പാർപ്പിട പ്രതിസന്ധി: സർക്കാർ നിർദേശങ്ങൾ തള്ളി പാർലമെന്റ്; സ്പെയിനിൽ ഇടക്കാല തെരഞ്ഞെടുപ്പ്

മാഡ്രിഡ് : ​പാർപ്പിട പ്രതിസന്ധിയിൽ ​സർക്കാർ കൊണ്ടുവന്ന അടിയന്തര നിർദേശങ്ങൾ പാർലമെന്റ് തള്ളിയതിന് പിന്നാലെ സ്പെയിനിൽ ഇടക്കാല തെരഞ്ഞെടുപ്പ് പ്രഖ്യാപിച്ച് പ്രധാനമന്ത്രി പെഡ്രോ സാഞ്ചസ്. നവംബർ 29നാണ് തെരഞ്ഞെടുപ്പ് നടക്കുക. പാർപ്പിട പ്രതിസന്ധി രൂക്ഷമായ സാഹചര്യത്തിലായിരുന്നു അടിയന്തര നിർദേശങ്ങൾ സർക്കാർ കൊണ്ടുവന്നത്.

വീടുകളുടെ വിലയും വാടകയും ഉയർന്നതിനെതിരെ രാജ്യത്തിന്റെ വിവിധ ഭാഗങ്ങളിൽ ശക്തമായ പ്രതിഷേധമാണ് ഉയരുന്നത്. ഈ സാഹചര്യത്തിലാണ് സാഞ്ചസിന്റെ തീരുമാനം. കുടിയൊഴിപ്പിക്കൽ നിയന്ത്രിക്കുക, റിയൽ എസ്റ്റേറ്റ് മേഖലയിലെ ഊഹക്കച്ചവടം തടയുക എന്നിവ ഉൾപ്പെടെയുള്ള നടപടികളാണ് സർക്കാർ കൊണ്ടുവന്നത്. എന്നാൽ ഈ നിർദേശങ്ങൾക്ക് ആവശ്യമായ പിന്തുണ പാർലമെന്റിൽ നിന്ന് ലഭിച്ചില്ല.

വെള്ളിയാഴ്ച നടന്ന വോട്ടെടുപ്പിൽ ഭരണകൂടത്തിന്റെ നിർദേശങ്ങൾ കൺസർവേറ്റീവ് പീപ്പിൾസ് പാർട്ടി (പിപി), വോക്സ്, കറ്റലൻ സ്വാതന്ത്ര്യവാദി പാർട്ടിയായ ജൂന്റ്സ് എന്നിവയുടെ എതിർപ്പിനെ തുടർന്ന് പരാജയപ്പെടുകയായിരുന്നു. പാർപ്പിട പ്രശ്നത്തിൽ അടിയന്തര നടപടി ആവശ്യപ്പെട്ട് മാഡ്രിഡ് ഉൾപ്പെടെയുള്ള നഗരങ്ങളിൽ പതിനായിരക്കണക്കിന് ആളുകൾ പ്രതിഷേധം നടത്തിയിരുന്നു. ഉയർന്ന വാടകയും കുടിയൊഴിപ്പിക്കലുമാണ് പ്രതിഷേധങ്ങൾക്ക് പിന്നിലെ പ്രധാന കാരണം.

ജനങ്ങളുടെ പിന്തുണ അറിഞ്ഞിരിക്കേണ്ട സമയമാണിതെന്ന് തെരഞ്ഞെടുപ്പ് പ്രഖ്യാപനത്തിനിടെ സാഞ്ചസ് പറഞ്ഞു. പാർലമെന്റിൽ കൂടുതൽ ഭൂരിപക്ഷം നേടുകയാണ് ലക്ഷ്യമെന്നും വ്യക്തമാക്കി. സർക്കാരിന് ചില വീഴ്ചകൾ സംഭവിച്ചെന്നും തെരഞ്ഞെടുപ്പ് വാഗ്ദാനങ്ങൾ പൂർണമായി നടപ്പാക്കാൻ കഴിഞ്ഞിട്ടില്ലെന്നും സാഞ്ചസ് കുറ്റസമ്മതം നടത്തി.

2018 മുതൽ പ്രധാനമന്ത്രിയായ സാഞ്ചസിന്റെ നേതൃത്വത്തിലുള്ള സോഷ്യലിസ്റ്റ് പാർട്ടി നിലവിൽ അഭിപ്രായ സർവേകളിൽ കൺസർവേറ്റീവ് പീപ്പിൾസ് പാർട്ടിക്ക് പിന്നിലാണ്. തെരഞ്ഞെടുപ്പിൽ പീപ്പിൾസ് പാർട്ടി വോക്സിന്റെ പിന്തുണയോടെ സർക്കാർ രൂപീകരിക്കാനുള്ള സാധ്യതയുണ്ടെന്നാണ് സർവേകൾ വിലയിരുത്തുന്നത്. അതേസമയം, സ്പെയിനിലെ ​പാർപ്പിട പ്രശ്നം തെരഞ്ഞെടുപ്പിലെ പ്രധാന വിഷയമായി ഉയർന്നു വരുമെന്നാണ് വി​ദ​ഗ്ധരുടെ വിലയിരുത്തൽ. ഈ പ്രതിസന്ധിയിൽ സർക്കാരിന്റെ നടപടികൾക്ക് ജനപിന്തുണ ലഭിക്കുമെന്ന പ്രതീക്ഷയിലാണ് സാഞ്ചസ്.