പ്രധാനമന്ത്രിയെയും മുഖ്യമന്ത്രിമാരെയും നീക്കം ചെയ്യാനുള്ള ബില്ലുകൾ: റിപ്പോർട്ട് നൽകാൻ സമയം ചോദിച്ച് പാർലമെന്ററി സമിതി

ന്യൂഡൽഹി: അറസ്റ്റിലാകുന്ന പ്രധാനമന്ത്രിയെയും മുഖ്യമന്ത്രിമാരെയും മന്ത്രിമാരെയും സ്ഥാനത്തുനിന്ന് നീക്കം ചെയ്യാൻ വ്യവസ്ഥ ചെയ്യുന്ന ബില്ലുകൾ പരിശോധിക്കുന്ന ജോയിന്റ് പാർലമെന്ററി സമിതിക്ക് റിപ്പോർട്ട് സമർപ്പിക്കാൻ കൂടുതൽ സമയം അനുവദിച്ചു. 2026-ലെ പാർലമെന്റിന്റെ കാലവർഷ സമ്മേളനത്തിന്റെ അവസാന വാരത്തിലെ ആദ്യ ദിവസം വരെയാണ് സമിതിക്ക് സമയം നീട്ടി നൽകിയത്.

വെള്ളിയാഴ്ച ലോക്സഭയിലാണ് ഇതുസംബന്ധിച്ച പ്രമേയം പാസാക്കിയത്. കഴിഞ്ഞ ഓഗസ്റ്റ് 20-ന് കേന്ദ്ര ആഭ്യന്തര മന്ത്രി അമിത് ഷായാണ് മൂന്ന് പ്രധാന ബില്ലുകൾ ലോക്സഭയിൽ അവതരിപ്പിച്ചത്. ഗൗരവകരമായ ക്രിമിനൽ കേസുകളിൽ 30 ദിവസത്തിലധികം തുടർച്ചയായി തടവിൽ കഴിയുന്ന പ്രധാനമന്ത്രിയെയും മുഖ്യമന്ത്രിമാരെയും കേന്ദ്ര-സംസ്ഥാന മന്ത്രിമാരെയും സ്ഥാനത്തുനിന്ന് നീക്കം ചെയ്യാൻ ഇത് വ്യവസ്ഥ ചെയ്യുന്നു.

ബിജെപി നേതാവ് അപരാജിത സാരംഗി അധ്യക്ഷയായ സമിതിയാണ് ബില്ലുകൾ പരിശോധിക്കുന്നത്. നേരത്തെ ബജറ്റ് സമ്മേളനത്തിൽ റിപ്പോർട്ട് നൽകാനായിരുന്നു നിർദ്ദേശിച്ചിരുന്നതെങ്കിലും കൂടുതൽ വ്യക്തത വരുത്താനായി സമയം നീട്ടി ചോദിക്കുകയായിരുന്നു. പ്രതിപക്ഷ പാർട്ടികൾ ഈ സമിതിയുടെ നടപടികൾ ബഹിഷ്കരിച്ചിരിക്കുകയാണ്.

ഒരാൾ കുറ്റവാളിയാണെന്ന് തെളിയുന്നത് വരെ നിരപരാധിയാണെന്ന നിയമതത്വം ബില്ലുകൾ ലംഘിക്കുന്നുവെന്നും, രാഷ്ട്രീയ പ്രതിയോഗികളെ വേട്ടയാടാൻ ഇത് ഉപയോഗിക്കുമെന്നും പ്രതിപക്ഷം പറഞ്ഞു. ബിൽ പ്രകാരം, 30 ദിവസത്തിലധികം തടവിൽ കഴിയുന്ന മന്ത്രിമാരെ പ്രധാനമന്ത്രിയുടെയോ മുഖ്യമന്ത്രിയുടെയോ ശുപാർശ പ്രകാരം നീക്കം ചെയ്യണം.

പ്രധാനമന്ത്രിയോ മുഖ്യമന്ത്രിയോ ആണ് തടവിലെങ്കിൽ അവർ 31-ാം ദിവസം രാജി സമർപ്പിക്കണം. പദവി ഒഴിഞ്ഞില്ലെങ്കിൽ 32-ാം ദിവസം ഓഫീസ് താനേ ഒഴിയുന്ന രീതിയിലാണ് നിയമനിർമ്മാണം വിഭാവനം ചെയ്യുന്നത്. ഈ വർഷം ജൂലൈയിൽ ആരംഭിക്കുന്ന കാലവർഷ സമ്മേളനത്തോടെ സമിതി അന്തിമ റിപ്പോർട്ട് സമർപ്പിക്കുമെന്നാണ് പ്രതീക്ഷിക്കുന്നത്.