യുകെ കുടിയേറ്റ നയങ്ങളിൽ മാനുഷിക പരിഷ്കാരം വേണം; ലണ്ടനിൽ ഇന്ത്യൻ സംഘടനകളുടെ നേതൃത്വത്തിൽ വൻ സംഗമം

ലണ്ടൻ: യുണൈറ്റഡ് കിംഗ്ഡത്തിലെ കുടിയേറ്റ-പൗരത്വ നയങ്ങളിൽ അടിയന്തിര പരിഷ്കാരങ്ങൾ ആവശ്യപ്പെട്ട് കുടിയേറ്റ തൊഴിലാളികളും അന്താരാഷ്ട്ര വിദ്യാർത്ഥികളും ജനപ്രതിനിധികളും ലണ്ടനിലെ പാർലമെന്റ് മന്ദിരത്തിൽ (ഹൗസസ് ഓഫ് പാർലമെന്റ്) ഒത്തുകൂടി ലോബിയിംഗ് സെഷൻ നടത്തി. ഇന്ത്യൻ വർക്കേഴ്സ് അസോസിയേഷൻ ഗ്രേറ്റ് ബ്രിട്ടൻ , സ്റ്റുഡന്റ്സ് ഫെഡറേഷൻ ഓഫ് ഇന്ത്യ യുകെ എന്നിവർ സംയുക്തമായാണ് ഈ പരിപാടി സംഘടിപ്പിച്ചത്.

ബ്രിട്ടനിലെ നിലവിലെ കുടിയേറ്റ നിയമങ്ങളിലെ അനീതികൾ തുറന്നുകാട്ടുന്ന "ചലഞ്ചിംഗ് ഇൻജസ്റ്റിസ്: ഫോർ ഫെയർ ആന്റി-റേസിസ്റ്റ് ഇമിഗ്രേഷൻ ആൻഡ് നാഷണാലിറ്റി ലോസ് ഇൻ ബ്രിട്ടൻ" എന്ന പുതിയ റിപ്പോർട്ട് ചടങ്ങിൽ പ്രകാശനം ചെയ്തു. 2026 മേയ് മാസത്തിൽ ആരോഗ്യമേഖല, ഐടി, റീറ്റെയ്ൽ, ഹോസ്പിറ്റാലിറ്റി, ട്രാൻസ്പോർട്ട് തുടങ്ങിയ രംഗങ്ങളിലെ തൊഴിലാളികൾക്കിടയിലും അന്താരാഷ്ട്ര വിദ്യാർത്ഥികൾക്കിടയിലും നടത്തിയ ഒരു മാസത്തെ സർവേയുടെ കണ്ടെത്തലുകളാണ് ഈ റിപ്പോർട്ടിലുള്ളത്. സ്ഥിരതാമസത്തിനുള്ള കാലാവധി 5 വർഷത്തിൽ നിന്ന് 10 വർഷമായി ഉയർത്തുന്നത് സമൂഹത്തിൽ കടുത്ത അസമത്വത്തിനും ചൂഷണത്തിനും കാരണമാകുമെന്ന് റിപ്പോർട്ട് വ്യക്തമാക്കുന്നു.

ബംഗ്ലാദേശ് വർക്കേഴ്സ് കൗൺസിൽ, ദി മോണിറ്ററിംഗ് ഗ്രൂപ്പ്, പ്രക്സിസ് തുടങ്ങിയ പ്രമുഖ സംഘടനകളുടെ പ്രതിനിധികൾക്കൊപ്പം ബ്രിട്ടീഷ് പാർലമെന്റ് അംഗങ്ങളായ ജോൺ മക്ഡൊണൽ, റൂത്ത് കാഡ്ബറി, ബാരനസ് റൂത്ത് ലിസ്റ്റർ, ഡാനി ബീൽസ് എന്നിവരും ഈ സെഷനിൽ പങ്കെടുത്തു. ചടങ്ങ് ഉദ്ഘാടനം ചെയ്തുകൊണ്ട് ഐഡബ്ല്യുഎ (ജിബി) നാഷണൽ പ്രസിഡന്റ് ഹർസേവ് ബെയിൻസ് കുടിയേറ്റ സമൂഹങ്ങളെ ബാധിക്കുന്ന ജനവിരുദ്ധ നയങ്ങൾക്കെതിരെ ഒന്നിച്ച് പോരാടേണ്ടതിന്റെ ആവശ്യകത ഊന്നിപ്പറഞ്ഞു.

