മൂന്നുമാസം പ്രായമുള്ള ഇരട്ട പെൺമക്കളെ കൊലപ്പെടുത്തി യുവതി; പിന്നാലെ ആത്മഹത്യാ ശ്രമം

ബം​ഗളൂരു: മൂന്നുമാസം പ്രായമായ ഇരട്ട പെൺമക്കളെ കൊലപ്പെടുത്തിയ ശേഷം ആത്മഹത്യക്ക് ശ്രമിച്ച് യുവതി. ബം​ഗളൂരുവിലെ വജ്രഹള്ളി മേഖലയിൽ ബിസിസി എച്ച്എസ് ലേഔട്ടിലെ വീട്ടിൽ ചൊവ്വ ഉച്ചയോ‌ടെയാണ് സംഭവം. രാമലിം​ഗപ്പയുടെ ഭാര്യ ഉമാദേവി ഐവിഎഫ് ചികിത്സയിലൂടെയാണ് ​ഗർഭം ധരിച്ചത്. ഈ വർഷം മെയ് 5 നാണ് ഇവർ ഇട്ട പെൺകുട്ടികൾക്ക് ജന്മം നൽകിയത്.

ഇന്നലെ ഉച്ചയോടെ വീട്ടിലെത്തിയ രാമലിം​ഗപ്പ മുറി അകത്തുനിന്ന് പൂട്ടിയ നിലയിൽ കണ്ടെത്തി. ഉടനെ വാതിൽ തുറന്ന് നോക്കുമ്പോൾ ഉമാദേവി ആത്മഹത്യയ്ക്ക് ശ്രമിക്കുന്ന നിലയിലായിരുന്നുവെന്ന് രാമലിം​ഗപ്പ പറയുന്നു. മുറിയിൽ കുട്ടികളെ മരിച്ച നിലയിലുമാണ് കണ്ടതെന്നും ഇയാൾ പറഞ്ഞു. സംഭവത്തിൽ രാമലിം​ഗപ്പ പൊലീസിൽ പരാതി നൽകി. കുട്ടികളെ വെള്ളത്തിൽ മുക്കിയാകാം കൊലപ്പെടുത്തിയതെന്നാണ് പ്രാഥമിക നി​ഗമനം.

പ്രസവത്തിന് ശേഷം ഉമാദേവിയുടെ പെരുമാറ്റത്തിൽ മാറ്റമുണ്ടായിരുന്നതായി കുടുംബം പറയുന്നു. കുട്ടികളോ‌ട് താൽപര്യമില്ലാത്ത രീതിയിലായിരുന്നു പെരുമാറ്റമെന്നും മക്കളെ അനാഥാലയത്തിലേയ്ക്ക് അയക്കുന്നതിനെ കുറിച്ചും പലതവണ സംസാരിച്ചിരുന്നതായും കുടുംബം ആരോപിച്ചു. ശേഷം ഉമാദേവിയെ മാനസികാരോ​ഗ്യ ചികിത്സയ്ക്ക് വിധേയയമാക്കുകയും ചെയ്തിരുന്നു. പ്രസവാനന്തര വിഷാദവും ഹോർമോൺ വ്യതിയാനവുമാണ് പെരുമാറ്റത്തിലെ മാറ്റത്തിന് കാരണമെന്നാണ് ഡോക്ടർമാരുടെ വിലയിരുത്തൽ. സംഭവത്തിൽ കേസെടുത്ത പൊലീസ് അന്വേഷണം നടത്തി വരികയാണ്.