അച്ചടക്ക നടപടി; രണ്ടാഴ്ചക്കിടെ രണ്ട് ജില്ലാ ജഡ്ജിമാരെ സസ്പെൻഡ് ചെയ്ത് ഡൽഹി ഹൈക്കോടതി

ന്യൂഡൽഹി : അച്ചടക്ക നടപടിയുടെ ഭാ​ഗമായി രണ്ടാഴ്ചക്കിടെ രണ്ട് ജില്ലാ ജഡ്ജിമാരെ സസ്പെൻഡ് ചെയ്ത് ഡൽഹി ഹൈക്കോടതി. സാകേത് ജില്ലാ കോടതിയിലെ ജഡ്ജി വീണാ റാണി, തീസ് ഹസാരി കോടതിയിലെ ജഡ്ജി വിനയ് സിം​ഗാൾ എന്നിവരെയാണ് സസ്പെൻഡ് ചെയ്തത്.

അച്ചടക്ക നടപടിയുടെ ഭാ​ഗമായാണ് സസ്പെൻഷൻ എന്നാണ് റിപ്പോർട്ടുകൾ. അതേസമയം, നടപടിക്ക് പിന്നിലെ കാരണമെന്തെന്ന് വ്യക്തമാക്കിയിട്ടില്ല. മുൻകൂർ അനുമതിയില്ലാതെ രണ്ട് ജഡ്ജിമാരും ന​ഗരംവിട്ടുപോകരുതെന്നും നിർദേശമുണ്ട്. സസ്പെൻഷനിലായ രണ്ടുപേരും കൊമേഴ്സ്യൽ കോടതിയിലെ ജഡ്ജിമാരാണ്. ജൂലായ് പത്തിന് ചേർന്ന ഹൈക്കോടതിയുടെ ഫുൾകോർട്ട് യോ​ഗത്തിലാണ് രണ്ട് ജഡ്ജിമാർക്കെതിരേയും നടപടി സ്വീകരിക്കാൻ തീരുമാനിച്ചത്. തുടർന്ന് ആദ്യം വിനയ് സിം​ഗാളിനെയും പിന്നീട് വീണാ റാണിയെയും സസ്പെൻഡ് ചെയ്ത് ഉത്തരവിടുകയായിരുന്നു.