ഷെയ്ഖ് ഹസീനയെ വിട്ടുനൽകണം; നയതന്ത്ര നീക്കം കടുപ്പിച്ച് ബംഗ്ലാദേശ് ഇടക്കാല സർക്കാർ

ധാക്ക : മുൻ പ്രധാനമന്ത്രി ഷെയ്ഖ് ഹസീനയെ വിട്ടുനൽകണമെന്ന ആവശ്യം ഇന്ത്യക്ക് മുന്നിൽ ശക്തമായി ആവർത്തിച്ച് ബംഗ്ലാദേശ് ഇടക്കാല സർക്കാർ. ബംഗ്ലാദേശ് വിദേശകാര്യ മന്ത്രി തൗഹീദ് ഹൊസൈൻ റഹ്മാനാണ് ഇക്കാര്യം വ്യക്തമാക്കിയത്. ബംഗ്ലാദേശിൽ നടന്ന ജനകീയ പ്രക്ഷോഭങ്ങൾക്കിടെയുണ്ടായ കൂട്ടക്കൊലകളിലും മനുഷ്യാവകാശ ലംഘനങ്ങളിലും ഹസീനക്ക് പങ്കുണ്ടെന്നും അവരെ നിയമത്തിന് മുന്നിൽ കൊണ്ടുവരേണ്ടത് അനിവാര്യമാണെന്നും ഹൊസൈൻ റഹ്മാൻ പറഞ്ഞു.

ഇന്ത്യൻ ഹൈക്കമ്മീഷണറുമായി നടത്തിയ കൂടിക്കാഴ്ചയിലാണ് ബംഗ്ലാദേശ് ഈ നയതന്ത്ര ആവശ്യം മുന്നോട്ടുവച്ചത്. ഓഗസ്റ്റിൽ നടന്ന അട്ടിമറിയെത്തുടർന്ന് ഇന്ത്യയിൽ അഭയം തേടിയ ഹസീനയെ വിട്ടുനൽകുന്നത് സംബന്ധിച്ച് ഇരുരാജ്യങ്ങളും തമ്മിലുള്ള കുറ്റവാളി കൈമാറ്റക്കരാർ പ്രകാരം നടപടികൾ വേഗത്തിലാക്കണമെന്നാണ് ബം​ഗ്ലാദേശ് ഇടക്കാല സർക്കാരിന്റെ നിലപാട്. സാമ്രാജ്യത്വ ശക്തികളുടെയും ഏകാധിപത്യ പ്രവണതകളുടെയും തകർച്ചക്ക് ശേഷം രാജ്യത്ത് ജനാധിപത്യം പുനഃസ്ഥാപിക്കാനുള്ള ശ്രമങ്ങളുടെ ഭാഗമായാണ് ഈ നീക്കമെന്ന് ​ബം​ഗ്ലാദേശ് വിദേശകാര്യ മന്ത്രാലയം അവകാശപ്പെട്ടു.

ഹസീനയെ വിട്ടുനൽകുന്നത് സംബന്ധിച്ച ഔദ്യോഗിക അപേക്ഷ ബംഗ്ലാദേശ് ഉടൻ സമർപ്പിക്കുമെന്നാണ് സൂചന. ബംഗ്ലാദേശിലെ ആഭ്യന്തര രാഷ്ട്രീയ മാറ്റങ്ങളും ന്യൂനപക്ഷങ്ങൾക്കെതിരെ നടക്കുന്ന അക്രമങ്ങളും അന്താരാഷ്ട്ര തലത്തിൽ ചർച്ചയാകുന്നതിനിടെയാണ് ഈ പുതിയ നയതന്ത്ര നീക്കം.

രാജ്യത്തെ ക്രമസമാധാന നില തകർത്തതിനും അഴിമതിക്കും ഹസീന ഉത്തരം പറയണമെന്ന നിലപാടിൽ ഉറച്ചുനിൽക്കുകയാണ് ബംഗ്ലാദേശിലെ വിദ്യാർത്ഥി സംഘടനകളും രാഷ്ട്രീയ പാർട്ടികളും. അയൽരാജ്യങ്ങളുമായുള്ള സമാധാനപരമായ ബന്ധം ആഗ്രഹിക്കുന്നുണ്ടെങ്കിലും നീതി നടപ്പിലാക്കുന്നതിൽ വിട്ടുവീഴ്ചയില്ലെന്ന് റഹ്മാൻ വ്യക്തമാക്കി. വരും ദിവസങ്ങളിൽ ഈ വിഷയം ദക്ഷിണേഷ്യൻ നയതന്ത്ര രംഗത്ത് വലിയ ചർച്ചകൾക്ക് വഴിതുറക്കും. കേന്ദ്ര സർക്കാരിന്റെ വിദേശനയം ഈ പ്രതിസന്ധിയിൽ എങ്ങനെ പ്രവർത്തിക്കുമെന്നത് രാഷ്ട്രീയ നിരീക്ഷകർ ഉറ്റുനോക്കുകയാണ്.