റിപ്പോർട്ട് അവതരിപ്പിച്ച പ്രിയ ജോയ്‌സ് രാജൻ കുടിയേറ്റക്കാർ നേരിടുന്ന കടുത്ത മാനസിക-സാമ്പത്തിക ബുദ്ധിമുട്ടുകൾക്കായുള്ള സർവേ കണക്കുകൾ പുറത്തുവിട്ടു. സർവേയിൽ പങ്കെടുത്തവരിൽ 60 ശതമാനം പേരും വിസ നടപടികളിൽ കടുത്ത ബുദ്ധിമുട്ടുകൾ നേരിടുമ്പോൾ, 70 ശതമാനത്തോളം പേരുടെ മാനസികാരോഗ്യത്തെ ഈ നയങ്ങൾ ദോഷകരമായി ബാധിച്ചു. കൂടാതെ 40 ശതമാനത്തിലധികം പേർക്ക് ഉയർന്ന വിസ ഫീസും ഇമിഗ്രേഷൻ ഹെൽത്ത് സർചാർജും വലിയ സാമ്പത്തിക ബാധ്യതയായി മാറിയിരിക്കുകയാണ്.

വരുമാനം കൂടിയവർക്ക് മാത്രം അനുകൂലമായ പുതിയ "earned settlement" മാതൃക സാധാരണക്കാരായ തൊഴിലാളികളെയും വിദ്യാർത്ഥികളെയും ദീർഘകാല അനിശ്ചിതാവസ്ഥയിലാക്കുമെന്ന് പ്രിയ രാജൻ മുന്നറിയിപ്പ് നൽകി. ഈ നയങ്ങൾ കുടിയേറ്റക്കാരെ വ്യക്തിപരമായി തകർക്കുക മാത്രമല്ല, ബ്രിട്ടനിലെ പൊതുസേവനങ്ങളെയും സർവകലാശാലകളെയും പ്രാദേശിക സമ്പദ്‌വ്യവസ്ഥയെയും ദോഷകരമായി ബാധിക്കുന്നുണ്ടെന്നും അവർ കൂട്ടിച്ചേർത്തു.

ഇൻഡെഫിനിറ്റ് ലീവ് ടു റിമെയ്ൻ നേടുന്നതിനുള്ള നിലവിലെ 5 വർഷത്തെ കാലാവധി നിലനിർത്തുക, വിസ-ആരോഗ്യ പരിപാലന നിരക്കുകൾ കുറയ്ക്കുക, ചൂഷണങ്ങൾക്കെതിരെയുള്ള സംരക്ഷണം ശക്തമാക്കുക, പഠനാനന്തര തൊഴിൽ വഴികൾ സംരക്ഷിക്കുക എന്നിവയാണ് റിപ്പോർട്ടിലൂടെ സംഘടനകൾ പാർലമെന്റിനോട് പ്രധാനമായും ആവശ്യപ്പെടുന്നത്.

