റെയിൽവേ സ്റ്റേഷനിലെ ടിക്കറ്റ് കൗണ്ടറിലെ ഗ്രില്ലിൽ പാമ്പ്; യാത്രക്കാരും ജീവനക്കാരും ഭയന്നോടി

താനെ: താനെയിലെ തിരക്കേറിയ ഡോംബിവാലി റെയിൽവേ സ്റ്റേഷനിൽ ശനിയാഴ്ച വൈകുന്നേരം വലിയൊരു പാമ്പിനെ കണ്ടത് യാത്രക്കാർക്കിടയിൽ പരിഭ്രാന്തി പരത്തി.

ടിക്കറ്റ് കൗണ്ടറിന് മുകളിലെ ഗ്രില്ലിൽ പാമ്പിനെ കണ്ടതോടെ യാത്രക്കാർ ഭയന്നോടുകയും, ടിക്കറ്റ് വിതരണ കൗണ്ടറിനുള്ളിലുണ്ടായിരുന്ന റെയിൽവേ ജീവനക്കാർ പരിഭ്രാന്തരായി പുറത്തേക്ക് ഓടുകയും ചെയ്തു.

വിവരമറിഞ്ഞതിനെത്തുടർന്ന് ഉടൻ തന്നെ ഒരു പാമ്പ് പിടുത്തക്കാരനെ സ്ഥലത്തെത്തിച്ചു. ഇദ്ദേഹം പാമ്പിനെ വളരെ സമർത്ഥമായി പിടികൂടുകയും പിന്നീട് അതിനെ ജനവാസമില്ലാത്ത ഉൾവനമേഖലയിൽ സുരക്ഷിതമായി തുറന്നുവിടുകയും ചെയ്തു.

ടിക്കറ്റ് കൗണ്ടറിന് സമീപത്തുള്ള ഓവുചാലിലൂടെയാകാം പാമ്പ് സ്റ്റേഷൻ പരിസരത്തേക്ക് പ്രവേശിച്ചതെന്ന് റെയിൽവേ അധികൃതർ പ്രാഥമിക നിഗമനത്തിൽ വ്യക്തമാക്കി.