വൈദ്യശാസ്ത്ര നൊബേൽ പ്രഖ്യാപിച്ചു; പുരസ്കാരം മൂന്നുപേർക്ക്

സ്റ്റോക്ഹോം : 2025ലെ വൈദ്യശാസ്ത്ര നൊബേൽ പ്രഖ്യാപിച്ചു. മേരി ഇ ബ്രാങ്കോ, ഫ്രെഡ് റാംസ്‌ഡെൽ, ഷിമോൺ സകാഗുച്ചി എന്നീ ശാസ്ത്രജ്ഞർ പുരസ്കാരം പങ്കിടും. പെരിഫറൽ ഇമ്മ്യൂൺ ടോളറൻസിനെക്കുറിച്ചുള്ള കണ്ടെത്തലുകൾക്കാണ് പുരസ്കാരം. ശരീരത്തിന്റെ സ്വന്തം കലകളിലെ ആക്രമണങ്ങളെ രോഗപ്രതിരോധ സംവിധാനം എങ്ങനെ തടയുന്നു എന്നതിനെക്കുറിച്ചുള്ള പഠനമാണ് പുരസ്കാരത്തിനർഹരാക്കിയത്. സ്റ്റോക്ക്ഹോമിലെ കരോലിൻസ്ക ഇൻസ്റ്റിറ്റ്യൂട്ടിൽ നടന്ന നൊബേൽ അസംബ്ലിയാണ് പ്രഖ്യാപനം നടത്തിയത്.

വിക്ടർ ആംബ്രോസിനും ഗാരി റുവ്കുണിനുമായിരുന്നു 2024ലെ വൈദ്യ ശാസ്ത്ര നൊബേൽ. ജീൻ എക്സ്പ്രഷനെ നിയന്ത്രിക്കുകയും വികസനത്തിലും രോഗത്തിലും നിർണായക പങ്ക് വഹിക്കുകയും ചെയ്യുന്ന ചെറിയ ആർ‌എൻ‌എ തന്മാത്രകളായ മൈക്രോ ആർ‌എൻ‌എയുടെ കണ്ടുപിടിത്തത്തിനായിരുന്നു പുരസ്കാരം.

അമേരിക്കയിൽ 1961ൽ ജനിച്ച മേരി ബ്രാങ്കോ പ്രിൻസ്റ്റൺ യൂണിവേഴ്സിറ്റിയിൽ നിന്ന് പിഎച്ച്ഡി നേടി. നിലവിൽ സിയാറ്റിലിലെ ഇൻസ്റ്റിറ്റ്യൂട്ട് ഫോർ സിസ്റ്റംസ് ബയോളജിയിലെ സീനിയർ പ്രോ​ഗ്രാം മാനേജറാണ്. 1960ൽ ജനിച്ച ഫ്രെഡ് റാംസ്‌ഡെൽ യൂണിവേഴ്സിറ്റി ഓഫ് കലിഫോർണിയയിൽ നിന്ന് പിഎച്ച്ഡി നേടി. നിലവിൽ സ്വന്തം കമ്പനിയായ സൊനോമ ബയോതെറാപ്യൂട്ടിക്സിൽ സയന്റിഫ്ക് അഡ്വൈസറാണ്. 1951ൽ ജനിച്ച ഷിമോൺ സകാഗുച്ചി ജപ്പാനിലെ കിയോട്ടോ യൂണിവേഴ്സിറ്റിയിൽ നിന്ന് എംഡിയും പിഎച്ച്ഡിയും നേടി. നിലവിൽ ജപ്പാനിലെ ഒസാക യൂണിവേഴ്സിറ്റിയിൽ അധ്യാപകനാണ്.