print edition ജീവന്റെ രൂപം കണ്ടെത്തിയ ജീനിയസ്

ഡിഎൻഎയുടെ രൂപം കണ്ടെത്തിയ അമേരിക്കൻ ശാസ്ത്രജ്ഞൻ ലോകത്തോട് വിടപറയുമ്പോൾ ശാസ്ത്രലോകത്തെ വിസ്മയങ്ങളുടെ ഔന്നത്യത്തിനൊപ്പം അദ്ദേഹത്തിന്റെ വിവാദമായ വംശീയ പരാമർശങ്ങൾകൂടി ലോകം ചർച്ച ചെയ്യുന്നു. മനുഷ്യകോശങ്ങളിലെ ന്യൂക്ലിയസിൽ എല്ലാ ജനിതകവിവരങ്ങളും പേറുന്ന ഒരു വസ്‌തു ഉണ്ടെന്നും അതിനെ ഡിയോക്സിറൈബോ ന്യൂക്ലിക് ആസിഡ് എന്നാണ് വിളിക്കുന്നതെന്നും 1944ൽ തന്നെ പല ശാസ്ത്രജ്ഞരും ലോകത്തോട് വിളിച്ചുപറഞ്ഞെങ്കിലും അതിന്റെ കൃത്യമായ രൂപം തിരിച്ചറിഞ്ഞിരുന്നില്ല.

അഡീനിൻ, തൈമിൻ, ഗ്വാനിൻ, സൈറ്റോസിൻ എന്നിങ്ങനെ നാലു പദാർഥങ്ങൾകൊണ്ടാണ് അവ ഉണ്ടാക്കിയിരിക്കുന്നതെന്നും തിരിച്ചറിഞ്ഞു. പക്ഷേ, ഈ നാലു പദാർഥങ്ങൾകൊണ്ട് എങ്ങനെയാണ് ജീവന്റെ മുഴുവൻ രഹസ്യവും എഴുതപ്പെട്ടിട്ടുണ്ടാവുക? ഏതു രൂപത്തിലാകും ആ അത്ഭുതവസ്തു നമ്മുടെ കോശങ്ങളുടെ ഉള്ളറകളിൽ വസിക്കുന്നുണ്ടാവുക? ശാസ്ത്രലോകത്തെ കുഴക്കിയ ഈ ചോദ്യങ്ങളിൽ ഏറ്റവും അധികം ഉറക്കം നഷ്ടപ്പെട്ടത്‌ അമേരിക്കൻ ശാസ്ത്രജ്ഞരായ ജയിംസ് വാട്സൺ, ഫ്രാൻസിസ് ക്രിക്ക് എന്നിവര്‍ക്കാണ്. അവരാകട്ടെ ഡിഎൻഎയുടെ രൂപം കണ്ടെത്താനുറച്ച്‌ പരീക്ഷണം തുടർന്നു. അതിനായി രണ്ടുപേരുടെ നിരീക്ഷണങ്ങൾ അവർ പരിഗണിച്ചു. ആദ്യത്തേത് ഇർവിൻ ചാർഗാഫിന്റെ നിരീക്ഷണമായിരുന്നു.

