സൊഹ്‌റാൻ മാംദാനിയും എപ്‌സ്റ്റീനും ഒന്നിച്ചുള്ള ചിത്രങ്ങൾ വ്യാജം; പിന്നിൽ എഐ

ന്യൂയോർക്ക്: സോഷ്യൽ മീഡിയയിൽ വ്യാപകമായി പ്രചരിക്കുന്ന ന്യൂയോർക്ക് സിറ്റി മേയർ സൊഹ്‌റാൻ മംദാനിയും ലൈംഗിക കുറ്റവാളി ജെഫ്രി എപ്‌സ്റ്റീനും ഒന്നിച്ചുള്ള ചിത്രങ്ങൾ വ്യാജമാണെന്ന് സ്ഥിരീകരണം.

ആർട്ടിഫിഷ്യൽ ഇന്റലിജൻസ് ഉപയോഗിച്ച് നിർമ്മിച്ചതാണ് ഈ ചിത്രങ്ങളെന്ന് അന്താരാഷ്ട്ര മാധ്യമങ്ങളുടെ ഫാക്ട് ചെക്ക് റിപ്പോർട്ടുകൾ വ്യക്തമാക്കുന്നു. എപ്‌സ്റ്റീൻ ഫയലുകൾ പുറത്തുവന്നതിന് പിന്നാലെയാണ് മേയറെ അപകീർത്തിപ്പെടുത്തുന്ന തരത്തിൽ ഈ ചിത്രങ്ങൾ പ്രചരിച്ചത്.

എപ്‌സ്റ്റീന്റെ സ്വകാര്യ ദ്വീപിലോ വിമാനത്തിലോ വെച്ച് എടുത്തതെന്ന വ്യാജേനയാണ് ചിത്രങ്ങൾ പങ്കുവെക്കപ്പെട്ടത്. എന്നാൽ ചിത്രങ്ങളിലെ വെളിച്ചം, നിഴലുകൾ, മേയറുടെ കൈവിരലുകളുടെ ഘടന എന്നിവ പരിശോധിച്ചതിൽ നിന്ന് ഇവ എഐ ജനറേറ്റഡ് ആണെന്ന് വിദഗ്ധർ കണ്ടെത്തി.

കൂടാതെ, ചിത്രത്തിൽ കാണുന്ന പശ്ചാത്തലത്തിലെ പല വസ്തുക്കളും സ്വാഭാവികമായ രീതിയിലല്ല ഉള്ളതെന്നും റിപ്പോർട്ടുകൾ ചൂണ്ടിക്കാട്ടുന്നു. തിരഞ്ഞെടുപ്പ് രാഷ്ട്രീയവും എപ്‌സ്റ്റീൻ കേസുമായി ബന്ധപ്പെട്ട പുതിയ വെളിപ്പെടുത്തലുകളും നിലനിൽക്കുന്ന സാഹചര്യത്തിൽ മേയറുടെ പ്രതിച്ഛായ തകർക്കാനാണ് ഇത്തരം ചിത്രങ്ങൾ നിർമ്മിച്ചതെന്നാണ് വിലയിരുത്തൽ.

എപ്‌സ്റ്റീനുമായി ബന്ധപ്പെട്ട ഔദ്യോഗിക രേഖകളിലോ യാത്രാ വിവരങ്ങളിലോ മേയറുടെ പേര് ഒരിടത്തും പരാമർശിച്ചിട്ടില്ല. സാങ്കേതികവിദ്യ ഉപയോഗിച്ച് വ്യാജ വിവരങ്ങൾ പ്രചരിപ്പിക്കുന്നത് ജനാധിപത്യ പ്രക്രിയയ്ക്ക് ഭീഷണിയാണെന്ന് സൈബർ വിദഗ്ധർ മുന്നറിയിപ്പ് നൽകുന്നു.

സോഷ്യൽ മീഡിയ പ്ലാറ്റ്‌ഫോമുകൾ ഇത്തരം ചിത്രങ്ങൾ നീക്കം ചെയ്യാനുള്ള നടപടികൾ ആരംഭിച്ചിട്ടുണ്ട്. സമാനമായ രീതിയിൽ മറ്റ് പ്രമുഖ വ്യക്തികളുടെ ചിത്രങ്ങളും എഐ ഉപയോഗിച്ച് നിർമ്മിക്കപ്പെട്ട് പ്രചരിക്കുന്നുണ്ടെന്നും ജാഗ്രത പാലിക്കണമെന്നും അധികൃതർ അറിയിച്ചു.