പാർടിക്ക് ഉപരിയായി ഒരു ഇമേജും താൻ ഉണ്ടാക്കാറില്ല; ഭയന്നോടില്ലെന്ന് വേണു​ഗോപാൽ; ലീ​ഗിന്റെ സമ്മർദത്തിൽ പ്രതികരണമില്ല

ന്യൂഡൽഹി: മുഖ്യമന്ത്രിയായി വി ഡി സതീശനെ തെരഞ്ഞെടുത്തതിന് പിന്നാലെ പരോക്ഷ വിമർശനവുമായി എഐസിസി ജനറൽ സെക്രട്ടറി കെ സി വേണു​ഗോപാൽ. കോൺ​ഗ്രസ് പാർടിക്ക് ഉപരിയായി ഒരു ഇമേജും താൻ ഉണ്ടാക്കാറില്ലെന്നും കടന്നാക്രമണങ്ങളിൽ ഭയന്നോടില്ലെന്നും വേണു​ഗോപാൽ പറഞ്ഞു. ഡൽഹിയിൽ മാധ്യമങ്ങളോട് പ്രതികരിക്കുകയായിരുന്നു അദ്ദേഹം. എന്നാൽ മുസ്ലിംലീ​ഗിന്റെ സമ്മർദമാണോ സതീശനെ മുഖ്യമന്ത്രിയാക്കുന്നതിൽ ഹൈക്കമാൻഡിന് സമ്മർദമായതെന്ന ചോദ്യത്തോട് വേണു​ഗോപാൽ പ്രതികരിച്ചില്ല.

ഹൈക്കമാൻഡാണ് മുഖ്യമന്ത്രി ആരാകണമെന്ന് തീരുമാനിച്ചത്, പാർടി തീരുമാനം ശിരസ്സാവഹിക്കുകയാണെന്ന് വേണു​ഗോപാൽ പറഞ്ഞു. നേതൃത്വം പല ഘടകങ്ങളും പരി​ഗണിച്ചിട്ടുണ്ടാകും. കോൺ​ഗ്രസിന് ബുദ്ധിമുട്ടുണ്ടാക്കുന്ന ഒരു തീരുമാനവും താൻ എടുക്കില്ല. ഒരു സുപ്രഭാതത്തിൽ പൊട്ടിമുളച്ചുവന്നയാളല്ല താൻ. സൈബർ വേട്ടയാടലുകളെക്കുറിച്ച് ഒന്നും പറയാനില്ല. ആക്രമിക്കുന്നവർ ഇനിയും ആക്രമിക്കട്ടെയെന്നും വേണു​ഗോപാൽ പറഞ്ഞു.

11 ദിവസം നീണ്ട പിടിവലികൾക്കും ചർച്ചകൾക്കുമൊടുവിൽ വ്യാഴം 12 മണിക്കാണ് കേരളത്തിന്റെ മുഖ്യമന്ത്രിയായി വി ഡി സതീശനെ കോൺ​ഗ്രസ് നേതൃത്വം പ്രഖ്യാപിച്ചത്. എഐസിസി ജനറൽ സെക്രട്ടറിയായ കെ സി വേണുഗോപാലും മുതിർന്ന നേതാവ് രമേശ് ചെന്നിത്തലയും രംഗത്തുണ്ടായിരുന്നെങ്കിലും കോൺഗ്രസിലും യുഡിഎഫിലും ഉടലെടുത്ത അസാധാരണ സാഹചര്യം പരിഗണിച്ച് ഹൈക്കമാൻഡ് ഈ തീരുമാനത്തിലേക്ക് നീങ്ങുകയായിരുന്നു. എഐസിസി ജനറൽ സെക്രട്ടറി ദീപ ദാസ് മുൻഷിയാണ് സതീശനെ മുഖ്യമന്ത്രിയായി പ്രഖ്യാപിച്ചത്.