നീതിന്യായ വ്യവസ്ഥയുടെ സ്വാതന്ത്ര്യം അപകടത്തിൽ; കൊളീജിയം ഭരണകൂടത്തിന് കീഴടങ്ങുന്നുവെന്ന് ലോയേഴ്സ് യൂണിയൻ

ന്യൂഡൽഹി: ഇന്ത്യൻ ഭരണഘടനയുടെ നെടുംതൂണായ നീതിന്യായ വ്യവസ്ഥയുടെ സ്വതന്ത്രമായ നിലനിൽപ്പിന് മേൽ കേന്ദ്ര സർക്കാർ നടത്തുന്ന കടന്നുകയറ്റത്തിൽ ആശങ്ക രേഖപ്പെടുത്തി അഖിലേന്ത്യാ ലോയേഴ്‌സ് യൂണിയൻ.

ജഡ്ജിമാരുടെ സ്ഥലംമാറ്റ വിഷയത്തിൽ സുപ്രീം കോടതി കൊളീജിയം രാഷ്ട്രീയ സമ്മർദ്ദങ്ങൾക്ക് വഴങ്ങുന്നത് നീതിന്യായ വ്യവസ്ഥയുടെ അന്തഃസത്തയെ തകർക്കുമെന്ന് എഐഎൽയു പ്രസ്താവനയിൽ പറഞ്ഞു.

ജസ്റ്റിസ് അതുൽ ശ്രീധരനെ മധ്യപ്രദേശ് ഹൈക്കോടതിയിൽ നിന്ന് അലഹബാദിലേക്ക് മാറ്റാനുള്ള തീരുമാനമാണ് ഒടുവിലത്തെ ഉദാഹരണമായി എഐഎൽയു ചൂണ്ടിക്കാട്ടുന്നത്. ഛത്തീസ്ഗഡ് ഹൈക്കോടതിയിലേക്ക് മാറ്റാനായിരുന്നു കൊളീജിയം ആദ്യം ശുപാർശ ചെയ്തിരുന്നത്.

എന്നാൽ കേന്ദ്ര സർക്കാരിന്റെ എതിർപ്പിനെത്തുടർന്ന് ഇത് തിരുത്തുകയായിരുന്നു. ഭരണകൂടത്തിന് താൽപ്പര്യമില്ലാത്ത വിധികൾ പുറപ്പെടുവിക്കുന്ന ജഡ്ജിമാരെ തഴയുന്ന രീതിയാണ് ഇവിടെ പ്രകടമാകുന്നത്.

മുൻപ് ജസ്റ്റിസ് അബ്ദുൾ ഹമീദ് ഖുറേഷിയുടെ കാര്യത്തിലും സമാനമായ നീക്കം ഉണ്ടായതായി സംഘടന ഓർമ്മിപ്പിച്ചു. സാംബൽ സംഘർഷവുമായി ബന്ധപ്പെട്ട് പൊലീസിനെതിരെ എഫ്ഐആർ രജിസ്റ്റർ ചെയ്യാൻ ഉത്തരവിട്ട ചീഫ് ജുഡീഷ്യൽ മജിസ്‌ട്രേറ്റ് വിഭാൻഷു സുധീറിനെ പെട്ടെന്ന് സ്ഥലം മാറ്റിയ നടപടിയെയും എഐഎൽയു ശക്തമായി അപലപിച്ചു.

നീതിന്യായ വ്യവസ്ഥയ്ക്കുള്ളിൽ നിന്ന് തന്നെ ഇത്തരം ഇടപെടലുകൾക്കെതിരെ ശബ്ദം ഉയരുന്നത് ജനാധിപത്യം സംരക്ഷിക്കാനുള്ള പോരാട്ടങ്ങൾക്ക് കരുത്തേകുന്നു. നീതിന്യായ വ്യവസ്ഥയുടെ സ്വാതന്ത്ര്യവും ഉത്തരവാദിത്തവും സംരക്ഷിക്കാൻ മുഴുവൻ നിയമസഭാംഗങ്ങളും മുന്നോട്ട് വരണമെന്ന് എഐഎൽയു പ്രസിഡന്റ് വികാസ് രഞ്ജൻ ഭട്ടാചാര്യയും ജനറൽ സെക്രട്ടറി പിവി സുരേന്ദ്രനാഥും പ്രസ്താവനയിലൂടെ ആഹ്വാനം ചെയ്തു.