പാകിസ്ഥാനിൽ പതിനേഴുകാരിയായ ടിക്‌ടോക്‌ താരത്തെ വെടിവച്ച് കൊന്നു

ഇസ്ലാമാബാദ്‌: പാകിസ്ഥാനിൽ പതിനേഴുകാരിയായ ടിക്‌ടോക്‌ താരത്തെ വെടിവച്ച് കൊന്നു. ഇസ്ലാമാബാദ് സ്വദേശിയായ സനാ യൂസഫ്(17) ആണ് കൊല്ലപ്പെട്ടത്. ആക്രമി അടുത്ത ബന്ധുവാണെന്നും വീട്ടിലെ സ്ഥിരം സന്ദർശകനാണെന്നും സംശയിക്കുന്നതായി പൊലീസ് പറഞ്ഞു. ദുരഭിമാനക്കൊലയാണെന്നും സംശയമുണ്ട്‌.

തിങ്കളാഴ്‌ച സെക്ടർ ജി-13 ലെ വീട്ടിലാണ് സംഭവം. വീട്ടിലെത്തിയ ആക്രമി സനയ്ക്ക് നേരെ വെടിയുതിർക്കുകയായിരുന്നു. തുടർന്ന് പ്രതി സ്ഥലത്ത് നിന്നും ഓടി രക്ഷപ്പെട്ടു. വളരെ അടുത്തുനിന്നുമാണ് സനയ്ക്ക് വെടിയേറ്റത്. രണ്ട് തവണ വെടിയേറ്റ സന സംഭവസ്ഥലത്ത് തന്നെ മരിച്ചു.

അപ്പർ ചിത്രാലിൽ നിന്നുള്ള കണ്ടന്റ് ക്രിയേറ്ററാണ് സന. ഇൻസ്റ്റാഗ്രാമിൽ സനയ്ക്ക് ഏകദേശം 5 ലക്ഷത്തോളം ഫോളോവേഴ്‌സുണ്ട്. ടിക് ടോക്ക് വീഡിയോകളിലൂടെയാണ് സന പ്രശസ്തയായത്. ചത്രാളിലെ സാമൂഹിക പ്രവർത്തകന്റെ മകളായ ഇവർ സാമൂഹിക മാധ്യമ അക്കൗണ്ടുകൾ വഴി സ്ത്രീകളുടെ അവകാശങ്ങൾ, വിദ്യാഭ്യാസ അവബോധം തുടങ്ങിയവയെക്കുറിച്ച് വീഡിയോകൾ പങ്കുവച്ചിരുന്നു.

പാകിസ്ഥാനിൽ യുവ വനിതാ ഇൻഫ്ലുവൻസർമാരെ ലക്ഷ്യം വച്ചുള്ള ഈ വർഷത്തെ രണ്ടാമത്തെ സംഭവമാണിത്. ടിക് ടോക്കിൽ വീഡിയോകൾ പോസ്റ്റ് ചെയ്തതിന്റെ പേരിൽ ക്വെറ്റയിൽ 15 വയസുകാരിയെ അച്ഛനും അമ്മാവനും ചേർന്ന് കൊലപ്പെടുത്തിയതായി ഈ വര്‍ഷം ആദ്യം റിപ്പോര്‍ട്ട് ചെയ്തിരുന്നു.