ബ്യൂഫോർട്ട് കോട്ട പിടിച്ചെടുത്ത് ഇസ്രായേൽ; ലെബനനിൽ ആക്രമണം ശക്തമാകുന്നു

ബെയ്റൂത്ത് : ദക്ഷിണ ലെബനനിലെ തന്ത്രപ്രധാനമായ ബ്യൂഫോർട്ട് കോട്ട ഇസ്രായേൽ സൈന്യം പിടിച്ചെടുത്തു. ഹിസ്ബുള്ളയ്ക്കെതിരെയുള്ള സൈനിക നീക്കത്തിൽ ഇതൊരു നിർണായക വഴിത്തിരിവാണെന്ന് ഇസ്രായേൽ പ്രധാനമന്ത്രി ബെന്യാമിൻ നെതന്യാഹു വിശേഷിപ്പിച്ചു. ലിതാനി നദി പിന്നിട്ട് ലെബനൻ അതിർത്തിക്കുള്ളിലേക്ക് കൂടുതൽ ആഴത്തിൽ ഇറങ്ങി ഇസ്രായേൽ കരസേന നടത്തുന്ന ആക്രമണങ്ങളുടെ ഭാഗമായാണ് ഈ നടപടി.

ഏകദേശം 900 വർഷങ്ങൾക്ക് മുൻപ് കുരിശുയുദ്ധക്കാരാൽ നിർമിക്കപ്പെട്ട ഈ കോട്ട ലിതാനി താഴ്‌വരയുടെ നിയന്ത്രണത്തിൽ നിർണായക പങ്കുവഹിക്കുന്നു. 1982ൽ പിഎൽഒയ്ക്ക് എതിരായ യുദ്ധത്തിൽ ഇസ്രായേൽ ഇത് പിടിച്ചെടുത്തിരുന്നെങ്കിലും 2000ൽ സൈന്യത്തെ പിൻവലിച്ചിരുന്നു. ഇപ്പോൾ വീണ്ടും കോട്ടയ്ക്ക് മുകളിൽ ഇസ്രായേൽ പതാക ഉയർത്തിയതായി പ്രതിരോധ മന്ത്രി ഇസ്രായേൽ കാറ്റ്സ് സ്ഥിരീകരിച്ചു.

സഹ്രാനി നദിക്ക് താഴെയുള്ള ദക്ഷിണ ലെബനനിലെ മുഴുവൻ താമസക്കാരോടും പ്രദേശം ഒഴിഞ്ഞുപോകാൻ ഇസ്രായേൽ പ്രതിരോധ സേന മുന്നറിയിപ്പ് നൽകിയിട്ടുണ്ട്. നയതന്ത്ര ചർച്ചകൾ ഒരുവശത്ത് നടക്കുന്നുണ്ടെങ്കിലും താൽക്കാലിക വെടിനിർത്തൽ കരാറുകൾ ലംഘിക്കപ്പെട്ടതായാണ് ഇരുപക്ഷവും ആരോപിക്കുന്നത്.

ഇസ്രായേലിന്റെ പുതിയ സൈനിക മുന്നേറ്റത്തെ യുകെ, ഫ്രാൻസ്, ജർമ്മനി എന്നീ രാജ്യങ്ങൾ ശക്തമായി വിമർശിച്ചു. ഇസ്രായേൽ നടത്തുന്നത് കൂട്ടായ ശിക്ഷാനടപടി ആണെന്ന് ലെബനൻ പ്രധാനമന്ത്രി നവാഫ് സലാം കുറ്റപ്പെടുത്തി. ഈ വിഷയത്തിൽ ചർച്ച നടത്തുന്നതിനായി ഫ്രാൻസ് ഐക്യരാഷ്ട്രസഭയുടെ സുരക്ഷാ കൗൺസിൽ യോഗം ആവശ്യപ്പെട്ടിട്ടുണ്ട്.

മാർച്ച് 2ന് ഇറാൻ പരമോന്നത നേതാവ് അലി ഖമേനിയുടെ കൊലപാതകത്തിന് പ്രതികാരമായി ഹിസ്ബുള്ള ഇസ്രായേലിലേക്ക് റോക്കറ്റ് ആക്രമണം നടത്തിയതിന് പിന്നാലെയാണ് ഈ മേഖലയിൽ യുദ്ധം ആരംഭിച്ചത്. തുടർന്നുണ്ടായ ഇസ്രായേലിന്റെ വ്യോമ-കര ആക്രമണങ്ങളിൽ ഇതുവരെ 3,300ലധികം ആളുകൾ ലെബനനിൽ കൊല്ലപ്പെട്ടതായാണ് ഔദ്യോഗിക കണക്കുകൾ.