രിക്റ്റിലുള്ള ലഹരിവിമുക്ത കേന്ദ്രത്തിന് നേരെയാണ് പാകിസ്ഥാൻ സൈന്യം ആക്രമണം നടത്തിയത്.