മനുഷ്യരിൽ 'സൂപ്പർ റേസ്' സൃഷ്ടിക്കാൻ എപ്‌സ്റ്റീൻ ലക്ഷ്യമിട്ടു; സ്വന്തം ഡിഎൻഎ വ്യാപിപ്പിക്കാൻ പ്രത്യേക കേന്ദ്രങ്ങൾ

വാഷിങ്ടൺ: ലൈം​ഗിക കുറ്റവാളിയായ അമേരിക്കൻ ശതകോടീശ്വരൻ ജെഫ്രി എപ്‌സ്റ്റീന്റെ ക്രൂരമായ മറ്റൊരു പദ്ധതിയുടെ വിവരങ്ങൾ പുറത്ത്. സ്വന്തം ഡിഎൻഎ ഉപയോഗിച്ച് ഒരു പുതിയ മനുഷ്യവംശത്തെ സൃഷ്ടിക്കാൻ എപ്‌സ്റ്റീൻ പദ്ധതിയിട്ടിരുന്നതായാണ് റിപ്പോർട്ടുകൾ സൂചിപ്പിക്കുന്നത്. ഇതിനായി തന്റെ വൻകിട വസതികൾ ഉപയോഗിച്ച് ഒട്ടേറെ സ്ത്രീകളെ ഒരേസമയം ഗർഭിണികളാക്കാനായിരുന്നു ഇയാളുടെ നീക്കം.

ന്യൂ മെക്സിക്കോയിലെ സാന്താ ഫേയ്ക്ക് പുറത്തുള്ള തന്റെ മുപ്പത്തിമൂവായിരം ചതുരശ്ര അടി വിസ്തീർണ്ണമുള്ള ആഡംബര വസതി കേന്ദ്രീകരിച്ചാണ് എപ്‌സ്റ്റീൻ ഈ പദ്ധതി വിഭാവനം ചെയ്തത്. ഒരേസമയം ഇരുപതോളം സ്ത്രീകളെ ഇവിടെ താമസിപ്പിക്കുകയും തന്റെ ബീജത്തിലൂടെ അവരെ ഗർഭിണികളാക്കി സ്വന്തം വംശം വളർത്തുകയുമായിരുന്നു ലക്ഷ്യം. ശാസ്ത്രജ്ഞരോടും മറ്റ് പ്രമുഖരോടും ഇയാൾ ഈ ആശയത്തെക്കുറിച്ച് സംസാരിച്ചിരുന്നു. നോബൽ സമ്മാന ജേതാക്കളുടെ ബീജം ശേഖരിച്ച് സൂക്ഷിച്ചിരുന്ന പഴയകാലത്തെ ഒരു സ്ഥാപനത്തിൽ നിന്നാണ് ഇയാൾക്ക് ഈ പ്രചോദനം ലഭിച്ചത്.

തന്റെ പണം ഉപയോഗിച്ച് ലോകപ്രശസ്തരായ ശാസ്ത്രജ്ഞരെ ആകർഷിക്കാൻ എപ്‌സ്റ്റീന് കഴിഞ്ഞിരുന്നു. സ്റ്റീഫൻ ഹോക്കിംഗ് ഉൾപ്പെടെയുള്ള പ്രമുഖർ ഇയാളുടെ ക്ഷണപ്രകാരം വിരുന്നുകളിലും ചർച്ചകളിലും പങ്കെടുത്തിട്ടുണ്ട്. പാവപ്പെട്ട രാജ്യങ്ങളിലെ പട്ടിണി മാറ്റുന്നതിനെയും ആരോഗ്യ സൗകര്യങ്ങൾ വർദ്ധിപ്പിക്കുന്നതിനെയും ഇയാൾ എതിർത്തിരുന്നു. ജനസംഖ്യാ വർദ്ധനവ് തടയാൻ ഇത്തരം സഹായങ്ങൾ നിർത്തണമെന്നായിരുന്നു ഇയാളുടെ ക്രൂരമായ വാദം. സാങ്കേതികവിദ്യ ഉപയോഗിച്ച് മനുഷ്യന്റെ ആയുസ്സും കഴിവും വർദ്ധിപ്പിക്കുക എന്ന ആശയത്തിലായിരുന്നു ഇയാൾക്ക് താൽപ്പര്യം. മരണശേഷം സ്വന്തം ശരീരഭാഗങ്ങൾ ശീതീകരിച്ച് സൂക്ഷിക്കാനും ഇയാൾ ആഗ്രഹിച്ചിരുന്നു.

എപ്‌സ്റ്റീന് കുട്ടികളുണ്ടായിരുന്നോ എന്ന കാര്യത്തിൽ ഇന്നും ഔദ്യോഗികമായ സ്ഥിരീകരണമില്ല. എന്നാൽ 2002-ൽ പ്രായപൂർത്തിയാകാത്ത ഒരു പെൺകുട്ടി പ്രസവിച്ച കുഞ്ഞിനെ എപ്‌സ്റ്റീന്റെ പങ്കാളിയായിരുന്ന ഘിസ്‌ലെയ്ൻ മാക്‌സ്‌വെൽ ഇടപെട്ട് മാറ്റിപ്പാർപ്പിച്ചതായി ഒരു ഡയറി കുറിപ്പിൽ പറയുന്നു.

എപ്‌സ്റ്റീന്റെ ഔദ്യോഗിക വിൽപ്പത്രത്തിൽ കുട്ടികളെക്കുറിച്ച് പരാമർശമില്ല.തന്റെ മിക്ക സ്വത്തുക്കളും അവസാനകാലത്തെ കാമുകിയായ കരീന ഷുലിയാക്കിനാണ് ഇയാൾ എഴുതിവെച്ചത്.