'പരസ്യക്കൊള്ള': കർണാടക സർക്കാരിന്റെ പരസ്യഫണ്ടിന്റെ 69 ശതമാനവും നാഷണൽ ഹെറാൾഡിന്

ബം​ഗളൂരു : കോൺഗ്രസ് ഓൺലൈൻ പത്രമായ നാഷണൽ ഹെറാൾഡിന് കർണാടക സർക്കാർ കണക്കില്ലാതെ പൊതു പരസ്യ ഫണ്ട് അനുവദിച്ചതിൽ വിവാദം. മറ്റെല്ലാ ദേശീയ ദിനപത്രത്തേക്കാളും കൂടുതൽ പരസ്യഫണ്ട് ദേശീയതലത്തിലും സംസ്ഥാനത്തും വായനക്കാരുടെ എണ്ണം വളരെ കുറവായ മാധ്യമത്തിന് അനുവദിച്ചതായി വിവരം പുറത്തുവന്നതോടെയാണ് വിവാദമായത്. ഇതോടെ പൊതുജനങ്ങളുടെ പണം സർക്കാർ വിനിയോ​ഗിക്കുന്നതിലെ സുതാര്യതയെക്കുറിച്ചും ചോദ്യങ്ങൾ ഉയർന്നു.

കണക്കുകൾ പ്രകാരം കർണാടകത്തിൽ നാഷണൽ ഹെറാൾഡിന് വായനക്കാരുടെ എണ്ണം വളരെ കുറവാണെന്ന് വ്യക്തമാണ്. എങ്കിലും സംസ്ഥാന സർക്കാരിന്റെ പരസ്യ ബജറ്റിൽ നിന്ന് കോടിക്കണക്കിന് രൂപ നാഷണൽ ഹെറാൾഡിന് നൽകിയതായി വ്യക്തമാക്കുന്ന രേഖകൾ മറ്റ് മാധ്യമങ്ങൾ പുറത്തുവിട്ടു.

തുടർച്ചയായ രണ്ട് സാമ്പത്തിക വർഷങ്ങളിൽ കർണാടകയുടെ പരസ്യ ചെലവിന്റെ ഏറ്റവും വലിയ ഒറ്റ ഗുണഭോക്താവായത് നാഷണൽ ഹെറാൾഡാണ്. 2023–24 ൽ, പത്രത്തിന് സംസ്ഥാന ഖജനാവിൽ നിന്ന് 1.90 കോടി രൂപ ലഭിച്ചു. 2024–25 ൽ, ഏകദേശം 99 ലക്ഷം രൂപ പത്രത്തിനായി അനുവദിച്ചു. നാഷണൽ ഹെറാൾഡിനേക്കാൾ സർക്കുലേഷനുള്ള മറ്റ് പല ദേശീയ പത്രങ്ങൾക്കും വളരെ കുറച്ച് ഫണ്ടേ ലഭിച്ചുള്ളൂവെന്നും ചില പ്രമുഖ മാധ്യമങ്ങൾക്ക് ചിലതിന് നാഷണൽ ഹെറാൾഡിന് അനുവദിച്ചതിന്റെ പകുതി പോലും ലഭിച്ചില്ലെന്നും റിപ്പോർട്ടുകൾ വ്യക്തമാക്കുന്നു.

2024–25 ൽ മാത്രം കർണാടക സർക്കാർ ദേശീയ തലത്തിലുള്ള പത്രങ്ങളിലെ പരസ്യങ്ങൾക്കായി 1.42 കോടി രൂപ ചെലവഴിച്ചതായാണ് റിപ്പോർട്ട്. ഇതിൽ 69 ശതമാനവും നാഷണൽ ഹെറാൾഡിനാണ് നൽകിയത്. അതേസമയം നിരവധി പ്രമുഖ ദേശീയ ദിനപത്രങ്ങൾക്ക് ഇതേ കാലയളവിൽ ഒരു വിഹിതവും ലഭിച്ചിട്ടില്ലെന്നും റിപ്പോർട്ടുണ്ട്. നികുതിദായകരുടെ പണം യഥാർഥ പ്രചാരണത്തിനോ പൊതു കാര്യ ​​വേണ്ടി ഉപയോഗിക്കുന്നതിനുപകരം രാഷ്ട്രീയമായി ബന്ധപ്പെട്ട ഒരു പ്രസിദ്ധീകരണത്തെ സാമ്പത്തികമായി പിന്തുണയ്ക്കുന്നതിനാണ് ഉപയോഗിക്കുന്നതെന്ന് വിമർശകർ ആരോപിക്കുന്നു.

നാഷണൽ ഹെറാൾഡ് പത്രത്തിന്റെ മാതൃ കമ്പനിയായ അസോസിയേറ്റഡ് ജേണൽസ് ലിമിറ്റഡുമായി (എജെഎൽ) ബന്ധപ്പെട്ട എൻഫോഴ്‌സ്‌മെന്റ് ഡയറക്ടറേറ്റിന്റെ കള്ളപ്പണം വെളുപ്പിക്കൽ കേസ് നിലനിൽക്കുന്നുണ്ട്. കോൺഗ്രസ് നേതാക്കളായ രാഹുൽ ഗാന്ധിയ്ക്കും സോണിയ ഗാന്ധിയ്ക്കും കേസിൽ നോട്ടീസ് അയച്ചിരുന്നു. നാഷണൽ ഹെറാൾഡിനും യംഗ് ഇന്ത്യയ്ക്കും നൽകിയ സംഭാവനകളുമായി ബന്ധപ്പെട്ട വിശദമായ സാമ്പത്തിക രേഖകൾ ആവശ്യപ്പെട്ട് ഡൽഹി പോലീസിന്റെ സാമ്പത്തിക കുറ്റകൃത്യ വിഭാഗം കർണാടക ഉപമുഖ്യമന്ത്രി ഡി കെ ശിവകുമാറിനും സഹോദരൻ ഡി കെ സുരേഷിനും നോട്ടീസ് അയച്ചിരുന്നു. സ്വത്തുക്കളുടെ ധനസഹായത്തിലും കൈമാറ്റത്തിലും ക്രമക്കേടുകൾ നടന്നിട്ടുണ്ടെന്ന് ആരോപിക്കുന്ന അന്വേഷണത്തിന്റെ ഭാഗമായിട്ടാണ് ഇത്.

എന്നാൽ നാഷണൽ ഹെറാൾഡ് ഒരു ദേശീയ പൈതൃകമാണെന്നും മാധ്യമങ്ങൾക്ക് ഫണ്ട് നൽകിയാൽ മറ്റ് മാധ്യമങ്ങൾക്ക് എന്ത് പ്രശ്‌നമാണുള്ളതെന്നും ചോദിച്ച് നടപടിയെ ന്യായീകരിക്കാൻ ശ്രമിക്കുകയാണ് കോൺ​ഗ്രസ്.