ഉഷ്ണതരംഗം കൂടുതൽ മാരകമാകുന്നു; ഇന്ത്യയിൽ വില്ലനാകുന്നത് അദൃശ്യമായ കാലാവസ്ഥാ വ്യതിയാനം

ന്യൂഡൽഹി: ഇന്ത്യയിൽ നിലവിലുള്ള കടുത്ത ഉഷ്ണതരംഗങ്ങളുടെ സ്വഭാവത്തിൽ മാരകമായ മാറ്റം സംഭവിക്കുന്നതായി കാലാവസ്ഥാ ശാസ്ത്രജ്ഞർ മുന്നറിയിപ്പ് നൽകുന്നു. കേവലം അന്തരീക്ഷ താപനില ഉയരുന്ന വരണ്ട ചൂടിനേക്കാൾ, വായുവിലെ ഈർപ്പത്തിന്റെ അളവ് വർദ്ധിക്കുന്നതാണ് നിലവിൽ രാജ്യം നേരിടുന്ന ഏറ്റവും വലിയ പ്രതിസന്ധി.

ഈ അദൃശ്യമായ കാലാവസ്ഥാ വ്യതിയാനം ഇന്ത്യയിലെ ഉഷ്ണതരംഗങ്ങളെ കൂടുതൽ അപകടകരമാക്കുന്നു. വായുവിലെ ഉയർന്ന താപനിലയും അന്തരീക്ഷ ഈർപ്പവും ഒത്തുചേരുന്ന അവസ്ഥയെയാണ് ശാസ്ത്രജ്ഞർ ഇതിനായി വിലയിരുത്തുന്നത്.

സാധാരണയായി ഉയർന്ന ചൂടുണ്ടാകുമ്പോൾ ശരീരം വിയർക്കുകയും, ആ വിയർപ്പ് അന്തരീക്ഷത്തിലേക്ക് ആവിയായി പോകുമ്പോൾ ശരീരം തണുക്കുകയുമാണ് ചെയ്യുന്നത്. എന്നാൽ അന്തരീക്ഷത്തിൽ ഈർപ്പം ഇതിനകം തന്നെ കൂടുതലാണെങ്കിൽ ശരീരം പുറപ്പെടുവിക്കുന്ന വിയർപ്പ് ആവിയാകില്ല.

ഇത് ശരീരത്തിന് സ്വയം തണുപ്പിക്കാനുള്ള ശേഷി നഷ്ടപ്പെടുത്തുകയും മിനിറ്റുകൾക്കകം ആന്തരിക അവയവങ്ങളുടെ പ്രവർത്തനം തകരാറിലാക്കി ഹീറ്റ് സ്ട്രോക്കിലേക്കും മരണത്തിലേക്കും നയിക്കുകയും ചെയ്യും. നഗരങ്ങളിൽ കോൺക്രീറ്റ് കെട്ടിടങ്ങളും അസ്ഫാൽറ്റ് റോഡുകളും പകൽ സമയത്തെ ചൂട് വലിയ തോതിൽ ആഗിരണം ചെയ്യുന്നു.

ഇത് രാത്രികാലങ്ങളിലും അന്തരീക്ഷം തണുക്കാൻ അനുവദിക്കുന്നില്ല. രാത്രിയിൽ താപനില താഴാത്തത് മനുഷ്യശരീരത്തിന് ചൂടിൽ നിന്ന് വീണ്ടെടുക്കാനുള്ള അവസരം ഇല്ലാതാക്കുന്നു. ഗർഭിണികൾ, നവജാത ശിശുക്കൾ, ഹൃദ്രോഗികൾ, പ്രമേഹ രോഗികൾ, കഠിനമായ വെയിലിൽ ജോലി ചെയ്യുന്ന തൊഴിലാളികൾ എന്നിവരെയാണ് ഈ ഈർപ്പമുള്ള ചൂട് ഏറ്റവും കൂടുതൽ ബാധിക്കുന്നത്.

ഇത് പക്ഷാഘാതം, ഹൃദയാഘാതം എന്നിവയ്ക്കുള്ള സാധ്യത വർദ്ധിപ്പിക്കുന്നു. പരമ്പരാഗതമായി താപനില അളക്കുന്ന രീതികളിൽ നിന്ന് മാറി, 'ഹീറ്റ് ഇൻഡക്സ്' അഥവാ അനുഭവപ്പെടുന്ന ചൂട് കണക്കാക്കി വേണം ഇനിമുതൽ പ്രതിരോധ നയങ്ങൾ രൂപീകരിക്കാനെന്ന് ഹാർവാർഡ് അടക്കമുള്ള അന്താരാഷ്ട്ര ഗവേഷണ പഠനങ്ങൾ ചൂണ്ടിക്കാണിക്കുന്നു.

ഇന്ത്യയിലെ പല സംസ്ഥാനങ്ങളിലും ഉഷ്ണതരംഗ ദിനങ്ങളുടെ എണ്ണം വർദ്ധിച്ചുവരുന്ന സാഹചര്യത്തിൽ, കേവലം താപനില 45 ഡിഗ്രി കടക്കുന്നതിനേക്കാൾ ഈർപ്പമുള്ള അന്തരീക്ഷം സൃഷ്ടിക്കുന്ന ആരോഗ്യ അടിയന്തരാവസ്ഥയെ രാജ്യം ഗൗരവത്തോടെ കാണേണ്ടതുണ്ടെന്ന് വിദഗ്ദ്ധർ ഓർമ്മിപ്പിക്കുന്നു.