വീട്ടിൽ നിന്നും ഇറക്കിവിട്ടു, ശേഷം മുങ്ങി നടന്നു; ഭർത്താവിനെ കുടുക്കാൻ ഇൻസ്റ്റ​ഗ്രാമിൽ കെണിയൊരുക്കി ഭാര്യ

പ്രയാഗ്‌രാജ്: തന്നെ വീട്ടിൽ നിന്ന് പുറത്താക്കിയ ഭർത്താവിനെ നിയമത്തിന് മുന്നിൽ എത്തിക്കാൻ ഇൻസ്റ്റഗ്രാമിൽ വ്യാജ പ്രൊഫൈലിലൂടെ കെണിയൊരുക്കി യുവതി. ഉത്തർപ്രദേശിലെ പ്രയാഗ്‌രാജ് സ്വദേശിനിയായ സോണി ത്രിപാഠിയാണ് മുങ്ങിനടന്ന ഭർത്താവ് പ്രഭുദത്തിനെ നാടകീയമായി പൊലീസിന് കൈമാറിയത്. യുവതിയെ മർദിച്ചതിനും വധഭീഷണി മുഴക്കിയതിനും ഇയാൾക്കെതിരെ പൊലീസ് കേസെടുത്തു.

നാല് വർഷം മുൻപാണ് പ്രഭുദത്ത് സോണിയെ വീട്ടിൽ നിന്ന് ഇറക്കിവിട്ടത്. പൊലീസിനെ വെട്ടിച്ച് നടന്നിരുന്ന ഇയാളെ പിടികൂടാൻ സോണി ഇൻസ്റ്റഗ്രാമിൽ ഒരു വ്യാജ പ്രൊഫൈൽ നിർമ്മിക്കുകയും പ്രഭുദത്തുമായി ബന്ധം സ്ഥാപിക്കുകയും ചെയ്തു. പ്രൊഫൈലിന് പിന്നിൽ തന്റെ ഭാര്യയാണെന്ന് അറിയാതെ പ്രഭുദത്ത് വിവാഹ വാഗ്ദാനം നൽകി. മെയ് രണ്ടിന് പ്രയാഗ്‌രാജിനടുത്തുള്ള ക്ഷേത്രത്തിൽ വെച്ച് കാണാമെന്ന് സോണി അറിയിച്ചു.

സ്ഥലത്തെത്തിയ പ്രഭുദത്തിന് മുന്നിൽ സോണി തന്റെ മുഖാവരണം നീക്കിയതോടെയാണ് കെണി തിരിച്ചറിഞ്ഞത്. ഇതോടെ സോണിയെ ക്രൂരമായി മർദിച്ച ഇയാൾ കൊലപ്പെടുത്തുമെന്ന് ഭീഷണിപ്പെടുത്തി. എന്നാൽ സമീപത്ത് തന്നെ ഒളിച്ചുനിന്നിരുന്ന സോണിയുടെ ബന്ധുക്കൾ ഇയാളെ പിടികൂടി പൊലീസിൽ ഏൽപ്പിക്കുകയായിരുന്നു.