അജ്ഞാതരായ ഭീരുക്കൾ: ട്രോളുകൾക്കെതിരെ തൃഷ‍‍

ചെന്നൈ : സമൂഹമാധ്യമങ്ങളിലൂടെ വ്യാപകമായി ട്രോളുന്നവർക്കെതിരെ കുറിപ്പുമായി നടി തൃഷ. അജ്ഞാതരായ ഭീരുക്കളെന്ന് ട്രോളൻമാരെ വിളിച്ച നടി ഇൻസ്റ്റ​ഗ്രാം സ്റ്റോറിയിലൂടെയാണ് അധിക്ഷേപകരമായി പോസ്റ്റുകൾ പങ്കുവയ്ക്കുന്നവർക്കെതിരെ രം​ഗത്തെത്തിയത്.

ടോക്സിക് മനുഷ്യൻമാരെ, നിങ്ങൾക്ക് എങ്ങനെയാണ് ജീവിക്കാനും സുഖമായി ഉറങ്ങാനും സാധിക്കുന്നത്. സോഷ്യൽ മീഡിയയിലിരുന്ന് മറ്റുള്ളവരെപ്പറ്റി അസംബന്ധമായ കാര്യങ്ങൾ പങ്കുവയ്ക്കുന്നതാണോ നിങ്ങളുടെ ദൈനം​ദിന കൃത്യം. നിങ്ങളെപ്പറ്റിയും നിങ്ങൾക്കൊപ്പം ജീവിക്കുന്നവരെപ്പറ്റിയും ഓർത്ത് സഹതാപം തോന്നുന്നു. അജ്ഞാതരായ ഭീരുക്കൾ- തൃഷ ഇൻസ്റ്റ​ഗ്രാം സ്റ്റോറിയിൽ കുറിച്ചു.

കഴിഞ്ഞ ദിവസം പുറത്തിറങ്ങിയ അജിത് ചിത്രം ​ഗുഡ് ബാഡ് അ​ഗ്ലിയാണ് തൃഷയുടേതായി അവസാനമായി പുറത്തുവന്നത്. ചിത്രത്തിലെ അഭിനയത്തിന് തൃഷയ്ക്കെതിരെ വ്യാപകമായി ട്രോളുകളും വിമർശനങ്ങളും ഉയർന്നിരുന്നു. സ്റ്റോറിയിൽ ചിത്രത്തെപ്പറ്റി തൃഷ ഒന്നും പറയുന്നില്ലെങ്കിലും ഇത് സിനിമ പുറത്തുവന്നതിനുശേഷമുള്ള വിമർശനങ്ങൾക്കുള്ള മറുപടിയാണെന്നാണ് ഒരു വിഭാ​ഗം പറയുന്നത്. തൃഷയുടെ ഫാൻപജുകളും സ്റ്റോറി പങ്കുവച്ചിട്ടുണ്ട്.