ഡൽഹി യൂണിവേഴ്സിറ്റിയിലും സ്വാതന്ത്ര്യത്തിന്റെയും ജനാധിപത്യത്തിന്റെയും സോഷ്യലിസത്തിന്റെയും പതാക പാറും

ന്യൂഡൽഹി: വൈകാതെതന്നെ ഡൽഹി യൂണിവേഴ്സിറ്റിയിലും സ്വാതന്ത്ര്യത്തിന്റെയും ജനാധിപത്യത്തിന്റെയും സോഷ്യലിസത്തിന്റെയും പതാക പാറിപ്പറക്കുമെന്ന്‌ എസ്എഫ്ഐ അഖിലേന്ത്യാ പ്രസിഡന്റ്‌ ആദർശ് എം സജി.

'കേവലം ആയിരത്തിൽ താഴെ വോട്ടിൽ നിന്ന് എസ്.എഫ്.ഐ-ക്ക് ഇന്ന് പതിനായിരം വോട്ടിലേക്ക് എത്താൻ സാധിച്ചിട്ടുണ്ടെങ്കിൽ, അധികം വൈകാതെ തന്നെ ഡൽഹി യൂണിവേഴ്സിറ്റി യൂണിയൻ തിരഞ്ഞെടുപ്പിൽ സ്വാതന്ത്ര്യത്തിന്റെയും ജനാധിപത്യത്തിന്റെയും സോഷ്യലിസത്തിന്റെയും പതാക പാറിപ്പറക്കും.ഡൽഹി സർവകലാശാലയ്ക്ക് കീഴിലെ വിവിധ കാമ്പസ് യൂണിയൻ തിരഞ്ഞെടുപ്പിൽ വിജയിക്കാൻ സാധിച്ചതും, പല കാമ്പസുകളിലും മികച്ച പ്രകടനം കാഴ്ചവെക്കാൻ കഴിഞ്ഞതും അഭിമാനകരമാണ്.സഖാക്കളേ, നാം മുന്നോട്ട്! '-– ആദർശ് എം സജി ഫേസ്‌ബുക്കിൽ കുറിച്ചു.

ഡൽഹി സർവകലാശാല വിദ്യാർഥി യൂണിയൻ തെരഞ്ഞെടുപ്പിൽ എസ്‌എഫ്‌ഐക്ക്‌ മികച്ച നേട്ടമാണുണ്ടായത്‌. ഡൽഹി സ്‌കൂൾ ഓഫ്‌ സോഷ്യൽ വർക്കിൽ മത്സരിച്ച മുഴുവൻ സീറ്റിലും സാക്കിർ ഹുസൈൻ ഡൽഹി കോളേജില്‍ മൂന്ന് പ്രധാന പോസ്റ്റിൽ രണ്ടും എസ്‌എഫ്‌ഐ ജയിച്ചു.

​ഡൽഹി സ്‌കൂൾ ഓഫ്‌ സോഷ്യൽ വർക്കിൽ പ്രസിഡന്റായി --ഹിമാൻഷു പാണ്ഡെയും ജനറൽ സെക്രട്ടറിയായി മപാനി ലാംഗുവും തെരഞ്ഞെടുക്കപ്പെട്ടു. ആലപ്പുഴ ചേർത്തല സ്വദേശി എസ്‌ ഗ‍ൗരി ശങ്കരിയടക്കം നാല്‌ എക്‌സിക്യൂട്ടീവ്‌ ക‍ൗൺസിലര്‍മാരും ജയിച്ചു. ആർഎസ്‌എസ്‌ അനുകൂലികളായ കോളേജ്‌ അധികൃതർ നാമനിർദേശ പത്രിക തള്ളിയതിനാലാണ് കാന്പസിലെ സെൻട്രൽ ക‍ൗൺസിലർ സ്ഥാനം എസ്‌എഫ്‌ഐക്ക്‌ നഷ്‌ടമായത്‌. സർവകലാശാലയിൽ പലയിടത്തും എസ്‌എഫ്‌ഐ സ്ഥാനാർഥികളുടെ പത്രിക തള്ളിയിരുന്നു.

എബിവിപി കുത്തകയാക്കിയിരുന്ന സാക്കിർ ഹുസൈൻ കോളേജിൽ ജനറൽ സെക്രട്ടറിയായി നാസിം ഖാനും സെൻട്രൽ ക‍ൗൺസിലറായി മുഹമ്മദ്‌ സായിദും ജയിച്ചു. ജോയിന്റ്‌ സെക്രട്ടറി സ്ഥാനം എട്ട്‌ വോട്ടിന് എസ്‌എഫ്‌ഐക്ക്‌ നഷ്ടമായി.

സർവകലാശാല യൂണിയൻ പ്രസിഡന്റ്‌, ജനറൽ സെക്രട്ടറി, ജോയിന്റ്‌ സെക്രട്ടറി സ്ഥാനങ്ങള്‍ എബിവിപി നേടി. വൈസ്‌ പ്രസിഡന്റ്‌ സ്ഥാനം എൻഎസ്‌യുഐയും വിജയിച്ചു.ഇടതുപക്ഷ വിദ്യാർഥി സഖ്യത്തിന്റെ ഭാഗമായി ഡൽഹി സർവകലാശാല ജനറൽ സെക്രട്ടറി സ്ഥാനത്ത് മികച്ച മത്സരം നടത്തിയ എസ്‌എഫ്‌ഐ പ്രവർത്തക അഭിനന്ദന 9535 വോട്ട് നേടി. ഡല്‍ഹിസര്‍വകലാശാല യൂണിയനില്‍ സംഘടനയെ നിര്‍ണായക ശക്തിയായി മാറ്റിയ വിദ്യാര്‍ഥികളെ അഭിനന്ദിക്കുന്നതായി എസ്എഫ്ഐ ഡല്‍ഹി ഘടകം പ്രസിഡന്റ് സൂരജ് ഇളമണും സെക്രട്ടറി ഐഷി ഘോഷും പറഞ്ഞു.