യൂറോപ്യൻ ബാങ്കുകളിൽ 20% ജീവനക്കാർ കുറഞ്ഞേക്കുമെന്ന് റിപ്പോർട്ട്

ലണ്ടൻ : ആർട്ടിഫിഷ്യൽ ഇന്റലിജൻസ് സാങ്കേതികവിദ്യയുടെ കടന്നുവരവോടെ അടുത്ത അഞ്ച് വർഷത്തിനുള്ളിൽ യൂറോപ്യൻ ബാങ്കുകളിലെ ജീവനക്കാരുടെ എണ്ണത്തിൽ 20 ശതമാനം വരെ കുറവുണ്ടായേക്കുമെന്ന് മോർഗൻ സ്റ്റാൻലി അനലിസ്റ്റുകളുടെ റിപ്പോർട്ട്. എഐ സാങ്കേതികവിദ്യ ബാങ്കുകളുടെ ഉൽപ്പാദനക്ഷമത 30 ശതമാനത്തോളം വർധിപ്പിക്കുമെന്നും ഇതോടെ കുറഞ്ഞ ജീവനക്കാരെ വെച്ച് ബാങ്കുകൾക്ക് മുന്നോട്ട് പോകാനാകുമെന്നും റിപ്പോർട്ടിൽ പറയുന്നു. എന്നാൽ ഈ തൊഴിൽ നഷ്ടങ്ങൾ പെട്ടെന്നുള്ള പിരിച്ചുവിടലുകളിലൂടെ ആയിരിക്കില്ലെന്നും, വിരമിക്കൽ അടക്കമുള്ള സ്വാഭാവികമായ രീതികളിലൂടെയായിരിക്കും സംഭവിക്കുകയെന്നും പ്രമുഖ അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു.

വൻകിട ബാങ്കുകളിൽ തൊഴിൽ വെട്ടിക്കുറയ്ക്കൽ

പുതിയ സാങ്കേതികവിദ്യ ബാങ്കുകളുടെ പ്രവർത്തനരീതി മാറ്റുമെന്നും പല തസ്തികകളും ഇല്ലാതാക്കുമെന്നും പ്രമുഖ ബാങ്കിംഗ് മേധാവികൾ ഇതിനകം വ്യക്തമാക്കിയിട്ടുണ്ട്.

സ്റ്റാൻഡേർഡ് ചാർട്ടേഡ് ബാങ്ക്: ആർട്ടിഫിഷ്യൽ ഇന്റലിജൻസിന്റെ ഉപയോഗം വർധിപ്പിക്കുന്നതിന്റെ ഭാഗമായി അടുത്ത നാല് വർഷത്തിനുള്ളിൽ എണ്ണായിരത്തോളം സപ്പോർട്ട് തസ്തികകൾ വെട്ടിക്കുറയ്ക്കാൻ പദ്ധതിയിടുന്നതായി ബാങ്ക് അറിയിച്ചു.

എച്ച്എസ്ബിസി: ബാങ്കിന്റെ മിഡിൽ, ബാക്ക് ഓഫീസ് പ്രവർത്തനങ്ങളിലെ ജീവനക്കാരുടെ എണ്ണം കുറയ്ക്കുന്നതിനായി ഇരുപതിനായിരത്തോളം തൊഴിലവസരങ്ങൾ വെട്ടിച്ചുരുക്കാൻ എച്ച്എസ്ബിസി ആലോചിക്കുന്നതായി റിപ്പോർട്ടുണ്ട്.

കൊമേഴ്സ് ബാങ്ക്: വരും വർഷങ്ങളിൽ എഐ സാങ്കേതികവിദ്യ വഴി 350 മില്യൺ യൂറോയുടെ ചിലവ് ചുരുക്കാൻ സാധിക്കുമെന്ന് കൊമേഴ്സ് ബാങ്ക് സിഇഓ ബെറ്റിന ഓർലോപ് വ്യക്തമാക്കി. ഇതിലൂടെ ബാങ്കുകളുടെ ആകെ ചിലവിൽ 4 മുതൽ 9 ശതമാനം വരെ ലാഭിക്കാൻ കഴിയുമെന്നാണ് കണക്കുകൂട്ടൽ.