ബ്രിട്ടീഷ് കുടിയേറ്റ നിയമങ്ങളുടെ വംശീയമായ ചരിത്രത്തെക്കുറിച്ച് പിസിഎസ് പ്രതിനിധി ടോണി കോൺവേ വിശദീകരിച്ചു. കുടിയേറ്റക്കാരെ വെറും അധ്വാന സ്രോതസ്സായി മാത്രം കാണുകയും അവർക്ക് തുല്യ അവകാശങ്ങൾ നിഷേധിക്കുകയും ചെയ്യുന്ന നയമാണ് ഇപ്പോഴും തുടരുന്നതെന്ന് അദ്ദേഹം വിമർശിച്ചു. എൻഎച്ച്എസ് ഉൾപ്പെടെയുള്ള മേഖലകളിൽ കുടിയേറ്റക്കാർ നൽകുന്ന സംഭാവനകൾ അവഗണിച്ചുകൊണ്ട് സ്ഥിരതാമസത്തിനുള്ള കാലാവധി നീട്ടുന്നത് തൊഴിലാളികളെ കൂടുതൽ ചൂഷണങ്ങളിലേക്ക് തള്ളിവിടുമെന്ന് അദ്ദേഹം ഓർമ്മിപ്പിച്ചു.

അന്താരാഷ്ട്ര വിദ്യാർത്ഥികൾ നേരിടുന്ന വർദ്ധിച്ചുവരുന്ന വിസ ചെലവുകളെയും പഠനാനന്തര അവസരങ്ങളിലെ അനിശ്ചിതാവസ്ഥയെയും കുറിച്ച് എസ്എഫ്ഐ യുകെയെ പ്രതിനിധീകരിച്ച് വിശാൽ ഉഷ ഉദയകുമാർ സംസാരിച്ചു. വിദേശ വിദ്യാർത്ഥികൾ ബ്രിട്ടീഷ് സർവകലാശാലകൾക്കും സമൂഹത്തിനും നൽകുന്ന വലിയ സംഭാവനകളെ രാജ്യം കേവലം താൽക്കാലിക സാമ്പത്തിക ലാഭത്തിനായി മാത്രം കാണരുതെന്ന് അദ്ദേഹം വാദിച്ചു.

ദി മോണിറ്ററിംഗ് ഗ്രൂപ്പിന് വേണ്ടി സംസാരിച്ച മറിയം, പുതിയ വിസ പരിഷ്കാരങ്ങൾ മനുഷ്യാവകാശ ലംഘനങ്ങളിലേക്ക് നയിക്കുമെന്ന് ആശങ്ക പ്രകടിപ്പിച്ചു. വിസ സ്പോൺസർഷിപ്പിനെ ദീർഘകാലം ആശ്രയിക്കേണ്ടി വരുന്നത് തൊഴിലാളികൾക്ക് നേരെയുള്ള അതിക്രമങ്ങൾ പുറത്തുപറയുന്നതിൽ നിന്ന് അവരെ തടയും. ഇത് യൂറോപ്യൻ കൺവെൻഷൻ ഓൺ ഹ്യൂമൻ റൈറ്റ്സിന്റെ ആർട്ടിക്കിൾ 3, 8 എന്നിവ ഉറപ്പുനൽകുന്ന അടിസ്ഥാന മനുഷ്യാവകാശങ്ങളുടെ ലംഘനത്തിന് കാരണമായേക്കാമെന്നും അവർ പറഞ്ഞു.

ചടങ്ങിൽ പങ്കെടുത്ത കുടിയേറ്റ തൊഴിലാളികളുടെയും വിദ്യാർത്ഥികളുടെയും വ്യക്തിപരമായ അനുഭവസാക്ഷ്യങ്ങൾ ഏറെ ശ്രദ്ധേയമായി. യുകെയിൽ വർഷങ്ങളോളം പഠിച്ചിട്ടും അനിശ്ചിതാവസ്ഥ നേരിടുന്നതിനെക്കുറിച്ച് രന്യയും, ആരോഗ്യപ്രവർത്തകർക്ക് മേൽ അടിച്ചേൽപ്പിക്കുന്ന ഭീമമായ വിസ-ആരോഗ്യ ചാർജുകളെക്കുറിച്ച് രജിസ്റ്റേർഡ് നഴ്സ് ജയകൃഷ്ണനും സംസാരിച്ചു. തൊഴിൽ ചൂഷണത്തെക്കുറിച്ച് നിതുവും, കെയർ സെക്ടറിലെ പ്രതിസന്ധികളെക്കുറിച്ച് നഴ്സിംഗ് വിദ്യാർത്ഥിനി ലക്ഷ്മിയും തങ്ങളുടെ ആശങ്കകൾ പങ്കുവെച്ചു.

