വിജയ്‍യുടെ റാലിക്കിടെ വന്‍ ദുരന്തം; തിക്കിലും തിരക്കിലും പെട്ട് 30 പേര്‍ മരിച്ചതായി വിവരം

ചെന്നൈ : നടനും തമിഴക വെട്രി കഴകം നേതാവുമായ വിജയ്‍യുടെ റാലിക്കിടെ തിക്കിലും തിരക്കിലും പെട്ട് അപകടം. നിരവധി പേർ കുഴഞ്ഞുവീണു. 30 പേർ മരിച്ചതായി മാധ്യമങ്ങള്‍ റിപ്പോര്‍ട്ട് ചെയ്തു. തമിഴ്നാട്ടിലെ കരൂരിൽ നടന്ന റാലിക്കിടെയായിരുന്നു അപകടം. ​ദുരന്തമുണ്ടായതോടെ വിജയ് പ്രസം​ഗം പൂർത്തിയാക്കാതെ മടങ്ങി.

കുട്ടികൾ ഉൾപ്പെടെയുള്ളവരാണ് കുഴഞ്ഞുവീണതെന്നും മൂന്ന് കുട്ടികൾ ഐസിയുവിലാണെന്നും തമിഴ് പ്രാദേശിക മാധ്യമങ്ങൾ റിപ്പോർട്ട് ചെയ്തു. മരണസംഖ്യ ഉയര്‍ന്നേക്കുമെന്നാണ് വിവരം. തമിഴ്നാട് മന്ത്രിമാര്‍ സംഭവസ്ഥലത്തേക്കും ആശുപത്രിയിലേക്കും തിരിച്ചു. മന്ത്രി സെന്തില്‍ ബാലാജി കരൂര്‍ ആശുപത്രിയിലെത്തി.

രാവിലെ മുതലാണ് വിജയ്‍യുടെ റാലി ആരംഭിച്ചത്. ഉച്ചയ്ക്ക് കരൂർ വേലുച്ചാമിപുരത്ത് വിജയ് എത്തുമെന്നാണ് അറിയിച്ചിരുന്നതെങ്കിലും എത്തിയപ്പോൾ വൈകിട്ട് 6 മണിയായെന്നും തമിഴ് മാധ്യമങ്ങൾ റിപ്പോർട്ട് ചെയ്യുന്നു.