വില 60 ലക്ഷം; അസമിൽ അപൂർവ ഇനം പല്ലിയെ വിൽക്കാൻ ശ്രമിച്ച 3 പേർ പിടിയിൽ

ദിസ്പൂർ : അപൂർവ ഇനം പല്ലിയെ വൻ വിലയ്ക്ക് വിൽക്കാൻ ശ്രമിച്ച 3 പേരെ അസം പൊലീസ് പിടികൂടി. ദിബ്രു​ഗഡിൽ നിന്നാണ് വെള്ളിയാഴ്ച ഇവരെ പിടികൂടിയത്. ഇവരിൽ നിന്ന് അപൂർവ ഇനത്തിൽപ്പെട്ട 11 ടോക്കായ് ​ഗെക്കോ പല്ലികളെയും കണ്ടെത്തി. 1972ലെ വന്യജീവി സംരക്ഷ നിയമപ്രകാരം ടോക്കായ് ​ഗെക്ക പല്ലികളെ പിടികൂടുന്നതും വിൽക്കുന്നതും ശിക്ഷാർഹമാണ്. സംരക്ഷിത വിഭാ​ഗത്തിലുൾപ്പെടുന്ന ഇവയെ പിടികൂടുന്നതിന് 7 വർഷം വരെ തടവ് ലഭിക്കാവുന്ന കുറ്റമാണ്.

ഇന്ത്യയിൽ അസമിലും അരുണാചൽ പ്രദേശിലും ചിലയിടങ്ങളിൽ മാത്രമാണ് ഇവയുള്ളത്. ​ദക്ഷിണേഷ്യൻ മാർക്കറ്റിൽ എറെ ആവശ്യക്കാരുള്ള ടോക്കായ് ​ഗെക്കോകൾക്ക് 60 ലക്ഷം രൂപയോളം വിലയുണ്ട്. ദേബാശിഷ് ദൗത്തിയ (34), മനാഷ് ദൗത്തിയ (28), ​ദീപാങ്കർ ഘർപാലിയ (40) എന്നിവരാണ് പിടിയിലായത്. അരുണാചൽ പ്രദേശിൽ നിന്നാണ് ഇവയെ കൊണ്ടുവന്നതെന്നും ഒന്നിന് 60 ലക്ഷം എന്ന നിരക്കിൽ വിൽക്കാനായിരുന്നു തീരുമാനമെന്നും പ്രതികൾ പൊലീസിനോട് പറഞ്ഞു. അന്വേഷണത്തിനായി അസം പൊലീസ് സ്പെഷ്യൽ ടാസ്ക് ഫോഴ്സ് രൂപീകരിച്ചിട്ടുണ്ട്.