രണ്ടാമതായി പഠിച്ചത് റോസ്‌ലിൻ ഫ്രാങ്ക്ളിൻ എന്ന ശാസ്ത്രജ്ഞന്റെ ഡിഎൻഎയുടെ എക്‌സ്-റേ ചിത്രങ്ങളായിരുന്നു. ഒരു ഹെലിക്‌സ് രൂപത്തിലായിരിക്കാം അവയെന്നായിരുന്നു അതിൽനിന്നുള്ള സൂചന. അവിടെനിന്ന്‌ വാട്സണും ക്രിക്കും നടത്തിയ നൂറുകണക്കിന് സാധ്യമായ രൂപത്തിൽനിന്ന്‌ അവർ അവസാനം 1953ൽ ഡിഎൻഎയുടെ ഡബിൾ ഹെലിക്‌സ് രൂപം തയ്യാറാക്കി. അവയെക്കുറിച്ചുള്ള എല്ലാ ചോദ്യങ്ങൾക്കും ആ ഏണിപോലെ തോന്നിച്ച രൂപം ശാസ്ത്രീയമായി ഉത്തരം നൽകി. അങ്ങനെ വളഞ്ഞുവളഞ്ഞു മുകളിലേക്ക് പോകുന്ന ഒരു ഗോവണിപോലെയുള്ള ജനിതകവസ്‌തുവിന്റെ രൂപം ശാസ്ത്രലോകം അംഗീകരിച്ചു. ആ കണ്ടുപിടിത്തത്തിന് സഹ ശാസ്ത്രജ്ഞനായ ഫ്രാൻസിസ് ക്രിക്ക്, മൗറിസ് വിൽകിൻസ് എന്നിവരുമായി 1962ലെ വൈദ്യശാസ്ത്രത്തിനുള്ള നൊബേൽ സമ്മാനം അദ്ദേഹം പങ്കിട്ടു.

ജീവശാസ്ത്രത്തിലെ ഈ അതുല്യമായ കണ്ടുപിടിത്തം പിന്നീട് ശാസ്ത്രലോകത്തിന് കരുത്തുപകരുകയും പിന്നാലെ അസംഖ്യം കണ്ടുപിടിത്തങ്ങൾക്ക് അടിത്തറ പാകുകയും ചെയ്‌തു.​ പ്രശസ്തിയുടെ കൊടുമുടിയിൽ നിൽക്കുമ്പോഴും 2007ൽ അദ്ദേഹം നടത്തിയ ചില വംശീയ പരാമർശങ്ങൾ വാട്സൺ എന്ന ജീനിയസ്സിന്റെ ശോഭ കെടുത്തി. ലണ്ടൻ പത്രമായ ‘ദ സൺഡേ ടൈംസ് ന്യൂസ്‌പേപ്പർ'ന്‌ നൽകിയ അഭിമുഖത്തിൽ അദ്ദേഹം ഇങ്ങനെ അഭിപ്രായപ്പെട്ടു-: “I am inherently gloomy about the prospect of Africa because all our social policies are based on the fact that their intelligence is the same as ours— whereas all the testing says not really.” കറുത്തവംശജര്‍ക്ക് വെളുത്തവംശജരെക്കാൾ ബുദ്ധി കുറവാണെന്ന് ലോകം ആ പ്രസ്‌താവനയെ അപഗ്രഥിച്ചു. അവയെ കടുത്ത വർഗീയ പരാമർശമായി കാണുകയും വലിയ വിവാദത്തിന് വഴിതുറക്കുകയും ചെയ്‌തു.

2018ൽ ഒരു ഡോക്യുമെന്ററിയിൽ അദ്ദേഹം പ്രസ്‌താവന പിൻവലിക്കുമെന്ന് കരുതിയെങ്കിലും അദ്ദേഹം അതിൽ ഉറച്ചുനിൽക്കുകയാണുണ്ടായത്. 97–ാംവയസ്സിൽ വാർധക്യസഹജമായ രോഗംമൂലം ലോകത്തോട് വിടപറയുമ്പോഴും, വിവാദങ്ങളിൽ അകപ്പെട്ടെങ്കിലും, ജീവന്റെ കാതലായ ജനിതകവസ്തുവിന്റെ രൂപം നിർവചിച്ച ആ ജീനിയസ്സിന്‌ ശാസ്ത്രലോകത്തെ സ്ഥാനം എന്നും ഉയരങ്ങളിൽത്തന്നെയാണ്. (ലേഖകൻ കൊച്ചി സർവകലാശാല, സെന്റർ ഫോർ സയൻസ് ഇൻ സൊസൈറ്റിയിൽ അസിസ്റ്റന്റ് പ്രൊഫസറാണ്)