ജിഎസ്‌ടി പുതിയ നിരക്ക്‌ നാളെ മുതൽ; നേട്ടം ജനങ്ങളിൽ എത്താൻ കടമ്പകളേറെ

ന്യൂഡൽഹി : ​ജിഎസ്‌ടി പരിഷ്‌കരണത്തിന്റെ ഭാഗമായുള്ള പുതിയ നിരക്കുകൾ തിങ്കളാഴ്‌ച പ്രാബല്യത്തിൽ. ദൈനംദിന ആവശ്യങ്ങൾക്കുള്ള സാധനങ്ങൾ, ഭക്ഷ്യവസ്‌തുക്കൾ, പഠനസാമഗ്രികൾ, ചെറുവാഹനം, ഇലക്‌ട്രോണിക് ഉപകരണങ്ങൾ, അർബുദത്തിനും അപൂർവ രോഗങ്ങൾക്കുമുള്ള മരുന്ന്‌ തുടങ്ങിയവയ്‌ക്ക്‌ വില കുറയുമെന്നാണ്‌ പ്രതീക്ഷ. എന്നാൽ, നിരക്കുമാറ്റത്തിന്റെ ഗുണം സാധാരണക്കാരിൽ എത്തുമോയെന്നതിൽ വലിയ ആശങ്ക നിലനിൽക്കുന്നു.

ചെരുപ്പുകൾക്കും 2500 രൂപ വരെയുള്ള തുണിത്തരങ്ങൾക്കും മറ്റും ജിഎസ്‌ടി നിരക്ക്‌ കുറച്ചെങ്കിലും വില കാര്യമായി താഴാത്തവിധം സ്വന്തംനിലയ്‌ക്ക്‌ നൽകിയിരുന്ന ഡിസ്‌ക‍ൗണ്ട്‌ വ്യാപാരികൾ വെട്ടിക്കുറയ്‌ക്കാൻ സാധ്യതയുണ്ട്. ഇന്ധന, ജിപ്‌സം വില വർധിച്ചതോടെ സിമന്റ്‌ വില കന്പനികൾ കാര്യമായി കൂട്ടിയേക്കും. ആരോഗ്യ, വ്യക്തിഗത ഇൻഷുറൻസുകളുടെ ജിഎസ്‌ടി ഒഴിവാക്കിയിട്ടുണ്ടെങ്കിലും ഇൻഷുറൻസ്‌ കന്പനികൾ പ്രീമിയം നിരക്ക്‌ കുത്തനെ കൂട്ടാനും സാധ്യത.

നിരക്കുമാറ്റത്തിന്റെ ആനുകൂല്യങ്ങൾ സാധാരണക്കാർക്ക്‌ ലഭ്യമാക്കാൻ ആവശ്യമായ നടപടികളൊന്നും കേന്ദ്രസർക്കാർ സ്വീകരിച്ചിട്ടില്ല. 2018–19ലെ നിരക്ക്‌ ഏകീകരണത്തിന്റെ നേട്ടങ്ങൾ പത്തിൽ രണ്ട്‌ ഉപയോക്താക്കൾക്ക്‌ മാത്രമാണ്‌ ലഭിച്ചതെന്ന്‌ പ്രാദേശിക സർവേകൾ വെളിപ്പെടുത്തിയിട്ടുണ്ട്. ഇ‍ൗ മാസം 22ന്‌ മുന്പ്‌ ഉൽപ്പാദിപ്പിച്ചതും പാക്കറ്റുകളിലാക്കുകയും ചെയ്‌ത ഉൽപ്പന്നങ്ങൾ പുതിയ പാക്കറ്റുകളിലാക്കുകയോ പുതിയ നിരക്കുകളുള്ള സ്റ്റിക്കറുകൾ നിർബന്ധമായി ഒട്ടിക്കുകയോ ചെയ്യേണ്ടതില്ലെന്നാണ്‌ കേന്ദ്ര ഉപഭോക്‌തൃ മന്ത്രാലയത്തിന്റെ അറിയിപ്പ്‌. ഇ‍ൗ സാഹചര്യത്തിൽ, പാക്കറ്റ്‌ ഉൽപ്പന്നങ്ങൾ വാങ്ങുന്ന ഉപയോക്താക്കൾ പ്രത്യേക ശ്രദ്ധ പുലർത്തണം. ജിഎസ്‌ടി നിരക്കുകൾ, ബില്ലിങ് തുടങ്ങിയ കാര്യങ്ങളിലുള്ള പരാതികൾ ഉപഭോക്‌തൃകാര്യ മന്ത്രാലയത്തിന്റെ ‘ഇൻഗ്രാംപോർട്ടൽ’ വഴി സമർപ്പിക്കാം.