41 രാജ്യങ്ങൾക്ക് യാത്രാവിലക്ക് ഏർപ്പെടുത്താൻ ട്രംപ്

വാഷിങ്ടൺ : നാൽപ്പത്തിയൊന്ന് രാജ്യങ്ങളിൽ നിന്നുള്ള പൗരൻമാർക്ക് യാത്രാവിലക്ക് ഏർപ്പെടുത്താൻ ഡോണൾഡ് ട്രംപ് സർക്കാർ തീരുമാനിച്ചതായി റിപ്പോർട്ട്. സുരക്ഷാകാരണങ്ങൾ ചൂണ്ടിക്കാട്ടിയാണ് നടപടി. ലിസ്റ്റ് താൽക്കാലികമാണെന്നും ഇതിൽ മാറ്റങ്ങൾ വരുമെന്നും തീരുമാനം യുഎസ് സെക്രട്ടറി അം​ഗീകരിക്കണമെന്നും ഔദ്യോ​ഗിക വൃത്തങ്ങൾ അറിയിച്ചതായി റൂയിട്ടേഴ്സ് റിപ്പോർട്ട് ചെയ്തു.

മൂന്ന് വിഭാ​ഗങ്ങളിലായി രാജ്യങ്ങളെ ഉൾപ്പെടുത്തിയാണ് വിലക്ക്. ഫുൾ വിസ സസ്പെൻഷൻ, ഭാ​ഗിക വിസ സസ്പെൻഷൻ എന്നിവ വിനോദ സഞ്ചാരികളെയും വിദ്യാർഥികളെയുമാണ് ഏറെ ബാധിക്കുക. ചില രാജ്യങ്ങൾക്ക് ഭാ​ഗിക സസ്പെൻഷനും നൽകും.

മുമ്പ് അധികാരത്തിലെത്തിയപ്പോൾ ട്രംപ് ഏഴ് മുസ്ലിം രാജ്യങ്ങൾക്ക് യാത്രാവിലക്ക് ഏർപ്പെടുത്തിയിരുന്നു. പിന്നീട് സുപ്രീംകോടതി ഇത് പിൻവലിച്ചു. യെല്ലോ, ഓറഞ്ച്, റെഡ് വിഭാ​ഗങ്ങളിലുൾപ്പെടുത്തിയാണ് രാജ്യങ്ങൾക്ക് വിലക്ക് ഏർപ്പെടുത്തുന്നത്. റെഡ് വിഭാ​ഗത്തിലുൾപ്പെടുന്ന രാജ്യങ്ങളിലുള്ള പൗരൻമാരെയാണ് നടപടി ഏറെ ബാധിക്കുക. ഇവർക്ക് ഒരു തരത്തിലുള്ള യാത്രകളും അനുവദിക്കില്ല. ഈ രാജ്യങ്ങളിലെ പൗരന്മാർക്ക് വിസ നൽകുന്നതും യുഎസ് പൂർണമായും നിർത്തലാക്കും. അഫ്​ഗാനിസ്ഥാൻ, ക്യൂബ, ഇറാൻ, ലിബിയ, നോർത്ത് കൊറിയ, സൊമാലിയ, സുഡാൻ, സിറിയ, വെനസ്വേല, യെമൻ എന്നിവയാണ് റെഡ് ലിസ്റ്റിലെ പത്ത് രാജ്യങ്ങൾ.

എറിത്രിയ, ഹെയ്തി, ലാവോസ്, മ്യാൻമർ, സൗത്ത് സുഡാൻ എന്നിവയാണ് ഓറഞ്ച് ഗ്രൂപ്പിൽ ഉൾപ്പെടുന്നത്. ഇവിടങ്ങളിൽ നിന്നുള്ള ടൂറിസ്റ്റുകൾക്കും വിദ്യാർഥികൾക്കുമാകും നിയന്ത്രണങ്ങളുണ്ടാവുക.

യെല്ലോ വിഭാ​ഗത്തിൽ 26 രാജ്യങ്ങളാണുള്ളത്. അങ്കോള, ആന്റി​ഗ്വ ആൻഡ് ബാർബുഡ, ബെലാറസ്, ബെനിൻ, ഭൂട്ടാൻ, ബുർക്കിന ഫാസോ, കാബോ വെർദേ, കംബോഡിയ, കാമറൂൺ, ഛാഡ്, ഡെമോക്രാറ്റിക് റിപ്പബ്ലിക് ഓഫ് കോം​ഗോ, ഡൊമിനീഷ്യ, ഇക്വറ്റോറിയൽ ​ഗിനിയ, ​ഗാംബിയ, ലൈബീരിയ, മലാവി, പാകിസ്ഥാൻ, മൗറിറ്റാനിയ, റിപ്പബ്ലിക് ഓഫ് കോം​ഗോ, സെന്റ് കിറ്റ്‌സ് ആൻഡ് നെവിസ്, സെന്റ് ലൂസിയ, സാവോ ടോം ആൻഡ് പ്രിൻസിപ്പെ, സിയേറ ലിയോണി, ഈസ്റ്റ് തിമൂർ, തുർക്ക്മെനിസ്താൻ, വാനുവാതു എന്നീ രാജ്യങ്ങൾ 60 ദിവസത്തിനകം സുരക്ഷ നടപടികൾ പൂർത്തിയാക്കിയില്ലെങ്കിൽ വിലക്ക് ഏർപ്പെടുത്തും.