തുടർനടപടികളും ലക്ഷ്യങ്ങളും

സേവനങ്ങൾ കൂടുതൽ മെച്ചപ്പെടുത്തി വരുമാനം വർധിപ്പിക്കാനാണ് ബാങ്കുകൾ എഐ ഉപയോഗിക്കുന്നത്. ഏത് ഉപഭോക്താവിന് ഏത് ഉൽപ്പന്നം നൽകണം എന്ന് കൃത്യമായി കണ്ടെത്താൻ ഇത് സഹായിക്കും. റീട്ടെയ്ൽ, സേവിംഗ്സ്, ഇൻഷുറൻസ്, വെൽത്ത് പ്ലാറ്റ്‌ഫോമുകൾ ഒരുമിച്ച് കൊണ്ടുപോകുന്ന ബാങ്കുകൾക്കായിരിക്കും ഈ മാറ്റം കൂടുതൽ ഗുണം ചെയ്യുക.

എഐ കാരണം വൻതോതിൽ തൊഴിൽ നഷ്ടമുണ്ടാകുമെന്ന ആശങ്കകൾ ശക്തമാണെങ്കിലും, പ്രമുഖ എഐ കമ്പനികളുടെ മേധാവികൾ ഇപ്പോൾ ഈ മുന്നറിയിപ്പുകളിൽ മൃദുസമീപനമാണ് സ്വീകരിക്കുന്നത്. മുൻപ് വലിയ രീതിയിലുള്ള തൊഴിൽ പ്രതിസന്ധി പ്രവചിച്ചിരുന്ന എൻവിഡിയ സിഇഓ ജെൻസൻ ഹുവാങ്, ഓപ്പൺഎഐ സിഇഓ സാം ആൾട്ട്മാൻ എന്നിവർ തങ്ങളുടെ മുൻ പ്രവചനങ്ങൾ അതിശയോക്തിപരമോ തെറ്റിദ്ധരിക്കപ്പെട്ടതോ ആണെന്ന് ഇപ്പോൾ വ്യക്തമാക്കുന്നു.

സിഡ്നിയിൽ നടന്ന ഒരു കോൺഫറൻസിൽ സംസാരിച്ച സാം ആൾട്ട്മാൻ, എഐ വികസനം ചില കമ്പനികൾ പറയുന്നതുപോലെ വലിയൊരു തൊഴിൽ നാശത്തിലേക്ക് നയിക്കില്ലെന്ന് പറഞ്ഞു. പ്രാരംഭഘട്ടത്തിലുള്ള വൈറ്റ് കോളർ ജോലികളെ എഐ ഇല്ലാതാക്കുമെന്ന് താൻ കരുതിയിരുന്നെങ്കിലും നിലവിൽ അങ്ങനെ സംഭവിച്ചിട്ടില്ലെന്നും അദ്ദേഹം കൂട്ടിച്ചേർത്തു.

സമാനമായി, എഐയെ തൊഴിൽ നഷ്ടവുമായി ബന്ധിപ്പിക്കുന്ന ബിസിനസ്സ് നേതാക്കളെ എൻവിഡിയ സിഇഓ ജെൻസൻ ഹുവാങ് വിമർശിച്ചു. എഐ ഉൽപ്പാദനക്ഷമമായത് വെറും ആറ് മാസം മുൻപ് മാത്രമാണെന്നും, എന്നാൽ ചില കമ്പനികൾ രണ്ട് വർഷം മുൻപ് തന്നെ എഐയുടെ പേര് പറഞ്ഞ് ജീവനക്കാരെ പിരിച്ചുവിട്ടിരുന്നുവെന്നും അദ്ദേഹം ചൂണ്ടിക്കാട്ടി. കമ്പനികൾ വെറുതെ ബുദ്ധിമാന്മാരാണെന്ന് കാണിക്കാൻ പറയുന്ന ഇത്തരം കാര്യങ്ങൾ ജനങ്ങളെ ഭയപ്പെടുത്തുകയാണെന്നും അത് ഉത്തരവാദിത്തമില്ലായ്മയാണെന്നും അദ്ദേഹം വ്യക്തമാക്കി.