മുൻ പാക് പ്രധാനമന്ത്രി ഇമ്രാൻഖാൻ കൊല്ലപ്പെട്ടതായി അഭ്യൂഹം, റാവൽപിണ്ടി ജയിലിന് മുന്നിൽ സംഘർഷം

കറാച്ചി: റാവൽപിണ്ടിയിലെ ജയിലിൽ കഴിയുന്ന പാകിസ്ഥാൻ മുൻ പ്രധാനമന്ത്രി ഇമ്രാൻ ഖാൻ കൊല്ലപ്പെട്ടതായുള്ള വാർത്തകൾ പ്രചരിപ്പിച്ചതിന് പിന്നാലെ രാജ്യത്ത് സംഘർഷം.  റാവൽപിണ്ടിയിലെ അഡിയാല ജയിലിൽ മുൻ പാകിസ്ഥാൻ പ്രധാനമന്ത്രി കൊല്ലപ്പെട്ടതായി അഫ്ഗാൻ ടൈംസ് എന്നവകാശപ്പെട്ടുള്ള ഹാൻഡിലിൽ നിന്നാണ് വാർത്ത പ്രചരിപ്പിച്ചത്. വിശ്വസനീയമായ ഏജൻസിയോ പാകിസ്ഥാനിലെ ഏതെങ്കിലും ഔദ്യോഗിക വക്താക്കളോ വാർത്ത സ്ഥിരീകരിച്ചിട്ടില്ല.

ഇമ്രാൻ ഖാന്റെ കുടുംബത്തെ അദ്ദേഹത്തെ കാണാൻ അനുവദിക്കുന്നില്ലെന്നും മുൻ പാകിസ്ഥാൻ പ്രധാനമന്ത്രിയെ ഏകാന്തതടവിൽ പാർപ്പിച്ചിരിക്കുകയാണെന്നും വാർത്തയുണ്ടായിരുന്നു. ഇതിന് തൊട്ടുപിന്നാലെയാണ് ഇന്നത്തെ അഭ്യൂഹങ്ങൾ വരുന്നത്. പാകിസ്ഥാന്റെ ക്രിക്കറ്റ് ലോകകപ്പ് നേടിയ നായകൻ കൂടിയായ ഇമ്രാൻഖാന്റെ ആയിരക്കണക്കിന് അനുയായികൾ റാവൽപിണ്ടി ജയിലിൽ ഇരച്ചുകയറിയതായും റിപ്പോർട്ടുണ്ട്.

ജയിൽ അധികൃതരുടെ മോശം പെരുമാറ്റവും പീഡനവും പാകിസ്ഥാൻ തെഹ്രീക്-ഇ-ഇൻസാഫ് (പിടിഐ) പാർടി സ്ഥാപകൻ കൂടിയായ ഇമ്രാൻഖാൻ പലപ്പോഴും പരാതിപ്പെട്ടിട്ടുണ്ട്. തനിക്ക് എന്തെങ്കിലും സംഭവിച്ചാൽ സൈനിക മേധാവി ഫീൽഡ് മാർഷൽ അസിം മുനീറായിരിക്കും ഉത്തരവാദിയെന്ന് തന്റെ പാർട്ടി അംഗങ്ങളോട് ഇമ്രാൻഖാൻ നേരത്തെ മുന്നറിയിപ്പ് നൽകിയിരുന്നു.

കഴിഞ്ഞയാഴ്ച പോലീസ് ഇമ്രാൻ ഖാന്റെ സഹോദരിമാരെ വലിച്ചിഴച്ചതായുള്ള വാർത്ത വലിയ പ്രതിഷേധം സൃഷ്ടിച്ചു. ഖാനുമായി ആഴ്ചതോറുമുള്ള കൂടിക്കാഴ്ച നിഷേധിക്കപ്പെട്ട സഹോദരിമാർ ജയിലിന് പുറത്ത് 10 മണിക്കൂർ കുത്തിയിരിപ്പ് സമരം നടത്തിയപ്പോഴാണ് സംഭവം.

ഇമ്രാൻ ഖാന്റെ മൂന്ന് സഹോദരിമാരായ നൊറീൻ, അലീമ, ഉസ്മ എന്നിവർ അഡിയാല ജയിലിനുള്ളിൽ പിതാവിനെ ക്രൂരമായി മർദ്ദിച്ചതായി ആരോപിച്ചു. ഒരു വനിതാ പോലീസ് ഉദ്യോഗസ്ഥ നോറീനെ റോഡിന് കുറുകെ മുടിയിൽ പിടിച്ചു വലിച്ചിഴച്ച് നിലത്തേക്ക് തള്ളിയിട്ടുവെന്നും മറ്റ് രണ്ട് സഹോദരിമാരെ കൈയേറ്റം ചെയ്തുവെന്നും പരാതിപ്പെട്ടു.

"അഫ്ഗാനിസ്ഥാൻ ടൈം" എന്ന പേരിൽ ഒരു എക്സ് ഹാൻഡിൽ പോസ്റ്റ് ചെയ്ത "ബ്രേക്കിംഗ് ന്യൂസ്" ഉപയോഗിച്ചാണ് കൊല്ലപ്പെട്ടതായുള്ള വാർത്തയുടെ പ്രചാരണം ആരംഭിച്ചത് എന്ന് കണ്ടെത്തിയിട്ടുണ്ട്. ഇമ്രാൻ ഖാന്റെ മരണവുമായി ബന്ധപ്പെട്ട് 2025 മെയ് മാസത്തിലും സമാനമായ അഭ്യൂഹങ്ങൾ വ്യാപകമായി പ്രചരിപ്പിക്കപ്പെട്ടിരുന്നു. മുൻ പാകിസ്ഥാൻ പ്രധാനമന്ത്രി വെടിയേറ്റ് കൊല്ലപ്പെട്ടെന്നും വീട്ടിൽ വെച്ച് ആക്രമിക്കപ്പെട്ടെന്നും ആയിരുന്നു അന്നത്തെ പ്രചാരണം.