സ്ഥിരതാമസത്തിനുള്ള വഴി അഞ്ചിൽ നിന്ന് പത്ത് വർഷമായി നീട്ടുന്നത് കുടിയേറ്റ കുടുംബങ്ങളിലെ കുട്ടികളെ ദാരിദ്ര്യത്തിലേക്ക് തള്ളിവിടുമെന്നും കുടുംബങ്ങളുടെ സ്ഥിരത തകർക്കുമെന്നും ഐഡബ്ല്യുഎ പ്രതിനിധി ജോഗീന്ദർ ബെയിൻസ് മുന്നറിയിപ്പ് നൽകി. ഇത് വിസ-ആരോഗ്യ പരിപാലന ചെലവുകളിലൂടെ കുടുംബങ്ങളിൽ കടുത്ത സാമ്പത്തിക സമ്മർദ്ദം ഉണ്ടാക്കും.

തുടർന്ന് നടന്ന പാർലമെന്ററി ചർച്ചയിൽ പങ്കെടുത്ത എംപിമാർ കുടിയേറ്റക്കാരുടെ ആശങ്കകൾ ന്യായമാണെന്ന് അംഗീകരിച്ചു. കടുപ്പമേറിയ കുടിയേറ്റ നയങ്ങൾ കാരണം അന്താരാഷ്ട്ര വിദ്യാർത്ഥികളുടെ എണ്ണം കുറഞ്ഞത് ഉന്നത വിദ്യാഭ്യാസ സ്ഥാപനങ്ങളെ സാമ്പത്തിക പ്രതിസന്ധിയിലാക്കിയെന്നും, ഇത് തുടർന്നാൽ യുകെയുടെ കെയർ സെക്ടർ (ആരോഗ്യ പരിപാലന മേഖല) തകരുമെന്നും ജോൺ മക്ഡൊണൽ എംപി മുന്നറിയിപ്പ് നൽകി. പൊതു ഫണ്ടുകളിലേക്കുള്ള പ്രവേശനം തടയുന്ന നയങ്ങൾ കുട്ടികളുടെ ദാരിദ്ര്യം വർദ്ധിപ്പിക്കുമെന്ന് റൂത്ത് കാഡ്ബറി എംപിയും ആശങ്ക പ്രകടിപ്പിച്ചു.

കുടിയേറ്റ സമൂഹങ്ങൾക്കായി IWA-GB, SFI UK എന്നിവർ നടത്തിയ പ്രവർത്തനങ്ങളെ അഭിനന്ദിച്ച എംപിമാർ, ഈ റിപ്പോർട്ട് ഹൗസ് ഓഫ് കോമൺസ്, ഹൗസ് ഓഫ് ലോർഡ്സ് എന്നിവയിലെ അംഗങ്ങൾക്ക് ലഭ്യമാക്കുമെന്ന് ഉറപ്പുനൽകി. വരും ദിവസങ്ങളിൽ ട്രേഡ് യൂണിയനുകളെയും വിദ്യാർത്ഥി ഗ്രൂപ്പുകളെയും വംശീയ വിരുദ്ധ പ്രചാരകരെയും ഒന്നിപ്പിച്ച് സമരം ശക്തമാക്കുമെന്ന പ്രഖ്യാപനത്തോടെ ലോബിയിംഗ് സെഷൻ അവസാനിച്ചു.