കുട്ടികളുടെ സോഷ്യൽ മീഡിയ വിലക്ക്: ഹർജി പരി​ഗണിക്കാതെ സുപ്രീംകോടതി, കേന്ദ്രത്തെ സമീപിക്കാൻ നിർദേശം

ന്യൂഡൽഹി : 13 വയസിൽ താഴെയുള്ള കുട്ടികൾക്ക് സോഷ്യൽ മീഡിയ ഉപയോ​ഗം വിലക്കണമെന്ന പൊതുതാൽപര്യ ഹർജി പരി​ഗണിക്കാൻ വിസമ്മതിച്ച് സുപ്രീംകോടതി. ഇത്തരം വിഷയങ്ങളിൽ നയപരമായ തീരുമാനങ്ങളെടുക്കേണ്ടത് സർക്കാരാണെന്ന് പറഞ്ഞ കോടതി കേന്ദ്ര സർക്കാരിനെ സമീപിക്കാനും ഹർജിക്കാരോട് നിർദേശിച്ചു.

ജസ്റ്റിസുമാരായ ബി ആർ ​ഗവായ്, എജി മാസിഹ് എന്നിവരടങ്ങിയ ബെഞ്ചിന്റേതാണ് നിർദേശം. സെപ് ഫൗണ്ടേഷൻ എന്ന സംഘടനയാണ് 13 വയസിൽ താഴെയുള്ള കുട്ടികളുടെ സോഷ്യൽ മീഡിയ ഉപയോ​ഗം വിലക്കണമെന്നു കാണിച്ച് ഹർജി നൽകിയത്. സോഷ്യൽ മീഡിയ കുട്ടികളിലുണ്ടാക്കുന്ന മാനസിക- ശാരീരിക ആഘാതങ്ങൾ ചൂണ്ടിക്കാട്ടിയായിരുന്നു ഹർജി. സോഷ്യൽ മീഡിയയുടെ ഉപയോഗം കുട്ടികളിൽ വിഷാദം, ആത്മഹത്യാ പ്രവണത എന്നിവയുൾപ്പെടെയുള്ളവ വർധിക്കുന്നതിന് കാരണമായിട്ടുണ്ടെന്ന് ഹർജിയിൽ പറയുന്നു.

എന്നാൽ ഇത്തരം വിഷയങ്ങൾ പൊതുവായി പരി​ഗണിക്കേണ്ടതാണെന്നു നിരീക്ഷിച്ച കോടതി ഹർജി പരി​ഗണിക്കാൻ വിസമ്മതിക്കുകയായിരുന്നു.