ബോക്സിങ് ഇതിഹാസം ജോർജ് ഫോർമാൻ അന്തരിച്ചു

ലോസ് ഏഞ്ചൽസ് : അമേരിക്കൻ ബോക്സിങ് ഇതിഹാസം ജോർജ് ഫോർമാൻ (76) അന്തരിച്ചു. രണ്ടു തവണ ലോക ഹെവി വെയ്റ്റ് ചാമ്പ്യൻ പട്ടം നേടിയ ഫോർമാന്റെ മരണവിവരം കുടുംബമാണ് പങ്കുവച്ചത്. ബോക്സിങ് റിങ്ങിൽ ബി​ഗ് ജോർജ് എന്നറിയപ്പെട്ടിരുന്ന ഫോർമാൻ 1960കളിലാണ് കരിയർ ആരംഭിച്ചത്. ഒളിമ്പിക്സ് സ്വർണമടക്കം നിരവധി ബഹുമതികൾ നേടി.

1949ൽ ടെക്സസിലെ മാർഷലിലായിരുന്നു ഫോർമാന്റെ ജനനം. 1968ൽ മെക്സിക്കോയിൽ നടന്ന ഒളിമ്പിക്സിൽ 19ാം വയസിൽ സ്വർണം നേടി. പിന്നീട് തുടർച്ചയായി 37 മത്സരങ്ങൾ വിജയിച്ചു. 1973-ൽ ജമൈക്കയിലെ കിംഗ്സ്റ്റണിൽ നടന്ന മത്സരത്തിൽ ലോക ചാമ്പ്യനായിരുന്ന ജോ ഫ്രേസിയറെ പരാജയപ്പെടുത്തി.

1973ലാണ് ആദ്യ ഹെവി വെയ്റ്റ് ചാമ്പ്യൻ പട്ടം നേടുന്നത്. 1974ൽ റംബിൾ ഇൻ ദ ജം​ഗിൾ എന്നറിയപ്പെട്ട വിഖ്യാത മത്സരത്തിൽ മുഹമ്മദലിയുമായി ഏറ്റുമുട്ടി പരാജയപ്പെട്ടു. 1994ൽ 45ാം വയസിൽ വീണ്ടും ചാമ്പ്യനായി. ലോക ചാമ്പ്യനായ ഏറ്റവും പ്രായം കൂടിയ താരമായിരുന്നു. 1997ലാണ് സ്പോർട്സിൽ നിന്ന് വിരമിക്കുന്നത്.